Awstraliye parlaméntida Uyghur diyaridiki mejburiy emgek témisida guwahliq bérish yighini chaqirildi

Muxbirimiz eziz
2021-04-27
Share
mejburiy-emgek-kiyim-tikish-zawuti.jpg Xotendiki melum bir zawutta ishlewatqan Uyghur ishlemchiler.
Social Media

Amérika hökümiti bashchiliqidiki bir qisim gherb döletliri Uyghur diyaridiki irqiy qirghinchiliq we mejburiy emgek mesilisi toghrisida bir qatar keskin qararlarni alghandin kéyin buninggha awaz qoshidighanlar barghanséri köpiyishke bashlidi. Bolupmu mejburiy emgek hemde uninggha chétishliq teminat zenjiri gherb dunyasining istémal baziridiki köpligen sahege biwasite chétilidighan bolghachqa herqaysi dölet hökümetliri bu mesilide oxshimighan derijide öz pikirini ipadilewatqanliqi melum. Ene shu xil jiddiy inkaslarning biri 27-aprél küni awstraliye tashqi ishlar, mudapi'e we soda komitéti sahibxaniliqida awstraliye parlaméntida ötküzülgen Uyghur diyaridiki mejburiy emgek témisidiki guwahliq bérish yighinida otturigha chiqti.

Yighinda aldi bilen awstraliye parlaméntining sénatori, awstraliye xizmet ministirliqining sabiq ministiri érik abétz ependi söz aldi. U yighin riyasetchisi bolush süpiti bilen bu qétimqi muhakimide Uyghurlarning mejburiy emgiki bedilige pütüp chiqqan mehsulatlarning awstraliye tamozhnisidin ötüshini men'i qilish heqqidiki qanun layihesi toghrisida muhakime bolidighanliqini tekitligech bu qétimqi yighinda guwahliq bergüchilerni bir-birlep sözge teklip qildi. Aldi bilen amérikadiki yétiliwatqan yash Uyghurshunas derrén baylér widyo arqiliq yighin'gha ishtirak qildi hemde muhim söz aldi.

U 2016-yilidin bashlan'ghan si'iyasiy basturush ehwalining zor kölemlik lagérgha tereqqiy qilishi, lagérlardiki "Qayta qurush urunushliri" ning Uyghur jem'iyitige qandaq paji'elerni élip kelgenliki, buninggha egiship xitay hökümitining "Namratliqni tügitish" namida lagérlardin "Oqush püttürüp chiqqan" tutqunlarni hemde atalmish "Éshincha emgek küchliri" ni mejburiy yosunda herqaysi zawutlargha "Xizmet" ke orunlashturghanliqi qatarliq jeryanni tonushturup ötti.

Bu qétimqi guwahliq bérish neq meydan yighinigha ishtirak qilghan yene bir muhim shahit awstraliye istratégiyelik siyaset inisitituti 2020-yili élan qilghan "Sétiliwatqan Uyghurlar" namliq zor hejimlik doklatning aptorlirining biri, xitay öktichi ziyaliyliridin wikiy shü idi. U sözide xitay hökümitining Uyghurlarni nechche minglap xitay ölkilirige yötkep mejburiy emgekke salghanliqi, buning dunyawi dangliq markilarning teminat zenjiri bilen bolghan baghlinishi, bu zawutlardiki Uyghur ishchilarning herbiyche shekilde bashqurulidighan muhitta mejburiy emgekke qatnishishi, gherb dunyasidiki köpligen shirketlerning erzan emgek küchi élip kelgen iqtisadiy menpe'etke meptun bolup, bu xildiki mejburiy emgekke shérik boluwatqanliqi heqqide tepsiliy melumat berdi.

Awstraliye latrob uniwérsitétining proféssori jéymis léyboldmu bu qétimqi yighinda guwahliq berdi. U sözide kishilik hoquqni közitish teshkilati ötken hepte élan qilghan doklatni misal qilip turup xitay hökümiti sadir qiliwatqan insaniyetke qarshi jinayetlirining Uyghurlarni qandaq paji'elerge mehkum qiliwatqanliqi, emma nöwette bu kirizisni hel qilishning udulla ijra qilghili bolidighan birer charisining yoq ikenliki, shundaqtimu nöwettiki mewjut ikenliki köplep melum boluwatqan mejburiy emgek mehsulatlirini hemde paxta mehsulatlirini nishanliq men'i qilishning xitayning muhim soda shériki bolghan awstraliye hökümiti üchün muhim tedbirlerdin hésablinidighanliqini körsetti. .

Ularning guwahliq sözliridin kéyin awstraliye parlaméntining ezaliri Uyghur diyaridiki mejburiy emgekke da'ir köpligen so'allarni soridi. Shahitlar özliri ige bolghan maddiy ispatlar we höjjetler asasida bu so'allargha jawab berdi.

Guwahliq bérish yighinining ikkinchi bölüki qisqa dem élishtin kéyin yene dawam qildi. Bu bölekte Uyghur diyaridiki siyasiy basturush we tutqun ehwali bilen yaxshi tonushluqi bolghan Uyghur guwahchilar guwahliq berdi. Bolupmu "Awstraliye Uyghurliri tengritagh ayallar jem'iyiti" ning re'isi ramile chanishéf xanimning sözliri yighin ehlige alahide tesir qildi. U awstraliyediki Uyghurlarning héchqandaq tashqi küchlerning terbiyelishi yaki qiziqturushi bolmighan halette hemmeylenningla pa'aliyetchi bolup kétiwatqanliqini, buningdiki eng muhim sewebning nöwette milyonlap lagérlargha qamilip, rohiy we jismaniy jehetlerdin éghir azab tartiwatqan qowm-qérindashlirining paji'esi ikenlikini, chünki awstraliyediki Uyghurlarning ichide uruq-tughqanliri lagérlargha qamalmighan birmu a'ile yoqluqini bayan qilip ötti. U yene sözining dawamida xitay hökümiti ijra qiliwatqan Uyghurlargha qarshi irqiy qirghinchiliq qilmishining nöwette Uyghurlarni mejburiy emgekke sélishni adetke aylanduruwalghanliqi, buning bedilige pütüp chiqqan mehsulatlarning xitaydiki teminat zenjiri arqiliq gherb dunyasigha, jümlidin awstraliye bazirigha éqip kiriwatqanliqi, nöwette buning ispatlirining taghdek döwilinip bolghanliqini, xitay hökümiti awstraliyeni bozek qilishqa urunuwatqan hemde Uyghur paji'esi nöwette eng yuqiri pellige chiqiwatqanda bu xil mejburiy emgeklerni keskin we emili tedbirler arqiliq chekleshning texirsiz boluwatqanliqini sherhlidi. Shuningdek awstraliyening mewjut qanunlirining bu xildiki mejburiy emgekni hemde buningdin hasil bolghan mehsulatlarni men'i qilishtek pewqul'adde rolini jari qildurush lazimliqini körsitip ötti. .

Shu qatarda "Awstraliye sherqiy türkistan jem'iyiti" ning re'isi nurmuhemmed mijit, "Wiktoriye Uyghur jem'iyiti" ning re'isi alim osman qatarliq Uyghur shahitlarmu Uyghur diyaridiki siya'isy kontrolluq, zor kölemlik basturush, mejburiy emgekning kéngiyishi qatarliq témilar boyiche öz qarashlirini bayan qilip ötti.

Yighinning kéyinki bölikide awstraliye hökümitidiki ministirliqlarning mes'ulliri, her sahe xadimliri, adwokatlar birdek oxshimighan nuqtilardin pikir qilip, mezkur qanun layihisini qollaydighanliqi hemde uni himaye qilidighanliqini bildürdi. Melum bolushiche, bu qanun layihisi resmiy qanun'gha aylansa u halda mejburiy emgekke chétishliq xitay mallirining awstraliyege éqip kirishi pütünley men'i qilinidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet