Б д т да "вухән вируси" ниң лагерларға тарқилиш хәвпи вә җаза лагерлири мәсилиси аңлитилди

Ихтиярий мухбиримиз әкрәм
2020-02-14
Share
BDT-Lager-Wuxen-Wirus-Xewpi-02.jpeg Д у қ рәиси долқун әйса әпәндим американиң б д т дики баш әлчиси брәмбәрг әпәнди билән биргә. 2020-Йили 11-феврал. Җәнвә.
RFA/Ekrem

Җәнвәдин игилигән учурларға асасланғанда, 2-айниң 9-күнидин 13-күнигичә д у қ рәиси долқун әйса, қурултай фондиниң мудири абдуҗелил әмәт, қурултайниң ишхана мудири зумрәт уйғур, қурултайниң берлиндики ишханисиниң мудири ева ханим һәмдә қурултай тәркибидики "белгийә уйғур җәмийити" ниң рәиси яшар қатарлиқлардин тәркиб тапқан бир вәкилләр өмики б д т да җаза лагерлири мәсилисини аңлитиш, "вухән вируси" ниң лагерларға тарқилиш хәвпи тоғрисида б д т хадимлирини агаһландурушни асасий мәзмун қилған бир йүрүш паалийәтләрни елип барған.

Д у қ вәкиллириниң бу зиярити б д т кишилик һоқуқ кеңишиниң 43-нөвәтлик йиғини чақирилишқа икки һәптә қалған бир пәйткә орунлаштурулған болуп, долқун әйса әпәнди тәминлигән мәлуматларға қариғанда, уйғур вәкиллири бу бир һәптә җәрянида 30 дин артуқ дөләтниң б д т дики әлчилири билән көрүшүп, уйғурлар мәсилиси үстидә сөһбәтләр елип барған. 

Мәзкур паалийәткә иштирак қилған д у қ фондиниң мудири абдуҗелил әмәт әпәндиниң билдүришичә, б д т дики уйғурларни қобул қилған көплигән дөләтләрниң әлчилири уйғур вәкиллириниң сөзлиригә етибар билән қариған вә өзлириниң уйғурларниң нөвәттики еғир вәзийитигә қарита һессидашлиқлирини ипадә қилишқан. 

Бу паалийәткә д у қ ниң ишхана мудири зумрәт уйғурму қатнашқан болуп, униң баян қилишичә, б д т дики бу учришишларда һәрқайсий дөләтләрниң әлчилиригә "вухән вируси" ниң җаза лагерлириға тарқилиш хәвпи вә буниң нәтиҗисидә келип чиқидиған яман ақивәтләр тоғрисидиму мәлуматлар берилгән һәмдә буниң алдини елиш үчүн һәрқайсий дөләтләрниң ярдими тәләп қилинған.

Д у қ тәркибидики "белгийә уйғур җәмийити" ниң рәиси яшарму зияритимизни қобул қилип бу бир һәптилик паалийәтләрниң наһайити нәтиҗилик, тәсирлик өткәнликини тәкитлиди. У сөзидә бу бир һәптилик паалийәт җәрянида учрашқан һәрқайси дөләтләрниң б д т дики әлчилиригә хитайниң чәтәлләргә узарған қоли вә муһаҗирәттики уйғур сиясий паалийәтчилиригә қиливатқан зиянкәшликлири тоғрисидиму мәлуматлар берип өткәнликини тилға алди.

Долқун әйса әпәндиниң билдүришичә, 2-айниң 24-күни б д т кишилик һоқуқ кеңишиниң 43-нөвәтлик йиғини башлиниши биләнла д у қ ниң бир гуруппа вәкиллири қайтидин җәнвәгә йетип келип, б д т ниң бинаси алдида чоң бир чедир қуруп җаза лагерлириға мунасивәтлик сүрәтләр көргәзмиси өткүзидикән. Бу паалийәт бир һәптидин артуқ давам қилидикән.
Абдуҗелил әмәт әпәнди б д т бинаси алдида өткүзилидиған бу көлими зор сүрәтләр көргәзмисигә 100 гә йеқин дөләтниң әлчилирини тәклип қилғанлиқини тилға алди. Долқун әйса әпәнди дуняниң һәрқайсий әллиридики шараити яр бәргән уйғурларниң бу паалийәткә келип қатнишишини тәшәббус қилди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт