Awstiraliyening herqaysi sheherliride xitaygha qarshi namayish ötküzüldi

Ixtiyariy muxbirimiz uchqun
2019.09.30
awstraliye-namayish.jpg Awstraliyede ötküzülgen xitaygha qarshi namayishtin bir körünüsh. 2019-Yili 29-séntebir.
Social Media

29-Séntebir, yeni yekshenbe küni awstiraliyening sidnéy we mélborin qatarliq sheherliride Uyghurlar, tibetler, xongkongluqlar we teywenliklerning birleshme namayish ötküzüldi.

Sidnéydiki awstraliye Uyghur jem'iyitining katipi bextiyar ependi namayish heqqide melumat bérip mundaq dédi: “9-Ayning 29-küni yekshenbe awstiraliyediki démokratik wiyétnam teshkilati, xongkongluqlar, falun'gung wekilliri we sherqiy türkistanliqlar bu birleshme namayishqa qatnashti. Namayish sa'et 1 de bashlinip sa'et 3 de axirlashti.”

Bextiyar ependi yene namayishning qizghin keypiyat ichide dawam qilghanliqini tekitlep mundaq dédi: “Bu namayish axirlishishi bilen 2000 din artuq xongkongluqlar biz namayish qiliwatqan sheher merkizige yürüp keldi. Ular bizning ay-yultuzluq kök bayraqlirimizni lepildetken namayishchilirimiz bilen birliship, qizghin we kötürenggü roh bilen namayish qildi.”

Mélborindiki wéktoriye Uyghur jem'iyitining re'isi alimjan ependi mélborindiki namayishtin melumat bérip mundaq dédi: “Bügünki namayishqa xongkongluqlar, Uyghurlar, tibetler, teywenlikler we xitay démokratiye teshkilati ezaliri bolup, 500 din artuq kishi qatnashti. Bu qétimqi namayishqa oxshimighan milletler qatnashqan bolsaqmu, bizning meqsitimiz we nishanimiz bir. Eger xongkongluqlar ghelibe qazansa, belki bizmu ghelibige qarap bir qedem ilgiriligen bolimiz.”

Alimjan ependi yene xongkongluqlardin élham élish kérekliki heqqidimu toxtilip mundaq dédi: “Uyghur xelqimiz xitay hökümitining türmiliride mexpiy ziyankeshlikke uchrawatidu. Lékin xongkongluqlarning xitay hökümitige bolghan kürishini pütün dunya xelqi neq meydandin körüwatidu, démek, dunya xelqi xongkongluqlarning kürishige diqqet étibar bériwatidu. Mushundaq jiddiy peytte bizningmu pütün dunya xelqige özimizning dertlirimizni yetküzüp turushimiz xongkongluqlardin ilham élishimiz kérek.”

29-Öktebir küni awstiraliyening adélayd shehirining merkizi kochiliridin biri bolghan rondil molda Uyghurlardin teshkillen'gen bir guruppa yighilish ötküzgen. Mezkur yighilishta adélaydta yashawatqan Uyghur ziyaliysi éldane xanim Uyghurlarning bügünki weziyiti heqqide söz qilip nurghunlighan kishilerning diqqitini tartqan. U mundaq dégen: “Men bu yerde sherqiy türkistan jem'iyitige wakaliten sözlewatimen. U yene shinjang depmu atilidu. Biz bolsaq sherqiy türkistanda yashaydighan Uyghur xelqimiz, yeni Uyghurlar türkiy milletlirining biridur. Biz bügün özimizning xongkongluqlar bilen birge ikenlikimizni, ularni qollaydighanliqimizni we medet béridighanliqimizni bildürüsh üchün bu yerdimiz. Eger xongkongluqlar hazir ornidin des turmisa bizge oxshighan nurghunlighan échinishliq qismetlerge duchar bolidu. Biz buni 70 yildin béri tartip kéliwatimiz. 3 Yilning aldidin bashlap Uyghurlarning weziyiti pewqul'adde nacharlashti, bezi menbelerge qarighanda, bir milyondin artuq Uyghurlar tutqun qilindi we jaza lagérlirigha solandi. Biz bügün insaniyetke qarshi bu jinayetlerni pash qiliwatimiz. Héchkim bizning erkinlikimizni tartiwalalmaydu, shundaqla bizning pikir erkinlikimiz we diniy erkinlikimizgimu héchkim tosqunluq qilalmaydu. Xongkongluqlar bügün biz uchrighan bu qismetlerge uchrawatidu. Shuning üchün biz xongkongluqlarni qollaymiz we ulargha medet bérimiz.

Yuqiriqilardin bashqa yene 1-öktebir küni awstiraliyening adélayid shehiridimu, xitay dölitining 70 yilliqigha qarshi namayish ötküzülidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.