30 Аммиви тәшкилат билән 5 нәшрият ахбарат елан қилиш йиғини чақирип: "хитай ирқий қирғинчилиқни тохтат" деди

Ихтиярий мухбиримиз әркин тарим
2021-04-13
Share
30 Аммиви тәшкилат билән 5 нәшрият ахбарат елан қилиш йиғини чақирип: Әнқәрәниң мәркизидики улус мәйданида түркийәниң һәр қайси җайлиридин кәлгән 30 аммиви тәшкилат билән 5 нәшрият оргининиң мәсуллири чақирған ахбарат елан қилиш йиғинидин көрүнүш. 2021-Йили 12-апрел, түркийә.
RFA/Erkin Tarim

12-Апрел күни түркийәниң пайтәхти әнқәрәниң мәркизидики улус мәйданида түркийәниң һәр қайси җайлиридин кәлгән 30 аммиви тәшкилат билән 5 нәшрият оргининиң мәсуллири ахбарат елан қилиш йиғини чақирип, хитай һөкүмитини ирқий қирғинчилиқни тохтитишқа, түрк һөкүмитини уйғурларға игә чиқишқа чақирди.

Өтүкән мәдәнийәт-маарип җәмийити, тулпар милләтчиләр җәмийити вә дуня уйғур қурултийи қатарлиқ 30 тәшкилат билән 5 нәшрият бирликтә уюштурған паалийәткә, қәйсәри, истанбул, бурса вә әнқәрәдин кәлгән аммиви тәшкилат мәсуллиридин сирт әнқәрәдики уйғур тәшкилатлириниң мәсуллириму иштирак қилди. Корона вируси түпәйли көп кишиниң қатнишиши чәклимигә учриди.

Бирқанчә телевизийә вә гезит-журналларниң вә дөләтлик ахбарат оргини болған анадолу хәвәр агентлиқиниң мухбирлириму иштирак қилған ахбарат елан қилиш йиғинида қолида ай юлтузлуқ көк байрақ билән түрк байриқи көтүрүвалған намайишчилар оттурисида турған өтүкән мәдәнийәт вә маарип җәмийити рәиси ишил әсгин ханим мухбирларға баянат берип, мундақ деди: "қиммәтлик мухбирлар, һөрмәтлик һәр қайси аммиви тәшкилатларниң мәсуллири, қиммәтлик қоллиғучилар, һәммиңларға һөрмәт вә еһтирамимни билдүримән. Биз бүгүн түрк милләтчи тәшкилатлири вә бирқисим шәрқий түркистан аммиви тәшкилатлири, хитайниң шәрқий түркистанлиқ қериндашлиримизға елип бериватқан ирқий қирғинчилиқини ‹тохтат' дейиш, шундақла түркийә һөкүмитини, түркийә парламентини, сиясий партийәләрни, түрк хәлқини шәрқий түркистан хәлқигә игә чиқишқа чақириш үчүн бир йәргә җәм болдуқ. Бүгүн бу йәрдә биз алди билән хитайниң уйғурларға елип бериватқан бесим сияситини әйибләш билән бирликтә түркийә һөкүмитини дәрһал һәрикәткә өтүшкә чақиримиз".

Ишил әсгин ханим баянатида 1949-йилидин буян хитайниң уйғурларни ассимилятсийә қилишқа тиришиватқанлиқини, кейинки 4 йилда буниң ирқий қирғинчилиққа айланғанлиқини, шуңа бәзи дөләтләргә охшаш түркийә һөкүмитиниңму дәрһал һәрикәткә өтүши керәкликини тәкитлигәндин кейин, түркийә һөкүмитиниң түркийәдә техи түрк пуқраси болалмиған барлиқ уйғурларға дәрһал пуқралиқ бериши керәкликини оттуриға қойди.

Әнқәрәдә өткүзүлгән намайишқа қатнашқан кишиләр қоллирида "ишғалчи хитай шәрқий түркистандин йоқал, шәрқий түркистанға мустәқиллиқ, җаза лагерлири тақиветилсун, түркийә ухлима қериндашлириңға игә чиқ, қатил хитай шәрқий түркистандин йоқал" дегән шоарларни товлашти.

Намайиш ахирлашқандин кейин микропонимизни намайишни уюштурған ишил әсгин ханим вә тулпар милләтчиләр тәшкилати рәиси волқан қарадавут әпәнди вә бәзи намайишчиларға узаттуқ. Әнқәрәдики уйғур мәдәнийәт мәркизи мәсули абдулхәмит әпәнди бу намайиш арқилиқ 30 тәшкилат 5 нәшрият органиниң мәсуллириниң бир йәргә җәм болуп уйғурларни қоллайдиғанлиқини ипадилигәнликини баян қилди.

Ишил әсгин ханим бүгүнки намайишни уюштуруштики мәқситигә йәткәнликини баян қилип мундақ деди: "түркийәдә һәр хил темиларда давамлиқ бундақ ахбарат елан қилиш паалийәтлири болиду, әмма һәқиқәтән ирқий қирғинчилиққа учраватқан шәрқий түркистанлиқлар үчүн давамлиқ бундақ паалийәтләр болмайду. Биз мәзлум шәрқий түркистан хәлқиниң авази болушқа тиришиватимиз, буниңдин кейин давамлиқ һалда бундақ паалийәтләрни елип бармақчимиз".

12-Апрел күни түркийә пайтәхти әнқәрәдә өткүзүлгән ахбарат елан қилиш йиғиниға бурса шәһиридә паалийәт елип бериватқан ирақтики түркмәнләр җәмийити башлиқи исам абдулқадир әпәндиму иштирак қилди. У, паалийәттин кейин өз туйғулирини баян қилип мундақ деди: "бүгүн бәк яхши паалийәт болди. Паалийәткә шәрқий түркистанлиқ, қазақистанлиқ қериндашлиримизму қатнашти. Биз ирақниң кәркүк вә мусул вилайәтлиридин кәлгән түркмәнләрму қатнаштуқ. Һәммимиз шәрқий түркистанлиқ қериндашлиримизниң һәққаний дәвасини қоллайдиғанлиқимизни баян қилиштуқ. Биз уйғур қериндашлиримизни ахирғичә қоллаймиз. Хитайни һәр йәрдә һәр даим әйибләймиз. Уйғур қериндашлиримиз өз вәтинидә әркин яшаш һоқуқиға игә болғучә уларни қоллаймиз".

Тулпар милләтчиләр тәшкилатиниң рәиси волқан қарадавут әпәнди "бүгүн мәқситиңларға йәттиңларму?" дегән соалимизға мундақ җаваб бәрди: "мәқситимизгә йәттуқ дәп ойлаймән. Чүнки ахбарат елан қилиш паалийитимиз яхши өтти. Худайим буйруса бу тәшкилатлар давамлиқ бир йәргә җәм болуп шәрқий түркистанлиқ қериндашлиримизниң авази болушқа давам қилимиз".

Бүгүн, йәни 12-апрел күни әнқәрә улус мәйданида уйғурларни қоллап паалийәт елип бериватқан 5 нәшрият билән 30 аммиви тәшкилат бурун түркийәниң һәрқайси җайлирида уйғурларни қоллап айрим-айрим паалийәт елип барғаниди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт