Ezerbeyjanning paytexti baku bilen türkiyening konya sheherliride 5-aprél barin shéhitlirini xatirilesh pa'aliyiti ötküzüldi

Ixtiyariy muxbirimiz erkin tarim
2021-04-06
Share
Ezerbeyjanning paytexti baku bilen türkiyening konya sheherliride 5-aprél barin shéhitlirini xatirilesh pa'aliyiti ötküzüldi Barin inqilabining 31 yilliqi munasiwiti bilen ezerbeyjanning paytexti baku shehiridiki xitay elchixanisining aldida namayish ötküzüldi. 2021-Yili 5-aprél.
RFA/Erkin Tarim

5-Aprél küni barin inqilabining 31 yilliqi munasiwiti bilen ezerbeyjanning paytexti baku shehiridiki xitay elchixanisining aldida namayish ötküzüldi. Türkiyening konya shehiride resim körgezmisi échildi. Ezerbeyjan penler akadémiyesi mutexessisi, ezerbeyjan herikiti teshkilatining mes'uli yasemin muhammet xanim bashchiliqidiki bir guruppa kishi xitay elchixanisining aldigha qara gül qoyghan. Yasemin xanim qara gülning shéhitlerning simwoli ikenlikini tekitlidi. 6-Aprél küni bolsa türkiyening tarixiy shehiri bolghan konya shehiride süretler körgezmisi échilghan. Abdulexet udun ependining éytishiche mezkur körgezmige türk xelqining qiziqishi yuqiri bolghan.

Yasemin muhammet xanim xitayning bakuda turushluq elchixanisining aldida naraziliq namayishi ötküzüshidiki meqsiti heqqide toxtilip mundaq dédi: "Men ezerbeyjan penler akadémiyesi ezasi we ezerbeyjan herikiti teshkilatining re'isi bolush süpitim bilen bir guruppa dostlirim bilen birlikte xitay elchixanisining aldida naraziliq namayishi ötküzduq. Meqsitimiz xitayning sherqiy türkistanliqlargha élip bériwatqan irqiy qirghinchiliqigha naraziliq bildürüsh we ezerbeyjan axbaratining diqqitini sherqiy türkistan mesilisige tartishtin, shu arqiliq jama'et pikiri toplash idi. Bu pa'aliyitimizge ezerbeyjan axbaratliridimu orun bérildi".

U, ezerbeyjanda Uyghurlargha hésdashliq qilidighanlarning sanining künsayin köpiyiwatqanliqini ilgiri sürdi.

6-Aprél küni barin inqilabini xatirilesh xitayning hazirqi bésim siyasitige naraziliq bildürüsh üchün türkiyening tarixiy sheherliridin biri bolghan konya shehiride süretler körgezmisi ötküzüldi.

Barin-Inqilabi-Konya-Namayish-20210406-01.jpeg
Barin inqilabining 31 yilliqi munasiwiti bilen türkiyening tarixiy shehiri bolghan konya shehiride échilghan süretler körgezmisidin bir körünüsh . 2021-Yili 6-aprél.

Bu qétimliq körgezmini sherqiy türkistan teshkilatlar birlikining orunlashturushi bilen sultan satuq bughraxan wexpining konya shöbisi mes'uli abdulexet udun uyushturghan bolup, mezkur körgezmini konyadiki türk ammiwi teshkilat mes'ulliri, bezi siyasiy partiyelerning mes'ulliri we xelqtin bolup köp sanda kishi ékskursiye qilghan.

Barin-Inqilabi-Konya-Namayish-20210406-02.jpeg
Barin inqilabining 31 yilliqi munasiwiti bilen türkiyening tarixiy shehiri bolghan konya shehiride échilghan süretler körgezmisidin bir körünüsh . 2021-Yili 6-aprél.

Abdulexet udun ependi bu pa'aliyetni "Barin qirghinchiliqining 31 yilliqini xatirilesh we sherqiy türkistandiki zulum" témisida ikki kün ötküzülidighanliqini bayan qildi.

Abdulexet udun ependi bu qétimqi süretler körgezmiside 3 xil témida süret qoyghanliqini türk xelqining qiziqip ékskursiye qiliwatqanliqini bayan qildi.

Konya türkiyening ottura rayonigha jaylashqan bolup, bu shehirige 2015-yilidin kéyin Uyghurlar kélip olturaqlishishqa bashlan'ghan. Hazir konyada 100 a'ile Uyghur we 50 etrapida Uyghur oqughuchi bar iken.

5-Aprél barin weqesi shéhitlirini eslesh we Uyghurlarning éghir weziyitini anglitish pa'aliyiti düshenbe küni türkiyening istanbuldiki beyazit meydani bilen istanbuldiki xitay konsulxanisi aldida, shundaqla kastomunu we qahramanmarash qatarliq sheherliridimu ötküzülgenidi.

Ezerbeyjan paytexti bakudiki xitay elchixanisi aldida bir guruppa ezerbeyjan ziyaliylirining Uyghurlarni qollap, xitaygha naraziliq bildürüp namayishi ötküzishi tunji qétim hésablinidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet