Oghlini chet elde oqutqan we chet elni ziyaret qilghan nuraxun rozining 20 yilliq késilgenliki delillendi

Nöwette türkiyediki bir alyumin zawutida inzhénér bolup ishlewatqan 22 yashliq nur'eli nuraxunning radiyomizgha bergen guwahliq bayanatidin melum bolushiche, dadisi uni 2015-yili 9-ayda misirgha oqushqa ewetken. Aridin 3 ay ötkende u misirgha kélip oghlini yoqlighan. Nuraxun rozi bu oghlini yoqlash sepiride, yurtidiki tonushliridin birining 12 yashliq balisinimu bille élip chiqip, uning misirda oqushigha yardem qilghan. Nuraxun rozi qaytish sepiride türkiyede 2 heptiche sayahette bolghan.

 U yurtigha qaytip barghandin kéyin pasporti yighiwélin'ghan, 2017-yili 4‏-ayda lagérgha élip kétilgen we “Chet'elde balisini oqutush we balisini oqutqan'gha yardem qilish gunahi” seweblik 20 yilliq késiwétilgen.

Nöwette künes türmiside jaza ötewatqan nuraxun rozi ghulja sheher képekyüzi yézisining ara mehelle kentidin bolup, biz képekyüzi yéziliq saqchixanigha téléfon qilip, uning ehwali heqqide melumat soriduq. Téléfonimizni qobul qilghan xadim, nuraxunning balisini oqutqanliqi üchün tutqun qilin'ghanliqini delillidi.

 Ilgiriki éniqlashlirimizda, ghulja nahiye qariyaghach yézisidiki bireylenning bir balisini dinda oqutqanliqi üchün 7 yilliq, yene bireylenning ikki balisini dinda oqutqanliqi üchün 14 yilliq késilgenliki aydinglashqanidi. Mezkur saqchi xadimi, nuraxunning 20 yilliq jaza mudditining qandaq bir hésab bilen békitilgenliki heqqide melumat bérelmidi. Yene ilgiriki ashkarilan'ghan bir qisim höjjetlerde, xitayning misir, türkiye we se'udi erebistan qatarliq 20 nechche döletni “Sezgür döletler” dep békitip, bu döletlerni ziyaret qilip kelgenlerni qattiq nazaret qilghanliqi yaki tutqun qilghanliqi, köp qismini 5 yildin on nechche yilgha qeder keskenliki melum bolghanidi.

Mezkur saqchi xadimi özining bu saqchixanigha yéngi ikenlikini tekitlep, bu “Qanunsiz seper” ning nuraxunning jaza mudditini qanchilik uzartqanliqi heqqide melumat bérelmidi.

Téléfon ziyaretlirimiz dawamida, nuraxunning künes türmiside jaza ötewatqanliqimu delillendi.

Déyilishiche, 2015-yili 14 yash waqtida, misirgha oqushqa chiqqan nur'eli, 2016‏-yili misirda Uyghur oqughuchilarning xitaygha qayturulush weqelirige shahit bolghan؛ 2017-yili a'ilisi bilen alaqisi pütünley üzülüp qalghan. Ösmür waqtidila hayatning éghir siyasiy we iqtisadiy sinaqlirigha duch kelgen nur'eli 2018-yili türkiyege kélip panahlan'ghan. U türkiyede turmush we oqush yolliri üstide izdinip yürgen mezgilide, dadisining késilip ketkenlik xewirini uqqan. Nur'eli bir mehel pisxik jehettin éghir zexmet chekken؛ arqidin dadisining töligen bedilige, uning ümidini yerde qoymasliq bilen jawab bérish qararigha kelgen. Netijide 2019-yili türkiyediki sulayman démirel uniwérsitétining mashinisazliq kespige imtihan bérip ötken nur'eli, bu yil uniwérsitétni ela netije bilen püttürgen. U oqushining axirqi yili piraktika qilghan “Yalchinlar alyumin” namliq chong bir shirketning zawutigha inzhénér bolup xizmetke chüshken.

 Dadisining délosini téximu murekkepleshtürüwetmeslik xiyali bilen a'ile ehwali heqqide hazirghiche axbaratqa melumat bermey kelgen nur'eli, sükütning héchqandaq ishqa yarimighanliqini tonughandin kéyin, bügün bu guwahliq bayanatini élan qilghan.

Yuqirida, ghulja képekyüzi ahalisi nuraxun rozining oghlini chet'elde oqutqanliqi we chet'elni ziyaret qilghanliqi üchün 20 yilliq késilgenlikining delillen'genliki toghruluq xewer berduq.