Awstraliyening mélborn shehiride ötküzülgen Uyghur jem'iyitining saylimi we putbol musabiqisi ghelibilik axirlashti

Ixtiyariy muxbirimiz uchqun
2019-04-23
Élxet
Pikir
Share
Print
Awstraliyening mélborn shehiride ötküzülgen Uyghur jem'iyiti uyushturghan putbol musabiqiside xatire süret. 2019-Yili 19-aprél.
Awstraliyening mélborn shehiride ötküzülgen Uyghur jem'iyiti uyushturghan putbol musabiqiside xatire süret. 2019-Yili 19-aprél.
RFA/Uchqun

19-Apiril, awstraliyening wiktoriye shtatining mélborn shehiride Uyghur jem'iyitining saylimi bolup ötti. Égelishimizche mezkur saylamgha mélborndiki köp sanliq Uyghurlar qatnashqan bolup, saylam netijiside alimjan osman ependi wiktoriye Uyghur jem'iyitining re'islikige saylan'ghan.

Alimjan ependi bu qétimliq saylam heqqide toxtilip mundaq dédi: "Mélborn shehiride 2006-yili Uyghur jem'iyiti qurulghan bolsimu melum sewebler tüpeyli xizmitini dawamlashturalmidi, shuning üchün biz millitimizning béshigha éghir zulumlar kéliwatqan bügünki künlerde démokratik döletlerde yashap turupmu peqet özimizning turmushi bilenla ötüp ketsek öz wijdanimizgha yüz kélelmeymiz."

U yene mezkur jem'iyetning qurulushining ehmiyiti shundaqla kelgüside qilmaqchi bolghan xizmetliri heqqidimu toxtaldi.

U mundaq dédi: "Biz jem'iyitimizni qurush arqiliq mélbornda yashawatqan Uyghurlar bir gewde bolup awstraliye jem'iyiti we hökümitige dawayimizni tonutushni, wetinimizdiki éghir zulumlarni axirlashturushning chariliri heqqide birlikte xizmet qilishni meqset qilimiz. Shuning bilen birge eng muhimi hemmimiz bir gewde bolup uyushqandila dawayimiz téximu ünümlük bolidu, dep qaraymen."

Arqidinla 20-apréldin 22-aprélghiche awstraliye Uyghur yashlirining 13-nöwetlik "Sherqiy türkistan longqisi" putbol musabiqisi oynalghan. Wiktoriye Uyghur jem'iyitining re'isi alimjan osman ependim mezkur musabiqe heqqidimu tepsiliy uchur berdi.

U b mundaq dédi: "Wiktoriye shtatining nobél park rayonida 20-apréldin 22-aprélghiche ötküzülgen putbol musabiqisi ötküzüldi, musabiqige sédniy, mélborn, adélayd we birisban sheherliridin 4 komanda qatniship, üch kün dawam qildi.

Musabiqimizge sédniy we adélaydtin Uyghur jem'iyitining re'isliri bilen birge jem'iy 400 din oshuq adem qedem teshrip qildi. Axirida adélayd komandisi chémpiyon, mélborn komandisi 2-likke, birisban komandisi 3-likke, sédniy komandisi 4-likke érishti. Mezkur musabiqe arqiliq bir-birimiz bilen bolghan méhir-muhebbitimiz téximu chongqurlashti."

Mezkur pa'aliyetning aktip ishtirakchiliridin biri bolghan nadire xanim wiktoriyediki xanim qizlargha wakaliten ziyaritimizni qobul qildi. U sözide "Wetendiki zulumlar tüpeyli könglimiz sunuq, dilimiz perishan bolsimu shu munasiwet bilen mélborn we yiraq yéqindin kelgen yurtdashlar bilen jem bolushning nahayiti ehmiyetlik ish" ikenlikini bayan qildi. Nadire xanim yene mélborndiki xanim qizlarning méhmanlarni kütüwélish üchün yémek-ichmek wezipisini üstige élip, méhmanlar üchün japaliq xizmet qilghanliqinimu bayan qildi.

Mélborn shehiride yashawatqan qasimjan ependimu saylam we putbol musabiqisi heqqide köz qarashlirini biz bilen ortaqlashti. Igilinishiche awstraliyening mélborn shehiride ötküzülgen mezkur putbol musabiqe awstraliyediki Uyghurlarning tarixi bir qeder uzun pa'aliyetlirining biri bolup, 13 yildin buyan dawam qilmaqta iken.

Toluq bet