Баварийә иқтисад вә енергийә министирлиқи бинаси алдида намайиш өткүзүлди

Ихтиярий мухбиримиз әкрәм
2021-04-30
Share

28-Апрел германийәниң мюнхен шәһиридики баварийә иқтисад вә енергийә министирлиқи бинаси алдида намайиш өткүзүлди.

Дуня уйғур қурултийи, хәтәр астидики хәлқләрни қоғдаш тәшкилати, явропа шәрқий түркистан бирлики һәм илһам тохти институти бирликтә 28-апрел германийәниң мюнхен шәһиридики баварийә иқтисад вә енергийә министирлиқи бинаси алдида намайиш өткүзгән.

Мәзкур намайиш германийә баш министири анҗила мәркил билән хитай баш министири ли кечаң оттурисида 28-апрел өткүзүлгән икки тәрәпниң 6-нөвәтлик юқири дәриҗиликләр сөһбити мәзгилигә орунлаштурулған. Сөһбәттин бир күн бурун, йәни 27-апрел д у қ баянат елан қилип, анҗила мәркилдин икки тәрәп сөһбити әснасида қирғинчилиққа учраватқан уйғурлар мәсилисини күнтәртипкә қоюшни тәләп қилғаниди.

28-Апрел өткүзүлгән намайишниң мәқсити һәққидә д у қ рәиси долқун әйса әпәндиниң бүгүн зияритимизни қобул қилип билдүрүшичә, хитайниң мюнхендики консулханиси бу қетимқи баһар байримини қутлуқлаш мурасимиға баварийәниң бәзи муһим сиясий әрбаблириниму тәклип қилған. Бу қетимқи намайишниң муһим мәқсәтлириниң бири, уйғурлар учраватқан қирғинчилиқларға бипәрва һалда хитайниң баһар байримиға қатнашмақчи болған баварийәниң һөкүмәт қатлимидики сиясәтчилиригә наразилиқ билдүрүш болған.

Намайишта д у қ, хәтәр астидики хәлқләрни қоғдаш тәшкилати, явропа шәрқий түркистан бирлики һәм илһам тохти институтиниң рәһбәрлири айрим-айрим һалда нутуқлар сөзләп, хитайниң уйғурлар үстидин елип бериватқан бастуруш сиясәтлирини қаттиқ тәнқид қилған. Бу қетимқи намайишни уюштурушқа қатнашқан явропа шәрқий түркистан бирлики тәшкилатиниң рәиси әсқәрҗан әпәндиму мәзкур намайишниң мәқсәтлири тоғрисида өз қарашлирини ипадә қилди.

Намайиш җәрянида илһам тохтиға ярдәм горупписиниң рәиси әнвәрҗан әпәндиму нутуқ сөзләп, хитайниң шәрқий түркистанда елип бериватқан бастуруш сиясәтлирини әйипләш билән биргә, германийә һөкүмәт даирилириниң уйғурлар үстидин ирқий қирғинчилиқ елип бериватқан хитайлар билән һәмкарлашмаслиқини тәләп қилған.

Д у қ ниң рәис вәкили, "шәрқий түркистан өлималар бирлики" ниң муавин рәиси турғунҗан алавуден әпәндиму 28-апрел өткүзүлгән намайишқа иштирак қилған болуп, уму бу қетимқи намайиш тоғрисида қисқичә пикир баян қилип өтти. Д у қ фондиниң рәиси абдуҗелил әмәт әпәндиму бу һәқтә тәсиратлирини изһар қилип, намайишниң яхши өткәнликини тилға алди.

Намайиш 28-апрел чүштин кейин саәт 3:30 дин 6:30 ғичә 3 саәт давамлашқан. Намайишчилар ай юлтузлуқ көк байрақларни һәм хитайниң ирқий қирғинчилиқ җинайәтлирини әйибләш, җаза лагерлирини тақаш, мәҗбурий әмгәкни бикар қилиш, германийәниң хитай билән болған иқтисадий һәмкарлиқиға наразилиқ билдүрүш қатарлиқ мәзмунлар асас қилинған түрлүк лозункиларни көтүрүп намайиш қилған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт