Bawariye iqtisad we énérgiye ministirliqi binasi aldida namayish ötküzüldi

28-Aprél gérmaniyening myunxén shehiridiki bawariye iqtisad we énérgiye ministirliqi binasi aldida namayish ötküzüldi.

Dunya Uyghur qurultiyi, xeter astidiki xelqlerni qoghdash teshkilati, yawropa sherqiy türkistan birliki hem ilham toxti instituti birlikte 28-aprél gérmaniyening myunxén shehiridiki bawariye iqtisad we énérgiye ministirliqi binasi aldida namayish ötküzgen.

Mezkur namayish gérmaniye bash ministiri anjila merkil bilen xitay bash ministiri li kéchang otturisida 28-aprél ötküzülgen ikki terepning 6-nöwetlik yuqiri derijilikler söhbiti mezgilige orunlashturulghan. Söhbettin bir kün burun, yeni 27-aprél d u q bayanat élan qilip, anjila merkildin ikki terep söhbiti esnasida qirghinchiliqqa uchrawatqan Uyghurlar mesilisini küntertipke qoyushni telep qilghanidi.

28-Aprél ötküzülgen namayishning meqsiti heqqide d u q re'isi dolqun eysa ependining bügün ziyaritimizni qobul qilip bildürüshiche, xitayning myunxéndiki konsulxanisi bu qétimqi bahar bayrimini qutluqlash murasimigha bawariyening bezi muhim siyasiy erbablirinimu teklip qilghan. Bu qétimqi namayishning muhim meqsetlirining biri, Uyghurlar uchrawatqan qirghinchiliqlargha biperwa halda xitayning bahar bayrimigha qatnashmaqchi bolghan bawariyening hökümet qatlimidiki siyasetchilirige naraziliq bildürüsh bolghan.

Namayishta d u q, xeter astidiki xelqlerni qoghdash teshkilati, yawropa sherqiy türkistan birliki hem ilham toxti institutining rehberliri ayrim-ayrim halda nutuqlar sözlep, xitayning Uyghurlar üstidin élip bériwatqan basturush siyasetlirini qattiq tenqid qilghan. Bu qétimqi namayishni uyushturushqa qatnashqan yawropa sherqiy türkistan birliki teshkilatining re'isi esqerjan ependimu mezkur namayishning meqsetliri toghrisida öz qarashlirini ipade qildi.

Namayish jeryanida ilham toxtigha yardem goruppisining re'isi enwerjan ependimu nutuq sözlep, xitayning sherqiy türkistanda élip bériwatqan basturush siyasetlirini eyiplesh bilen birge, gérmaniye hökümet da'irilirining Uyghurlar üstidin irqiy qirghinchiliq élip bériwatqan xitaylar bilen hemkarlashmasliqini telep qilghan.

D u q ning re'is wekili, “Sherqiy türkistan ölimalar birliki” ning mu'awin re'isi turghunjan alawudén ependimu 28-aprél ötküzülgen namayishqa ishtirak qilghan bolup, umu bu qétimqi namayish toghrisida qisqiche pikir bayan qilip ötti. D u q fondining re'isi abdujélil emet ependimu bu heqte tesiratlirini izhar qilip, namayishning yaxshi ötkenlikini tilgha aldi.

Namayish 28-aprél chüshtin kéyin sa'et 3:30 din 6:30 ghiche 3 sa'et dawamlashqan. Namayishchilar ay yultuzluq kök bayraqlarni hem xitayning irqiy qirghinchiliq jinayetlirini eyiblesh, jaza lagérlirini taqash, mejburiy emgekni bikar qilish, gérmaniyening xitay bilen bolghan iqtisadiy hemkarliqigha naraziliq bildürüsh qatarliq mezmunlar asas qilin'ghan türlük lozunkilarni kötürüp namayish qilghan.