Җәнвәдики б д т бинаси алдида хитайға қарши фото сүрәтләр көргәзмиси башланди

Ихтиярий мухбиримиз әкрәм
2020-02-24
Елхәт
Пикир
Share
Принт
Б д т бинаси алдида елип бериливатқан җаза лагерлири вә уйғурларниң нөвәттики вәзийитини тонуштуруш мәқсәт қилинған фото сүрәтләр көргәзмисидин бир көрүнүш. 2020-Йили, 24-феврал. Җәнвә.
Б д т бинаси алдида елип бериливатқан җаза лагерлири вә уйғурларниң нөвәттики вәзийитини тонуштуруш мәқсәт қилинған фото сүрәтләр көргәзмисидин бир көрүнүш. 2020-Йили, 24-феврал. Җәнвә.
RFA/Ekrem

2-Айниң 24-күни б д т кишилик һоқуқ кеңишиниң 43-нөвәтлик омумий йиғини җәнвәдә башланған. 200 Гә йеқин дөләт вә районниң вәкиллири қатнишидиған, 3 һәптә давам қилидиған бу йиғинда дуняниң һәрқайси җайлиридики кишилик һоқуқ дәпсәндичилики мәсилилири көздин көчүрилидикән. Д у қ йиғин башланған күнгә үлгүртүп б д т бинаси алдидики чоң сәйнаға «әркинлик чедири» тикип, фото сүрәтләр көргәзмиси арқилиқ җаза лагерлири вә уйғурларниң нөвәттики вәзийитини тонуштуруш паалийитини рәсмий башлиған.

Нәқ мәйдандин игилигән учурларға қариғанда, б д т бинаси алдидики 80 квадират метир келидиған бу чедир 23-феврал күни кәчкичә қураштуруп чиқилған. Чедирниң тамлири җаза лагерлириға мунасивәтлик көрүнүшләр, шуарлар, хитаплар вә шәрқий түркистанниң ай-юлтузлуқ көк байрақлири билән безәлгән. Чедир ичигә тутқундики уйғурларға аит сүрәтләр, уйғур миллий кимликини намайән қилидиған түрлүк миллий буюмлар, хитайниң мәсчитләрни чеқиш һәм миллий мәдәнийәтләрниң изини өчүрүш қилмишлириға аит сүрәтләр тизилған. 

Бу паалийәткә д у қ бир қанчә айдин буян тәйярлиқ қилған болуп, шиветсарийәдики уйғурлардин сирт америка, түркийә, шиветсийә, голландийә, норвегийә, германийә қатарлиқ әлләрдин кәлгән уйғурларму униңға иштирак қилған. 

Биз бүгүн нәқ мәйданда паалийәт елип бериватқан бир қисим уйғурларни зиярәт қилдуқ. Германийәдин келип бу паалийәткә қатнашқан д у қ ниң рәис вәкили, «шәрқий түркистан өлималар бирлики» ниң муавин рәиси турғунҗан алавудун әпәнди бу һәқтә бизни бәзи учурлар билән тәминлиди. Шиветсарийәниң җәнвә шәһиридә яшайдиған турсунҗан тохти әпәнди бу «әркинлик чедири» ни оңушлуқ қуруп чиққанлиқини әскәртти. Норвегийәдин келип бу паалийәткә қатнашқан «норвегийә уйғур комитети» ниң рәиси, «уйғур әдлийә архипи амбири» ниң мәсули бәхтияр өмәр әпәндиму бу қетимқи паалийәт һәққидә өз қарашлирини оттуриға қоюп өтти. Германийәдин кәлгән уйғур җамаәт әрбаби аблимит турсун әпәнди бу сүрәтләр көргәзмиси арқилиқ җаза лагерлиридики уйғурларниң зарини дуняға аңлитишқа тиришиватқанлиқини тилға алди. Голландийә уйғур җәмийитиниң рәиси яшар әпәндиму өз тәсиратини баян қилип өтти.

«Әркинлик чедири» арқилиқ уйғурларниң авазини дуняға аңлитиш паалийити б д т бинаси алдида 1 һәптә давам қилидиған болуп, д у қ рәиси долқун әйса әпәнди бу мунасивәт билән зияритимизни қобул қилғанда бу паалийәт арқилиқ йәтмәкчи болған мәқсәтләр һәққидә тохталди. 

Д у қ уюштурған бу қетимқи «әркинлик чедири» да син көрүнүшлири һәм фото сүрәтләр көргәзмиси арқилиқ уйғурларниң авазини дуняға аңлитиш паалийитини бир қисим пидакар уйғурлар маддий һәм мәнивий җәһәттин қоллиған.

Пикирләр (0)
Share
Толуқ бәт