Австралийәдики уйғур тәшкилатлири мелборндики америка консулханисида муһим учришишларда болди

Ихтиярий мухбиримиз учқун
2019-05-14
Елхәт
Пикир
Share
Принт
Nurmemet Türkistani teminligen
Nurmemet Türkistani teminligen
Photo: RFA

5-Айниң 13-күни австралийәдики викторийә уйғур җәмийити шундақла аделайд шәһиридә паалийәт елип бериватқан австралийә шәрқий түркистан җәмийитиниң вәкиллири мелборн шәһиридики америка консулханисида баш консул вә ярдәмчилири билән көрүшкән болуп, мәзкур көрүшүш икки саәт әтрапида давам қилған.

Учришишқа қатнашқан мелборндики викторийә уйғур җәмийитиниң рәиси алимҗан әпәнди мәзкур учришишниң наһайити нәтиҗилик болғанлиқини әскәртип мундақ деди: «5-айниң 13-күни саәт 11дин 1 гичә мелборндики америка консулханисида баш консул майкул килейн вә униң икки ярдәмчиси габриел, рибекка қатарлиқлар билән көрүштуқ, бу көрүшүшкә викторийә уйғур җәмийитидин мән вә катипимиз қасимҗан әпәнди, аделайдтики австралийә шәрқий түркистан җәмийитиниң рәиси нурмуһәммәт әпәнди шундақла катипи мустафа әпәнди қатарлиқлар қатнашти. Биз баш консул майкел килейин әпәндигә вәтинимиз вә миллитимизниң әһвали тоғрилиқ муһим мәсилиләр үстидә сөһбәтләштуқ».

Аделайдтики австралийә шәрқий түркистан җәмийитиниң рәиси нурмуһәммәт түркистани әпәнди бу учришиш тоғрилиқ тохтилип мундақ деди: америкиниң мелборндики консулханиси билән көрүшүшни биз тәләп қилған болуп, баш консул майкел килейин вә ярдәмчилири билән болған ечишишта күнсери яманлишиватқан шәрқий түркистан вәзийити һәққидә уларға тәпсилий мәлумат бәрдуқ һәмдә америкиниң нөвәттики шәрқий түркистанниң еғир вәзийитигә хатимә бериш үчүн түрткилик рол ойнишини тәләп қилдуқ».

У йәнә баш консул майкел килейин әпәндини уйғур көчмәнләр мәсилисигә алаһидә көңүл бөлүшкә дәвәт қилғанлиқини баян қилип мундақ деди: «биз америка һөкүмитидин уйғур көчмәнләр мәсилиси, болупму аяллар вә игә-чақисиз балиларни түркүмләп америка вә башқа ғәрб дөләтлиригә олтурақлишиш мәсилисигә ярдәм қилишни тәләп қилған вақтимизда баш консул майкел килейин әпәнди бу мәсилини америкиниң мунасивәтлик тармақлириға йәткүзидиғанлиқини вә бу мәсилиләрни ойлишишқа тәвсийә қилидиғанлиқини билдүрди».

Нурмуһәммәт түркистани әпәндим сөзидә йәнә мелборндики америка консулханисиниң викторийә уйғур җамаити билән зич мунасивәттә болушини арзу қилғанлиқини ипадиләп мундақ деди: «мелборндики йеңидин қурулған викторийә уйғур җәмийитиниң вәкиллирини бу мунасивәт билән баш консул вә башқа хадимларға рәсмий йосунда тонуштурдуқ, буниң нәтиҗиси сүпитидә бир қанчә күндин кейин мелборндики америка консулханисида өткүзүлидиған иптар паалийитигә викторийә уйғур җәмийитиниң вәкиллирини әзиз меһманлар қатарида тәклип қилинди».

Викторийә уйғур җәмийитиниң катипи қасимҗан әпәнди мәзкур учришиштин алған тәсиратини баян қилип мундақ деди: «америка дунядики күчлүк дөләтләр қатарида бизниң һәқлиқ давайимизға наһайити көңүл бөлүватиду, әгәр биз давайимизни давамлиқ түрдә күчәйтсәк чоқум уларниң қоллишиға еришәләймиз».

Мәзкур учришишқа қатнашқан австралийә шәрқий түркистан җәмийитиниң катипи мустафа әпәнди америка консулханисидики учришишниң бу йил киргәндин буян иккинчи қетимлиқ учришиш икәнликини баян қилип мундақ деди: «бу көрүшүшимиз бизни интайин мәмнун қилди, мениңчә бу австралийәдики давайимизниң йеңи басқучқа киргәнликидин дерәк бериду».

У йәнә бундин кейинму башқа дөләтләр билән бу хилдики учришишларни давам қилип туридиғанлиқиниму қәйт қилди.

Пикирләр (0)
Share
Толуқ бәт