Photo: RFA
Уйғур аптоном районлуқ аяллар бирләшмисигә аит икәнлики илгири сүрүлгән аваз хатирисидин мәлум болушичә, лагерда өлгән айтурсун елиниң аниси патигүл ясин дохтурханиға елип келингәндин кейин сақчилар униңға қизиниң җәситиниң йүз қисминила көрсәткән, бәдәнниң қалған қисмини көрсәтмигән. Буниңға нарази болған патигүл ясин сақчиларниң алақидар рәсмийәт қәғәзлиригә қол қоюшни рәт қилған. Бу чағда сақчилар патигүл ясинни қолидин тутуп рәсмийәтләргә мәҗбурий имза қойғузған.
Мәзкур аваз хатирисидин мәлум болушичә, айтурсунниң аниси дохтурханиға елип келингәндин кейин сақчилар униңға йүз бәргән әһвалдин һечқандақ мәлумат бәрмәй туруп, униң қизиниң қорсиқини йеришқа қошулидиған яки қошулмайдиғанлиқини, йәни қанун дохтуриниң җәсәтни тәкшүрүшини тәләп қилидиған яки қилмайдиғанлиқини сориған. Айтурсунниң аниси патигүл ясин «яқ» дегәндин кейин униңға қизиниң өлгәнликини ейтқан. Сақчилар униңға әгәр ғовға чиқармиса, җәсәтни көрситидиғанлиқини, ундақ болмиса җәсәтни көрсәтмәстинла көмүветидиғанлиқини билдүргән. Чарисиз ана қизиниң өлүм сирини билиш мәқситидә җәсәтни көрүп бақмақчи болған вә ғовға чиқармаслиққа вәдә бәргән. Әмма сақчилар униңға қизиниң пәқәтла йүз қисми көрсәткән, җәсәтниң башқа қисмини көрүшигә рухсәт қилмиған.
Сақчилар айтурсунниң өлүм сәвәби сүпитидә униң саламәтликиниң аҗизлиқи вә сораққа бәрдашлиқ берәлмигәнликини ейтқан. Патигүл ясин қизиниң қейин-қистақ билән өлгәнликини пәрәз қилип, сақчиларниң баянлириға ишәнмигән вә сақчиниң алақидар рәсмийәт қәғәзлиригә имза қоюшни рәт қилған. Бу чағда сақчилар униң қолидин тартип вә түгивалған бармақлирини мәҗбурий ечип қәғәзләргә имза қойғузған. Сақчилар йәнә хата кимлик мәлуматлири билән толдурулған бир варақ дохтур испатнамисини бәргән. Әслидә алий мәлуматлиқ болған, хитайчә, япончә вә инглизчә билидиған айтурсун ели бу испатнамидә «саватсиз» дәп йезилған. Мәзкур испатнамидә униң төт хил йүрәк кесилиниң барлиқи қәйт қилинған.
Уйғур аптоном районлуқ аяллар бирләшмиси мәзкур аваз хатириси вә айтурсунниң өлүм һәққидә мәлумат беришни изчил һалда рәт қилди. Биз айтурсунниң лагерда өлгәнликини дәлиллигән қәшқәр хуаән саяһәт ширкитидин айтурсунниң һаят мәзгилидики саламәтлик әһвали һәққидә мәлумат соридуқ. Алақидар хадим айтурсунниң илгири бирәр кесили барлиқидин хәвәрсизликини ейтти. Мәзкур аваз хатирисидә айтурсунниң аниси патигүл ясинму қизиниң сағлам бир аял икәнликини, хизмәттә җанлиқ вә актиплиқини, илгири дохтурханида йетип бақмиғанлиқини баян қилған.
Һөрмәтлик радио аңлиғучилар, юқирида қәшқәр хуаән саяһәт ширкитиниң сабиқ муавин директори айтурсун елиниң лагерда өлгәнлики һәққидики чатма хәвиримизниң иккинчи қисмини диққитиңларға сундуқ.
