Awstraliyediki Uyghur teshkilatliri mélborndiki amérika konsulxanisida muhim uchrishishlarda boldi

Ixtiyariy muxbirimiz uchqun
2019-05-14
Élxet
Pikir
Share
Print
Nurmemet Türkistani teminligen
Nurmemet Türkistani teminligen
Photo: RFA

5-Ayning 13-küni awstraliyediki wiktoriye Uyghur jem'iyiti shundaqla adélayd shehiride pa'aliyet élip bériwatqan awstraliye sherqiy türkistan jem'iyitining wekilliri mélborn shehiridiki amérika konsulxanisida bash konsul we yardemchiliri bilen körüshken bolup, mezkur körüshüsh ikki sa'et etrapida dawam qilghan.

Uchrishishqa qatnashqan mélborndiki wiktoriye Uyghur jem'iyitining re'isi alimjan ependi mezkur uchrishishning nahayiti netijilik bolghanliqini eskertip mundaq dédi: "5-Ayning 13-küni sa'et 11din 1 giche mélborndiki amérika konsulxanisida bash konsul maykul kiléyn we uning ikki yardemchisi gabri'él, ribékka qatarliqlar bilen körüshtuq, bu körüshüshke wiktoriye Uyghur jem'iyitidin men we katipimiz qasimjan ependi, adélaydtiki awstraliye sherqiy türkistan jem'iyitining re'isi nurmuhemmet ependi shundaqla katipi mustafa ependi qatarliqlar qatnashti. Biz bash konsul maykél kiléyin ependige wetinimiz we millitimizning ehwali toghriliq muhim mesililer üstide söhbetleshtuq".

Adélaydtiki awstraliye sherqiy türkistan jem'iyitining re'isi nurmuhemmet türkistani ependi bu uchrishish toghriliq toxtilip mundaq dédi: amérikining mélborndiki konsulxanisi bilen körüshüshni biz telep qilghan bolup, bash konsul maykél kiléyin we yardemchiliri bilen bolghan échishishta künséri yamanlishiwatqan sherqiy türkistan weziyiti heqqide ulargha tepsiliy melumat berduq hemde amérikining nöwettiki sherqiy türkistanning éghir weziyitige xatime bérish üchün türtkilik rol oynishini telep qilduq".

U yene bash konsul maykél kiléyin ependini Uyghur köchmenler mesilisige alahide köngül bölüshke dewet qilghanliqini bayan qilip mundaq dédi: "Biz amérika hökümitidin Uyghur köchmenler mesilisi, bolupmu ayallar we ige-chaqisiz balilarni türkümlep amérika we bashqa gherb döletlirige olturaqlishish mesilisige yardem qilishni telep qilghan waqtimizda bash konsul maykél kiléyin ependi bu mesilini amérikining munasiwetlik tarmaqlirigha yetküzidighanliqini we bu mesililerni oylishishqa tewsiye qilidighanliqini bildürdi".

Nurmuhemmet türkistani ependim sözide yene mélborndiki amérika konsulxanisining wiktoriye Uyghur jama'iti bilen zich munasiwette bolushini arzu qilghanliqini ipadilep mundaq dédi: "Mélborndiki yéngidin qurulghan wiktoriye Uyghur jem'iyitining wekillirini bu munasiwet bilen bash konsul we bashqa xadimlargha resmiy yosunda tonushturduq, buning netijisi süpitide bir qanche kündin kéyin mélborndiki amérika konsulxanisida ötküzülidighan iptar pa'aliyitige wiktoriye Uyghur jem'iyitining wekillirini eziz méhmanlar qatarida teklip qilindi".

Wiktoriye Uyghur jem'iyitining katipi qasimjan ependi mezkur uchrishishtin alghan tesiratini bayan qilip mundaq dédi: "Amérika dunyadiki küchlük döletler qatarida bizning heqliq dawayimizgha nahayiti köngül bölüwatidu, eger biz dawayimizni dawamliq türde kücheytsek choqum ularning qollishigha érisheleymiz".

Mezkur uchrishishqa qatnashqan awstraliye sherqiy türkistan jem'iyitining katipi mustafa ependi amérika konsulxanisidiki uchrishishning bu yil kirgendin buyan ikkinchi qétimliq uchrishish ikenlikini bayan qilip mundaq dédi: "Bu körüshüshimiz bizni intayin memnun qildi, méningche bu awstraliyediki dawayimizning yéngi basquchqa kirgenlikidin dérek béridu".

U yene bundin kéyinmu bashqa döletler bilen bu xildiki uchrishishlarni dawam qilip turidighanliqinimu qeyt qildi.

Toluq bet