Uyghur hey'iti parlamént ezaliridin awstraliyening Uyghur qirghinchiliqini étirap qilishini telep qilghan

Awstraliye Uyghur jem'iyiti we Uyghur herikiti teshkilati mes'ulliridin bolup 7 kishidin terkib tapqan bir hey'et 4-ayning 24-küni sidnéy shehiride bir qatar pa'aliyetlerni élip bardi. Bu pa'aliyetlerning muhim nuqtisi ularning awstraliye parlamént ezaliridin Uyghur qirghinchiliqini étirap qilishini telep qilish boldi.

Shu küni yene sidnéy uniwérsitétida “Hedemni izdeymen namliq” höjjetlik filimni körsitish we Uyghurlarning nöwettiki éghir weziyiti toghrisida doklat bérish yighini ötküzüldi.

Amérikadin kélip bu uchrishishlargha qatnashqan Uyghur herikiti teshkilatining mudiri roshen abbas xanim mundaq dédi: “Biz awstraliyege kélip pa'aliyetlirimizni bashlighandin buyan bu yerdiki Uyghur jama'iti bilen körüshüsh, bezi parlamént ezaliri bilen körüshüsh we ammiwi teshkilatlar bilen uchrishish qatarliq pa'aliyetlerni qilduq. Awstraliye ishchilar partiyesining parlamént ezasi linda woltz xanim uyushturghan yashlar yighinida doklat berdim. Linda xanim awstraliye parlaméntida Uyghur mesilisini izchil halda otturigha qoyup kéliwatqanliqini éytti. Men yighinda bergen doklatimda awstraliye parlaméntining Uyghur qirghinchiliqini étirap qilishi kéreklikini, xelq'ara magnitiskiy qanunini awstraliye hökümitiningmu ijra qilip, irqiy qirghinchiliq bilen chétishliqi bar xitay emeldarlirini jazalishi kéreklikini, Uyghur mejburiy emgikige xatime bérishi kéreklikini, teminlesh zenjirini qanunini ijra qilish kéreklikini otturigha qoydum. Linda woltz xanim bu heqte qolidin kelgenni qilidighanliqini bildürdi”.

RFA/Erkin Tarim

Awstraliye Uyghur jem'iyiti we Uyghur herikiti teshkilati mes'ulidin bolup 7 kishidin terkib tapqan hey'et 4-ayning 24-küni amérikaning sidnéy shehiride turushluq konsuli kiristina elder xanim bilen uchriship 4 betlik telep xétini sun'ghan.

Mezkur ömektin orun alghan dunya Uyghur qurultiyi muhajirlar komitéti mu'awin re'isi mexmet jelepchi ependi bu toghrisida melumat berdi.

Roshen abbas xanim bilen teywen parlaménti kishilik hoquq komitétining bash katipi, 1989-yilidiki tyen'enmén oqughuchilar herikitining rehbiri örkesh dölet 22-aprél küni awstraliyege yétip kelgen bolup, 23-aprélda sidnéydiki Uyghurlar ularni kütüwélish pa'aliyiti ötküzgen. Pa'aliyette roshen abbas bilen örkesh dölet yurtdashlarning so'allirigha jawab bergen.

RFA/Erkin Tarim

Awstraliyediki bu pa'aliyetke qatnashqan Uyghurlarning éytishiche birleshken döletler teshkilati kishilik hoquq aliy komissari ishxanisi ötken yili 8-ayning 30-küni Uyghurlar heqqidiki doklatini élan qilghandin kéyin, awstraliye parlaméntimu Uyghurlar mesilisige alahide köngül bölüshke bashlighan. Bundin kéyin awstraliye parlaméntiningmu Uyghur qirghinchiliqi toghrisida qarar layihesini maqulluqtin ötküzüsh éhtimalliqi bar iken.

Mezkur uchrishish pa'aliyetlirini élip barghan hey'et awstraliye Uyghur jem'iyiti re'isi memet obul, mu'awin re'isi gülmire zunun, dunya Uyghur qurultiyi muhajirlar komitéti mu'awin re'isi mexmet jelepchi, d u q ning mu'awin teptishi jür'et abdukérim, ichki ishlar komitéti mudiri bextiyar böre we washin'gtondiki Uyghur herikiti teshkilatining mudiri roshen abbas qatarliqlardin terkib tapqanidi.