Jenwediki b d t binasi aldida xitaygha qarshi foto süretler körgezmisi bashlandi

Ixtiyariy muxbirimiz ekrem
2020-02-24
Share
BDT-FOTO-KOGRGEZME-2020-01.jpg B d t binasi aldida élip bériliwatqan jaza lagérliri we Uyghurlarning nöwettiki weziyitini tonushturush meqset qilin'ghan foto süretler körgezmisidin bir körünüsh. 2020-Yili, 24-féwral. Jenwe.
RFA/Ekrem

2-Ayning 24-küni b d t kishilik hoquq kéngishining 43-nöwetlik omumiy yighini jenwede bashlan'ghan. 200 Ge yéqin dölet we rayonning wekilliri qatnishidighan, 3 hepte dawam qilidighan bu yighinda dunyaning herqaysi jayliridiki kishilik hoquq depsendichiliki mesililiri közdin köchürilidiken. D u q yighin bashlan'ghan kün'ge ülgürtüp b d t binasi aldidiki chong seynagha “Erkinlik chédiri” tikip, foto süretler körgezmisi arqiliq jaza lagérliri we Uyghurlarning nöwettiki weziyitini tonushturush pa'aliyitini resmiy bashlighan.

Neq meydandin igiligen uchurlargha qarighanda, b d t binasi aldidiki 80 kwadirat métir kélidighan bu chédir 23-féwral küni kechkiche qurashturup chiqilghan. Chédirning tamliri jaza lagérlirigha munasiwetlik körünüshler, shu'arlar, xitaplar we sherqiy türkistanning ay-yultuzluq kök bayraqliri bilen bézelgen. Chédir ichige tutqundiki Uyghurlargha a'it süretler, Uyghur milliy kimlikini namayen qilidighan türlük milliy buyumlar, xitayning meschitlerni chéqish hem milliy medeniyetlerning izini öchürüsh qilmishlirigha a'it süretler tizilghan. 

Bu pa'aliyetke d u q bir qanche aydin buyan teyyarliq qilghan bolup, shiwétsariyediki Uyghurlardin sirt amérika, türkiye, shiwétsiye, gollandiye, norwégiye, gérmaniye qatarliq ellerdin kelgen Uyghurlarmu uninggha ishtirak qilghan. 

Biz bügün neq meydanda pa'aliyet élip bériwatqan bir qisim Uyghurlarni ziyaret qilduq. Gérmaniyedin kélip bu pa'aliyetke qatnashqan d u q ning re'is wekili, “Sherqiy türkistan ölimalar birliki” ning mu'awin re'isi turghunjan alawudun ependi bu heqte bizni bezi uchurlar bilen teminlidi. Shiwétsariyening jenwe shehiride yashaydighan tursunjan toxti ependi bu “Erkinlik chédiri” ni ongushluq qurup chiqqanliqini eskertti. Norwégiyedin kélip bu pa'aliyetke qatnashqan “Norwégiye Uyghur komitéti” ning re'isi, “Uyghur edliye arxipi ambiri” ning mes'uli bextiyar ömer ependimu bu qétimqi pa'aliyet heqqide öz qarashlirini otturigha qoyup ötti. Gérmaniyedin kelgen Uyghur jama'et erbabi ablimit tursun ependi bu süretler körgezmisi arqiliq jaza lagérliridiki Uyghurlarning zarini dunyagha anglitishqa tirishiwatqanliqini tilgha aldi. Gollandiye Uyghur jem'iyitining re'isi yashar ependimu öz tesiratini bayan qilip ötti.

“Erkinlik chédiri” arqiliq Uyghurlarning awazini dunyagha anglitish pa'aliyiti b d t binasi aldida 1 hepte dawam qilidighan bolup, d u q re'isi dolqun eysa ependi bu munasiwet bilen ziyaritimizni qobul qilghanda bu pa'aliyet arqiliq yetmekchi bolghan meqsetler heqqide toxtaldi. 

D u q uyushturghan bu qétimqi “Erkinlik chédiri” da sin körünüshliri hem foto süretler körgezmisi arqiliq Uyghurlarning awazini dunyagha anglitish pa'aliyitini bir qisim pidakar Uyghurlar maddiy hem meniwiy jehettin qollighan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet