Awstiraliyediki Uyghurlar: “Awstraliyening xitayning Uyghurlargha yürgüzüwatqan zulumini ‛irqiy qirghinchiliq‚ dep tonushini telep qilimiz”

2-Ayning 26-küni jüme chüshtin burun awstraliyening adilayd shehiridiki Uyghurlar wiktoriye meydandin jenubiy awstraliye parlamént binasigha qeder ammiwiy yürüsh we namayish pa'aliyti élip barghan.

Bu namayish awstiraliye sherqiy türkistan jem'iyiti teripidin uyushturulghan bolup, namayishqa adélayd shehiride yashaydighan Uyghurlardin er-ayal bolup köp sanda kishi qatnashqan.

Namayishchilar qollirida xitay lagérlirigha qamalghan uruq-tughqanlirining süretlirini we xitay zulumi eks ettürülgen pilakatlarni kötürüp: “Xitay, qirghinchiliqni toxtat”, “Uyghurlargha erkinlik”, “Awstiraliye oyghan” dégen'ge oxshash shu'arlar towlap yürüsh qilghan.

Biz bu heqte toluq melumatqa érishish üchün namayishni uyushturghan awstiraliye sherqiy türksitan jem'iytining mu'awin re'isi tashhajim yari bilen söhbet élip barduq.

Tashhaji yari bu qétimqi namayishning asasiy meqsiti toghrisida toxtilip, amérika, kanada we gollandiye qatarliq döletlerning parlaméntlirida xitay hakimiyitining sherqiy türkistandiki Uyghurlargha yürgüzgen jinayi qilmishlirini resmiy halda “Irqiy qirghinchiliq” we “Insaniyetke qarshi jinayet” dep élan qilghanliqini, awstraliyediki Uyghur jama'itining awstraliye hökümitidin oxshash qarar élishni telep qilidighanliqini bildürdi.

Biz yene namayishta söz qilghan awstiraliye sherqiy türkistan jem'iyitining re'isi nurmuhemmed türkistani bilenmu söhbet élip barduq.

Nurmuhemmed türkistani ependi namayishchilarning parlamént binasi aldigha kelgendin kéyin, özlirining awstiraliye hökümitidin kütidighan teleplirini otturigha qoyghanliqini bildürdi.

Nurmuhemmed türkistani yene awstraliye sherqiy türkistan jem'iyitining amérika we kanada hökümetlirining 2021-yilida ughurlar toghriliq qobul qilghan keskin qararidin söyün'genlikini, özlirining awstraliye bash ministéri we awstraliyening yuqiri derijilik hökümet erbablirini sherqiy türkistandiki irqiy qirghinchiliqni resmiy küntertipke élip kélishini chaqirip, mektup ewetkenlikini bildürdi.