Perzentliridin xewer alalmighan 5 Uyghur ayal b d t gha telep sundi

Ixtiyariy muxbirimiz arslan
2021-03-24
Share
Baliliri üchün enqerege qarap yolgha chiqqan anilar saqchilar teripidin istanbulgha qayturuwétildi 8-Mart ayallar bayrimi küni yillardin buyan perzenitliri heqqide uchur alalmaywatqan birqisim anilar istanbuldin enqerege piyade méngip bérip türkiye hökümitige awazini anglitishni meqset qilghan. 2021-Yili 8-mart. Türkiye.
RFA/Ehsan

Istanbuldin enqerege piyade yürüp yétip barghan 5 neper Uyghur ayal özlirining yurtlirida qalghan, 5 yildin buyan alaqe qilalmighan we héchqandaq uchur alalmighan perzentlirining iz-dérikini élip bérishni telep qilip, birleshken döletler teshkilati tereqqiyat programmisining enqerediki ishxanisigha iltimas sun'ghan.

Bu besh ayalning biri bolghan qelbinur tursunning bildürüshiche, birleshken döletler teshkilati tereqqiyat programmisining enqerediki shöbe emeldarliri bir hepte ichide jawab béridighanliqini bildürgen.

22-Mart düshenbe küni Uyghur ayallar birleshken döletler teshkilati tereqqiyat programmisining enqerediki ishxanisi aldida axbarat élan qilish yighini uyushturghan. Axbarat élan qilish yighinigha türkiyening anadolu agéntliqi we gérmaniyening téléwéiziye qanili bolup, bir qanche axbarat organlirining muxbirliri qatnashqan.

Axbarat élan qilish yighinida söz qilghan reyhan exmet xanim özining 18 yashtin kichik balliridin besh yildin buyan héchqandaq xewer alalmighanliqini bildürdi. Reyhan xanim 2016-yili türkiyege qanunluq yollar bilen kelgen bolup, hayati boyiche héchqandaq döletning qanunigha xilapliq ish qilip baqmighanliqini bildürdi. U: "Men peqet bir ana süpitide yashashni xalaymen. Öz balamning awazini anglashni xalaymen. 5 Yildin buyan türkiyede yashawatimiz, biraq yurtimizda qalghan 8-9 yashliq ballirimizdin xewer alalmiduq. Biz anilar üchün bu ehwal bek éghir kéliwatidu. Ata-anisi yénida bolmighan bigunah mesum ballirimiz qeyerde, qandaq bir hayat yashawatidu? buni bilmeymiz," dédi.

Reyhan xanim 3 yildin buyan ballirini sürüshte qilip qanuniy yollar arqiliq iltimas sunup kéliwatqanliqini, xitayning istanbuldiki konsolxanisigha iltimas sun'ghanliqini, biraq héchqandaq bir shekilde jawabqa érishelmigenlikini bildürdi.

Reyhan xanim dunya jama'itini yardemge chaqirip mundaq dédi: "Ballirimizdin ayrilip qalduq, bizningmu bashqa insanlargha oxshash ballirimizning awazini anglash, ular bilen birge yashash heqqimiz yoqmu? pütkül dunyadiki insanlardin, kishilik hoquq qoghdughuchiliridin, ayallarning heq-hoquqlirini qoghdughuchilardin, b d t musapirlarni qoghdash kishilik hoquq komitétidin, pütün dölet rehberliridin, dunyadiki pütkül anilardin yardem telep qilimiz. Ulardin ige-chaqisiz, yalghuz qalghan balilirimizgha yardem qilishini, héch bolmighanda balilirimizning awazini anglashqa, ularning hayat yashawatqanliqining xewirini uqishimizgha yardem qilishlirini telep qilimiz."

Enqerediki axbarat élan qilish jeryanida amine muhemmed isimlik bir ayalning ehwali tuyuqsiz özgirip, yerge yiqilip chüshken. Qelbinur xanim, amine xanimning balilirining derdide bir qanche qétim mushundaq tuyuqsiz es-hushini yoqitip yiqilip chüshkenlikini, emma hazir ehwalining yaxshi ikenlikini bildürdi.

Qelbinur tursun xanim enqerege kélishtiki meqsiti toghrisida toxtilip, özlirining balilirining iz-dérikini élish üchün yalghuz türkiyening hökümet rehberliri bilenla emes, belki amérika, en'giliye, gérmaniye qatarliq döletlerning enqerediki elchixanilirigha yardem telep qilip iltimas sunush üchün istanbuldin enqerege kelgenlikini, shu qatarda b d t ning enqerediki ishxanisighimu iltimas sun'ghanliqini bildürdi.

Bir qanche yillardin buyan perzentlirining iz-dérikini alalmighan bu Uyghur anilar 25-mart küni xitay tashqiy ishlar ministéri wang yi enqerege kelgende balilirini sorüshte qilidighanliqini tekitlidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet