Австралийәдики үч уйғур тәшкилати австралийә парламентида муһим учришишларда болди

Ихтиярий мухбиримиз учқун
2019-09-20
Share
Awastirlaiye-Uyghurliri-Parlamentta-20190918.jpeg Австралийәдики уйғур тәшкилатлири австралийә парламентида елип барған муһим учришишлардин бир көрүнүш. 2019-Йили 18-сентәбир. Канберра, австралийә.
RFA/Uchqun

9-Айниң 18-күни австралийәдики һәрқайси уйғур тәшкилатлири бир йәргә җәм болуп, австралийәниң пайтәхти канберрада бир қисим парламент әзалири шундақла америка вә түркийә қатарлиқ дөләтләрниң әлчихана хадимлири билән көрүшкән. Бу учришишқа австралийәдә паалийәт елип бериватқан австралийә уйғур җәмийити, викторийә уйғур җәмийити вә австралийә шәрқий түркистан җәмийитиниң мәсуллири билән биргә бир қисим паалийәтчиләрму бирликтә қатнашқан.

Австралийә уйғур җәмийитиниң катипи бәхтияр әпәнди бу паалийәт һәққидә мәлумат берип мундақ деди: «18-сентәбир күни австралийә пайтәхти канберрадики австралийә парламентида бир күнлүк зиярәттә болдуқ. Биз бу җәрянда австралийәниң һакимийәт бешидики либерал партийә вә өктичи партийиниң парламент әзалири, бир қисим министирлар билән учришип, уйғур вәзийити вә буниңға мунасивәтлик мәсилиләр һәққидә доклат бәрдуқ.»

Бәхтияр әпәнди йәнә австралийә парламент әзалириниң уйғурларниң авазиниң пәқәт уйғурлар ичидила әмәс, бәлки өзи яшаватқан дөләтләрниң муһим сорунлиридиму яңришиниң зөрүр икәнлики һәққидә тәкитләнгәнлики һәққидиму тохтилип, мундақ деди: «биз көрүшкән парламент әзалири бизгә авазимизни пәқәт өзимизниң ичидила әмәс, өзимиз яшаватқан дөләтләрдики муһим сорунлардиму яңритишимизниң муһимлиқи һәққидә сигнал бәрди.»

Сиднейдики сиясий актиплардин зулпийә ханим бу қетимқи учришишниң вуҗудқа чиқиш җәряни һәққидә мәлумат берип мундақ деди: «бу қетимқи учришишимиз әмгәкчиләр партийәсидин келип чиққан парламент әзаси кирист хейс әпәндиниң сорун һазирлап бериши билән вуҗудқа чиқти. Бу учришишимизниң муһим нуқтиси уйғур җәмийәтлириниң бирликтә системилиқ, пиланлиқ, тәртиплик һалда тәшкиллинишидин болди дәп қараймән. Шуниң билән биргә биз уйғур дәвасида өзимизниң авазимизни қандақ чиқириш, өзимизниң образини қандақ тикләш мәсилисидә ортақ бир нуқтидин һәрикәт қилдуқ дәп қараймән.»
Зулпийә ханим йәнә америка вә түркийә қатарлиқ дөләтләрниң әлчихана хадимлири билән болған учришиш һәққидиму мәлумат берип мундақ деди: «униңдин башқа бизни америка вә түркийә әлчиханилири қобул қилди. Улар өзлириниң ишикиниң бизгә һәрвақит очуқ икәнликини, һәрвақит қолидин келишичә ярдәмдә болидиғанлиқини билдүрүшти. Мениңчә, бу учришишниңму уйғур дәвасида бәлгилик рол ойнайдиғанлиқиға ишинимән.»

Мәзкур учришиш һәққидә австралийә шәрқий түркистан җәмийитиниң рәиси нурмәмәт әпәнди көзқарашлирини баян қилип мундақ деди: «бу учришишмиз наһайити ғәлибилик вә әһмийәтлик өтти. Биз бу арқилиқ мунасивәтлик рәһбәрләргә шәрқий түркистанда болуватқан зулумни, бу зулумниң австралийәдә яшаватқан шәрқий түркистанлиқларға болған тәсирини аңлитиш билән биргә австралийә һөкүмитидин хитайдики бир қисим австралийәниң мәңгүлүк туруш рухсити алған қериндашлиримизни қисқа вақит ичидә австралийәгә қайтуруп келиш арқилиқ австралийә һөкүмитиниң шәрқий түркистанлиқларға игә чиқишини тәләп қилдуқ.»

Нурмәмәт әпәнди йәнә австралийәниң уйғурлар мәсилисигә актип көңүл бөлишини тәләп қилғанлиқини тәкитләп, мундақ деди: «буниңдин башқа бизниң уларға бәргән ортақ учуримиз шу болдики, шәрқий түркистанда болуватқан зулумниң аллиқачан инсанниң тәсәввуридин һалқип кәткәнликини тәкитләш билән биргә австралийә һөкүмитиниң уйғурларға мунасивәтлик қанун лайиһәлишини, австралийәниң бирләшкән дөләтләр тәшкилати қатарлиқ муһим хәлқаралиқ тәшкилатларниң йиғинлирида шәрқий түркистанлиқларниң актип қоғдиғучиси болушини тәләп қилған асаста пикримизни сундуқ.»

Нурмәмәт әпәнди йәнә йеқиндила америка кеңәш палатасида мақулланған «уйғур кишилик һоқуқ сиясити қанун лайиһиси» дин австралийә һөкүмитиниңму өрнәк елиши керәклики һәққидиму тохтилип, мундақ деди: «9-айниң 11-күни америка кеңәш палатасида мақулланған ‹уйғур кишилик һоқуқ сиясити қанун лайиһиси' бизниң бу қетимқи канберра зияритимиздики муһим қорал болди дәп қараймән. Биз австралийә һөкүмитидин мушуниңға охшаш қанун лайиһисини мақуллишиниң зөрүрлүкини тәвсийә қилдуқ.»

Ахирида викторийә уйғур җәмийитиниң рәиси алимҗан әпәнди бу қетимқи учришишниң мәқсити һәққидә тохтилип, мундақ деди: «миллитимиз бүгүнкидәк мусибәттә туруватқан бир пәйттә австралийәдики үч уйғур җәмийитиниң бирликтә һәрикәт қилишимиз муһим әһмийәткә игә. Биз хәлқимизгә бирлишиш, иттипақлишишниң муһимлиқини, иттипақлашқандила техиму муһим ишларни қилалайдиғанлиқимизни билдүрүш үчүн бу паалийәтни бирликтә қилдуқ.»

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.