Австралийәдики уйғурлар үч күндин буян йиғин-мурасим вә һәр хил паалийәтләр елип барди

Ихтиярий мухбиримиз арслан
2019-12-02
Share

29-Ноябир җүмә күни австралийә шәрқий түркистан җәмийитиниң уюштуруши билән аделайде шәһиридики уйғур җамаити аделайде шәһиригә зиярәткә кәлгән уйғур һәрикити тәшкилати рәиси рошән аббас ханим билән дуня уйғур қурултийиниң баш тәптиши абликим идрисни күтүвелиш вә учришиш паалийити елип барған болуп, бу паалийәттә австралийә шәрқий түркистан җәмийитиниң рәиси нурмуһәммәд әпәнди қарши елиш сөзи қилған. Кейин рошән аббас ханим вә абликим идрис әпәнди уйғур мәсилиси тоғрисида муһим сөз қилған.

Шу күни әтигәндә рошән аббас ханим вә абликим идрис әпәнди австралийә шәрқий түркистан җәмийитиниң рәиси нурмуһәммәд миҗид қатарлиқ җәмийәт идарә-һәйити әзалириниң һәмраһлиқида җәнубий австралийә парламентини зиярәт қилған вә наштилиқ зияпәткә қатнашқан. Уйғур һәйәт парламент залиға киргәндә улар залдики чоң екранда көрситилип исимлири елан қилинған вә йиғин башқурғучи уларни қарши алидиғанлиқини ипадилигән. Йиғинда рошән аббас ханим уйғур мәсилиси тоғрисида доклат бәргән.

Рошән аббас ханим зияритимизни қобул қилип бу йиғинда тохталған темиси тоғрисида сөзләп бәрди. Рошән аббас ханим йиғинда, америкада уйғур мәсилиси тоғрисида елип бериливатқан паалийәтләр вә оттуриға чиқиватқан йеңилиқлар тоғрисида сөз қилған.

Австралийә шәрқий түркистан җәмийити идарә һәйәт әзаси таш һаҗимниң билдүрүшичә, рошән аббас ханим вә абликим идрис қатарлиқ уйғур һәрикити тәшкилати вәкиллири аделайде шәһиридә зиярәттә болуп, паалийәтлирини давамлаштуруватқан күнләрдә австралийәдики уйғур сәнәтчи шөһрәт турсунниң башчилиқида қурулған муқам ансамбили өз сәнәт номурлирини көрсәткән. Игилинишичә бу муқам ансамбили уйғур миллий сәнитини тәрәққий қилдурушқа тиришмақта икән. Улар австиралийәдә муқам сәнитини намаян қилиш паалийәтлирини уюштуруш билән биргә уйғур мәсилисини тонуштуруп паалийәтлириниму елип бармақта икән. Мәзкур муқам ансамбилиниң уюштуруши билән 30-ноябир күни аделайде шәһиридә тунҗи нөвәтлик уйғур муқам сәнәт кечилики өткүзүлгән. Бу сәнәт кечиликидә уйғур сәнәтчиләр уйғур муқами вә һәр хил сәнәт номурлирини көрсәткән. Бу сәнәт кечиликигә уйғурлар вә австралийәлик болуп көп санда киши қатнашқан. Бу сәнәт кечиликигә америка, канада, йеңи зеландийә қатарлиқ әлләрдин вә австралийәниң мелбурн, сидней қатарлиқ шәһәрлиридин кәлгән уйғурларму қатнашқан.

Зияритимизни қобул қилған уйғур сәнәтчи шундақла австралийә уйғур муқам ансамбилиниң қурғучиси шөһрәт турсун әпәнди бу қетимқи сәнәт кечилики тоғрисида тохталди. У алди билән уйғур муқам ансамбилиниң қурулуш басқучи вә ғайә-мәқсәтлирини тоғрисида тохталди.

Шөһрәт турсун әпәнди, австралийә уйғур муқам ансамбилиниң 2019-йили 20-июл күни авистралийәниң сидней шәһиридә қурулғанлиқини билдүрди. У, бу ансамбилиниң бир тәрәптин уйғур яшларни сәнәт билән тәрбийәләп йетиштүрүш хизмити елип барса, йәнә бир тәрәптин австиралийәниң сидней, мелборн, аделайде қатарлиқ һәр қайси җайлирида сәнәт номурлири орундаш уйғур мәсилисини тонуштурушни мәқсәт қилидиғанлиқини билдүрди.

Шөһрәт турсун әпәндиниң билдүрүшичә, улар муқам сәнити арқилиқ уйғурларниң кимликини, сәнити вә мәдәнийәтлирини тонуштурушни мәқсәт қилидикән. У, уйғур муқам сәнитини орундаш җәрянида кишиләрдин наһайити яхши инкас вә баһаларға еришкәнликини ипадилиди.

Шөһрәт турсун әпәнди йәнә уйғурларниң һазир еғир әһвалға дуч келиватқанлиқини, буни имканийәтниң йетишичә тез сүрәттә көплигән кишиләргә билдүрүш керәкликини тәкитлиди.

Шөһрәт турсун әпәнди сөзидә йәнә хитай даирилириниң һазир уйғур мәдәнийити вә сәнитини йоқ қиливатқанлиқини, уйғурларниң нәччә миң йиллиқ тарихини йоқ қиливатқанлиқини, мәсчитлирини чеқип диний алимларни йоқ қиливатқанлиқини, шуниңдәк йәнә язғучилар, алимлар вә оқутқучиларни вә һәтта сәнәткарларниму зәрбә бериш нишани қилғанлиқини, бундақ кишиләрниң көпиниң түрмә вә лагерларға соланғанлиқини оттуриға қойди.

1-Декабир йәкшәнбә күни йәнә аделайде шәһиридә, аделайде уйғур ана тили мәктипи, сидней вә мелбурн шәһәрдики шундақла йеңи зилландийәдики уйғур ана тил мәктәплириниң бирликтә уюштуруши билән йүсүп хас һаҗип кечилики паалийити елип берилған болуп бу паалийәткә рошән аббас ханим вә йолдиши абликим идрис әпәнди шуниңдәк австралийәдә яшайдиған уйғур зиялийлирини өз ичигә алған көп санда киши қатнашқан. Паалийәттә уйғур тили вә мәдәнийити тоғрисида муһим сөз қилинған вә уйғур өсмүрләр һәр хил номур көрсәткән.

Игилинишичә уйғур һәрикити тәшкилати рәиси рошән аббас ханим вә дуня уйғур қурултийи баш тәптиши абликим идрис әпәндиниң австиралийәдики паалийәтлири бир һәптә давам қилидиған болуп, улар бу җәрянда һәр хил йиғин вә паалийәтләр елип бериш билән биргә дөләт органлири вә парламент әзалирини зиярәт қилип, улар билән уйғур мәсилиси тоғрисида музакирә елип баридикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт