Barin inqilabining 32 yilliqi munasiwiti bilen istanbulda xatirilesh pa'aliyiti ötküzüldi

Ixtiyariy muxbirimiz erkin tarim
2022.04.04
Share on WhatsApp
Share on WhatsApp
Barin inqilabining 32 yilliqi munasiwiti bilen istanbulda xatirilesh pa'aliyiti ötküzüldi “Shéhitlirimizge du'a qilish we iptar” témisida ötküzülgen barin shéhitlirini xatirilesh pa'aliyitidin körünüsh. 2022-Yili aprél, istanbul, türkiye.
RFA/Erkin Tarim

Barin inqilabi yüz bergenlikining 32 yilliqi munasiwiti bilen istanbulda “Shéhitlirimizge du'a qilish we iptar” témisida barin shéhitlirini xatirilesh pa'aliyiti ötküzüldi. Bu pa'aliyet dunya Uyghur qurultiyi we dunya Uyghur qurultiyi wexpisi teripidin uyushturulghan bolup, murasimgha türkiyede pa'aliyet élip bériwatqan Uyghur teshkilatlirining mes'ulliri, jama'et erbabliri we aqsaqallardin sirt, “Iyi” partiyesi, aq partiyesi, démokratiye partiyesi we “Yéngidin refah” partiyesining istanbulda turushluq rehberliri ishtirak qildi.

Xatirilesh pa'aliyiti “Qur'an kerim” tilawiti we “Istiqlal marshi” ni oqush bilen bashlandi. Xatirilesh pa'aliyitide dunya Uyghur qurultiyining mu'awin re'isi doktor erkin ekrem échilish sözi sözlidi. U barin inqilabining ehmiyiti we bu inqilabtin alidighan tejribe-sawaqlar toghrisida toxtaldi.

Doktor erkin ekrem ependi mundaq dédi: “Hörmetlik siyasiy partiye mes'ulliri, muxbirlar, eziz yurtdashlar! barin inqilabi bizning 138 yilliq milliy azadliq kürishimizning bir parchisidur. 138 Yildin buyan sherqiy türkistan zéminining hemmila yérige shéhitlirimizning qéni töküldi. Buningdin shuni körüwalalaymizki, manjular 1884-yili sherqiy türkistanni bésiwalghan kündin tartip, Uyghur xelqi öz zéminini qayturup élish üchün tinmay küresh qilghan. 1949-Yilidin kéyin, weten dewayimiz xelq'aragha yüzlinishke bashlandi. Bügün sherqiy türkistan dewasi xelq'aralashti. Hazir dunyada 300 etrapida erkinlik kürishi élip bériwatqan milletler bar, Uyghurlar bu milletlerning ichide aldinqi 5 ning biri bolup turmaqta. Biz bu sewiyge asan kelmiduq. Bularning hemmisi millitimizning tirishchanliqi we allahning yardimi bilen boldi. Bizning meqsitimiz bundin kéyin bu dewayimizni téximu yuquri pellige kötürüshtin ibaret.”

“Iyi” partiyesi istanbul shöbisining re'isi boghra qawunju ependi mundaq dédi: “Partiyemiz qurulghan kündin buyan, sherqiy türkistanliqlarni qollap kéliwatidu, bundin kéyinmu qollaymiz. Partiyemizning hakimiyet béshigha kélishige az qaldi. Biz sherqiy türkistan xelqi erkinlikige érishküche qollashni dawam qilimiz, eng axirida barliq sherqiy türkistan xelqining ramazan éyini tebrikleymen!”

Arqidin démokratiye partiyesi istanbul shöbisining re'isi ekrem er'ay arda ependi söz qilip, mundaq dédi: “2021-Yilining béshida partiyemizning re'isi ünsal güntekin ependi sherqiy türkistan mesilisini parlaméntta otturigha qoyghan idi. Partiyemiz dawamliq sherqiy türkistan mesilisini qollap kéliwatidu. Biz xitaydin menpe'et élishning koyida emes, belki Uyghur qérindashlirimizning derdige derman bolushning derdide. Biz her da'im silerning yéninglarda bolimiz. Hemminglarning ramazan éyinglargha mubarek bolsun!”

Andin kéyin nöwette türkiyeni idare qiliwatqan adalet we tereqqiyat partiyesining istanbuldiki mes'uli güljan keskin xanim söz qildi. U mundaq dédi: “Hörmetlik prézidéntimiz rejep tayyip erdoghan bilen partiyemizning istanbul shöbisining bashliqi osman qabaqtepe ependi silerge salam éytti. Dunya Uyghur qurultiyi wexpisi bizni teklip qilghanliqi üchün rehmet éytimiz. Dunyada zulum tartiwatqan barliq qérindashlirimizning zulumdin baldurraq qutulushini tileymen!”

Yighinda yene Uyghur akadémiyesi wexpisining re'isi doktor perhat qurban tengritaghli ependi, sherqiy türkistan teshkilatlar birlikining re'isi hidayetullah oghuzxan ependi, sherqiy türkistn ölimalar birlikining re'isi doktor atawullah shahyar ependi qatarliqlarmu söz qilip, barin inqilabi we Uyghurlarning hazirqi ehwali toghrisida pikir bayan qildi.

Biz yighin axirlashqandin kéyin mikrofonimizni d u q wexpisining re'isi abdureshit abdulxemit ependige uzattuq. U mezkur pa'aliyetning nahayiti janliq we tesirlik ötkenlikini bayan qildi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.