Awstraliyediki Uyghurlar üch kündin buyan yighin-murasim we her xil pa'aliyetler élip bardi

Ixtiyariy muxbirimiz arslan
2019-12-02
Élxet
Pikir
Share
Print

29-Noyabir jüme küni awstraliye sherqiy türkistan jem'iyitining uyushturushi bilen adélaydé shehiridiki Uyghur jama'iti adélaydé shehirige ziyaretke kelgen Uyghur herikiti teshkilati re'isi roshen abbas xanim bilen dunya Uyghur qurultiyining bash teptishi ablikim idrisni kütüwélish we uchrishish pa'aliyiti élip barghan bolup, bu pa'aliyette awstraliye sherqiy türkistan jem'iyitining re'isi nurmuhemmed ependi qarshi élish sözi qilghan. Kéyin roshen abbas xanim we ablikim idris ependi Uyghur mesilisi toghrisida muhim söz qilghan.

Shu küni etigende roshen abbas xanim we ablikim idris ependi awstraliye sherqiy türkistan jem'iyitining re'isi nurmuhemmed mijid qatarliq jem'iyet idare-hey'iti ezalirining hemrahliqida jenubiy awstraliye parlaméntini ziyaret qilghan we nashtiliq ziyapetke qatnashqan. Uyghur hey'et parlamént zaligha kirgende ular zaldiki chong ékranda körsitilip isimliri élan qilin'ghan we yighin bashqurghuchi ularni qarshi alidighanliqini ipadiligen. Yighinda roshen abbas xanim Uyghur mesilisi toghrisida doklat bergen.

Roshen abbas xanim ziyaritimizni qobul qilip bu yighinda toxtalghan témisi toghrisida sözlep berdi. Roshen abbas xanim yighinda, amérikada Uyghur mesilisi toghrisida élip bériliwatqan pa'aliyetler we otturigha chiqiwatqan yéngiliqlar toghrisida söz qilghan.

Awstraliye sherqiy türkistan jem'iyiti idare hey'et ezasi tash hajimning bildürüshiche, roshen abbas xanim we ablikim idris qatarliq Uyghur herikiti teshkilati wekilliri adélaydé shehiride ziyarette bolup, pa'aliyetlirini dawamlashturuwatqan künlerde awstraliyediki Uyghur sen'etchi shöhret tursunning bashchiliqida qurulghan muqam ansambili öz sen'et nomurlirini körsetken. Igilinishiche bu muqam ansambili Uyghur milliy sen'itini tereqqiy qildurushqa tirishmaqta iken. Ular awstiraliyede muqam sen'itini namayan qilish pa'aliyetlirini uyushturush bilen birge Uyghur mesilisini tonushturup pa'aliyetlirinimu élip barmaqta iken. Mezkur muqam ansambilining uyushturushi bilen 30-noyabir küni adélaydé shehiride tunji nöwetlik Uyghur muqam sen'et kéchiliki ötküzülgen. Bu sen'et kéchilikide Uyghur sen'etchiler Uyghur muqami we her xil sen'et nomurlirini körsetken. Bu sen'et kéchilikige Uyghurlar we awstraliyelik bolup köp sanda kishi qatnashqan. Bu sen'et kéchilikige amérika, kanada, yéngi zélandiye qatarliq ellerdin we awstraliyening mélburn, sidnéy qatarliq sheherliridin kelgen Uyghurlarmu qatnashqan.

Ziyaritimizni qobul qilghan Uyghur sen'etchi shundaqla awstraliye Uyghur muqam ansambilining qurghuchisi shöhret tursun ependi bu qétimqi sen'et kéchiliki toghrisida toxtaldi. U aldi bilen Uyghur muqam ansambilining qurulush basquchi we ghaye-meqsetlirini toghrisida toxtaldi.

Shöhret tursun ependi, awstraliye Uyghur muqam ansambilining 2019-yili 20-iyul küni awistraliyening sidnéy shehiride qurulghanliqini bildürdi. U, bu ansambilining bir tereptin Uyghur yashlarni sen'et bilen terbiyelep yétishtürüsh xizmiti élip barsa, yene bir tereptin awstiraliyening sidnéy, mélborn, adélaydé qatarliq her qaysi jaylirida sen'et nomurliri orundash Uyghur mesilisini tonushturushni meqset qilidighanliqini bildürdi.

Shöhret tursun ependining bildürüshiche, ular muqam sen'iti arqiliq Uyghurlarning kimlikini, sen'iti we medeniyetlirini tonushturushni meqset qilidiken. U, Uyghur muqam sen'itini orundash jeryanida kishilerdin nahayiti yaxshi inkas we bahalargha érishkenlikini ipadilidi.

Shöhret tursun ependi yene Uyghurlarning hazir éghir ehwalgha duch kéliwatqanliqini, buni imkaniyetning yétishiche téz sür'ette köpligen kishilerge bildürüsh kéreklikini tekitlidi.

Shöhret tursun ependi sözide yene xitay da'irilirining hazir Uyghur medeniyiti we sen'itini yoq qiliwatqanliqini, Uyghurlarning nechche ming yilliq tarixini yoq qiliwatqanliqini, meschitlirini chéqip diniy alimlarni yoq qiliwatqanliqini, shuningdek yene yazghuchilar, alimlar we oqutquchilarni we hetta sen'etkarlarnimu zerbe bérish nishani qilghanliqini, bundaq kishilerning köpining türme we lagérlargha solan'ghanliqini otturigha qoydi.

1-Dékabir yekshenbe küni yene adélaydé shehiride, adélaydé Uyghur ana tili mektipi, sidnéy we mélburn sheherdiki shundaqla yéngi zillandiyediki Uyghur ana til mekteplirining birlikte uyushturushi bilen yüsüp xas hajip kéchiliki pa'aliyiti élip bérilghan bolup bu pa'aliyetke roshen abbas xanim we yoldishi ablikim idris ependi shuningdek awstraliyede yashaydighan Uyghur ziyaliylirini öz ichige alghan köp sanda kishi qatnashqan. Pa'aliyette Uyghur tili we medeniyiti toghrisida muhim söz qilin'ghan we Uyghur ösmürler her xil nomur körsetken.

Igilinishiche Uyghur herikiti teshkilati re'isi roshen abbas xanim we dunya Uyghur qurultiyi bash teptishi ablikim idris ependining awstiraliyediki pa'aliyetliri bir hepte dawam qilidighan bolup, ular bu jeryanda her xil yighin we pa'aliyetler élip bérish bilen birge dölet organliri we parlamént ezalirini ziyaret qilip, ular bilen Uyghur mesilisi toghrisida muzakire élip baridiken.

Toluq bet