Bala chüshürüsh opératsiyesige qarshi turghan ata 8 yilliq késilip türmide jan üzgen

Muxbirimiz shöhret hoshur
2022-03-11
Share
Amérika hökümiti xitay elchixanisining Uyghur ayalliri heqqidiki tiwittér uchurini qattiq eyiblidi Xitay elchixanisi Uyghur ayallirini tughmas qilghanliqini étirap qilghanliqi munasiwiti bilen ishlen'gen karton.
REUTERS

Muhajirettiki kériyeliklerdin birining inkas qilishiche, kériyening lengger yézisidiki abduréshit obul isimlik bir déhqan, 2012-yili yurti kériyedin köchüp kétish yoli bilen hamilidar ayalini bala chüshürüsh opératsiyesidin saqlap qalghan. U kéyinche yurtigha qaytip kélip pilanliq tughut jerimanisini töligen bolsimu, 2017-yiligha kelgende, uning balisini qutquzup qélishi diniy radikalliqning ipadisi dep qarilip türmige tashlan'ghan. U türmide jaza mudditini ötewatqan mezgilde hayatidin ayrilghan. Muxbirimizning téléfon ziyaretliri dawamida bu uchurning toghriliq delillendi.

Kériyelik bir muhajirning inkas qilishiche, kériyening lengger yéza saybagh kentide olturushluq abduréshit obul, 2012-yili yaz aylirida, hamilidar ayalini élip kériyedin köchüp ketken. U ayali yenggip balisi bir yashqa kelgende yurtigha qaytip kelgen. Bu chaghda yéza saqchiliri abduréshit obulni tutqun qilip bir heptiche solap qoyghan we atalmish siyasiy terbiye bergendin kéyin qoyup bergen we pilandin artuq tughulghan bala üchün yéziliq hökümet uninggha 20 ming yüen jerimane qoyghan. Kériyelik muhajirning eskertishiche, gerche abduréshit obul jazasini tartip bolghan we jerimanini tölep bolghan bolsimu, 2017-yiligha kelgende, burun bir hepte tutup turulghanliqi üchün sabiq tutqunlar qatarida lagérgha élip kétilgen. U lagérda ikki yilche yatqandin kéyin, uning 5 yil ilgiri hamilidar ayalini pilanliq tughut opératsiyesi qildurmasliqi diniy angning, yeni diniy esebiylikning tesiri dep qaralghan, uning a'ilisi boyiche bir mehel mökünüp yashishi, hökümet bilen qarshilishish we jem'iyet tertipini buzush dep qaralghan hem 8 yilliq késiwétilgen.

Biz bu ehwalni éniqlash üchün kériyediki alaqidar idare-organlargha téléfon qilduq.

Kériyelik muhajirning inkasida qeyt qilinishiche, 2012-yillarda pilanliq tughut siyasitide ushtumtut bir keskinlishish dolquni yüz bergen we birtürküm pilandin sirt tughulghan balilar üchün a'ililerge éghir jerimane qoyulghan bolsa, hamilidar ayallargha qarita bala chüshürüsh opératsiyesi élip bérilghan.

Bizning shu yillardiki éniqlashlirimiz dawamidimu, kériyening arish yézisida bir mehellidinla 4 hamilidar ayalning balisining chüshüriwétilgenliki, buning ichide 9 ayliq bowaqningmu barliqi ashkarilan'ghanidi. Shu chaghda yene birqisim ahalilerge 15-20 ming yüendin jerimane qoyulghanliqimu delillen'genidi.

Kériyelik muhajirning déyishiche, abduréshit obul kériye türmisige élip kétilip bir yildin kéyin, uning jesiti a'ilisige tapshurulghan we jeset saqchilarning nazariti astida yerlikige qoyuwétilgen.

Téléfonimizni qobul qilghan kériyening lengger yéza saybagh kent saqchisi kentidin yéqinda türmide ölgenlerdin kimler barliqini sorighinimizda, u eng awwal abduréshit obulning ismini tilgha aldi. U yene abduréshit obul heqqidiki yuqiriqi barliq uchurlarning toghriliqini delillidi.

Melum bolushiche, Uyghur rayonida pilanliq tughut siyasitining ijra qilinishi bezide boshash, bezide ushtumtut shiddetlinish teriqiside dawam qilghan. Shiddetning derijisi bezide béyjingning shu'ar-chaqiriqlirigha munasiwetlik bolghan bolsa, bezide yerlik emeldarlarning xuy-peyli we aktipchanliqi bilenmu munasiwetlik bolghan.

Uyghur pa'aliyetchilirining perez qilishiche, Uyghur rayonida yéqinqi yillarda pilandin sirt dep qaralghan nechche onminglighan hamile chüshürüwétilgendin bashqa, yene nechche minglighan hamile tölen'gen jerimane we yaki abduréshit obulningkige oxshash tedbirler bilen aman qalghan. Bu qutquzuwélin'ghan balilarning ata-anilirining hemmisining dégüdek, nöwette türme we lagérlarda ikenliki melum, emma, ulardin qanchisining qiyin-qistaqtin yaki shara'it qiyinchiliqidin jan üzgenliki hazirche melum emes.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet