Қазақистандики кишилик һоқуқ адвокати айман умарова тәкрар тәһдиткә учриғанлиқини елан қилди

Мухбиримиз гүлчеһрә
2019-06-05
Share
ayman-omarowa.jpg Қазақистандики даңлиқ кишилик һоқуқ адвокати айман омарова ханим.
Social Media

Қазақистандики даңлиқ кишилик һоқуқ адвокати айман омарова үчүн роза һейтниң һарпа ахшими, қара басқан бир кечә болди. Бу кечә униң әрмәк ити оз қорусида сирлиқ һалда өлтүрүлгән. Зияритимизни қобул қилған айман буни өзиниң ағзини юмдурмақчи болғанларниң тәһдит суйиқәсти дәп билдүрди. Буниң алдида униң ишики алдиға бир мүшүкниң өлүки ташлап қоюлған икән.

Лагер шаһити сайрагүлни 3-июн қазақистандин саламәт шветсийәгә узитип, иккинчи қәдәмдә мирза қамақтики "ата юрт пидаийлири" ниң рәһбири серикҗан биләшни әркинликкә чиқириш үчүн хизмәткә киришкән, адвокат айман омарова бүгүн радийомизға өзиниң йеқиндин буян тәкрар тәһдиткә учриғанлиқини билдүрди.

Айман омарованиң билдүрүшигә қариғанда, 4-июн күни шиветсийәгә йетип барған лагер шаһити сайрагүл билән телефонда сөзлишип, униң у җайда өзини наһайити бихәтәр вә әркин, хатирҗәм һес қилғанлиқини аңлап, униң үмидлик болуп қалғанлиқидин хош болған болсиму, әпсус у кечә униң үчүн уйқусиз бир әндишилик кечә болған. У, кечичә қорусида ғәйрий авазларни туйған, әмма уйқучилиқта немиликини җәзимләштүрәлмигән. Әтиси әтигән саәт 9 да болса у балилири билән тәң өз қорусида әрмәк ити барсниң ечинишлиқ һалда өлгәнликини көргән.

Айман итини "өлтүрүлгән" дәп җәзм қилишидики сәвәбләрни итниң җәситиниң сүрәтлирини көрситип туруп мундақ дәп шәрһлиди: "биринчидин рәсимләрдин қарисиңиз ениқ көрүнүп туриду. Униң җенини бири мәҗбурий алған. Еғзиға топа тиқилған.

Иккинчидин, барс аилимиздә туруватқиниға бәш йил болған әрмәк итимиз, униң хуй-миҗәзини яхши билимән, интайин шох, сағлам һайван, униң туюқсизла бир кечидә қерип яки кесәл билән өлүп қелиши мумкин әмәс.

Үчинчидин, һәр түрлүк делолар үстидә узун йил ишлигән бир адвокат болуш сүпитим билән кәспий тәҗрибәм, сәзгүм, бу итниң қәстән вә бихәтәрлик техникалиридин хәвири бар кәспий хадимлар тәрипидин өлтүрүлгәнликидин бешарәт бериду.

Айман йәнә униң итини өлтүрүш арқилиқ өзигә қорқунчлуқ агаһландуруш яки тәһдит салмақчи дәп гуман қилишиниң сәвәбини чүшәндүрүп йәнә мундақ дәйду:

"итимни кимниң яки кимләрниң өлтүргәнликигә испатим болмисиму әмма мән буни, ағзимни юмдурмақчи болғанларниң қәстәнлик билән қилған суйиқәсти дәп қараймән. Чүнки, бу мениң лагер шаһити сайрагүл савутбайни әркинликкә чиқарғинимдин кейин вә әтә 6-июн серикҗанниң соти болидиған күнләрниң арилиқида йүз бәрди. Буни тасадипийлиқ дәп қаримаймән, буларниң мәқсити маңа тәһдит селип қорқутуш арқилиқ қиливатқан хизмитимдин қол үздүрүш".

Униң үстигә бу хил һайванниң өлүки билән тәһдит қилиш тунҗи қетимлиқи әмәс, бу вәқә йүз бериштин икки айлар бурунму бир қетим йүз бәргән, у чағда бир күни шәһәр өйдин сиртқа чиқишимға, ишик алдимға ташлап қоюлған бир мүшүкни көрүп көңлүмгә бир ғум чүшкән иди. Итимниң өлтүрүлүши иккинчи сирлиқ вәқә. Бу бир түрлүк классик тәһдит қилиш усули, йәни өлүм арқилиқ қорқутушни мәқсәт қилған.

У: "сиз қорқтиңизму?" дегән соалимизға наһайити кәскин җаваб бәрди: "әлвәттә қорқтум, өзүм үчүн әмәс, балилирим үчүн қорқтум, әндишиләндим. Чүнки балилар бәк қорқуп кәтти. Чүнки у итни балилирим яхши көрәтти, мән биләнму давамлиқ ойнайтти биз барсқа бир йигиткә муамилә қилғандәк муамилә қилаттуқ. У аилимизниң әзасидәк болуп қалған, исит! у мушундақ ечинишлиқ өлтүрүлди".

Айман омарова вәқә йүз бәргәндин кейин йәрлик сақчиға мәлум қилған болсиму улардин һечқандақ инкас кәлмигән, ахири итиниң өлүш сәвәбини ениқлаш үчүн өзи итини кәспий қанун дохтуриға апирип бәргән вә иҗтимаий таратқулар арқилиқ вәқәни аңлатқан. Бу сирлиқ вәқә ғулғула қозғашқа башлиғандин кейинла сақчилар униң өйигә келип шәкилгә итниң өлүми һәққидә соалларни сорап кәткән, әмма һазирғичә һечқандақ ениқлаш елип бармиған.

Бу һәқтә тохталған айман әпсусланған һалда: "мән сақчиларниң инкасидин бу вәқәни йепиветишни халайдиғанлиқини һес қилдим." дәйду. У сақчи тәрәптин қоғдинишқа еришәләйдиғанлиқидин үмидини үзүп, өйи әтрапиға мәхсус камера орнитиш үчүн ширкәтләр билән алақилишиватқаникән.

Вәқәдин хәвәрдар болған "ата юрт пидаийлири" тәшкилатиниң вәкиллиридин қайрәтниң ейтишичә, адвокат айманниң итиниң сирлиқ һалда қорусида өлүп қелиши бир бинормал һадисә болсиму һазирчә уни ким қилғанлиқини кесип ейтиш тәс икән. Қайрәт бу вәқәниң даңлиқ вә мәрданә адвокат айманға тәсир көрситиши вә уни серикҗанниң делоси үстидә ишләштин тосуп қалалишиға ишәнмәйдиғанлиқини билдүрди.

Қазақистанда лагерлар һәққидә гуваһлиқ топлаштәк пидаий хизмәтләрни елип бериватқан тилшунас гене бонн өзиниңму бу вәқәдин хәвәр тапқан болсиму һазирчә кесип бир немә демәк тәс дәп қарайдиғанлиқини билдүрди.

Айман, 10-марттин башлап мирза қамақта туруватқан "ата юрт пидаийлири" ниң йетәкчиси серикҗанниң шәхсий адвокати болуш сүпити билән, әтә йәни 6-июн қазақистан пайтәхтидә сотқа чиқмақчи. Айман гәрчә бу вәқә аилисигә азаб вә тәһдит туғдурған болсиму, бирақ буниң өзиниң адаләт үчүн дәс туруштин һәм өзиниң кәспий вә инсаний бурчини ада қилиштин тосуп қалалмайдиғанлиқини тәкитлиди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт