1997-يىلى 5-فېۋرال كۈنى يۈز بەرگەن غۇلجا ياشلىرىنىڭ نارازىلىق نامايىشىنىڭ خىتاي قوراللىق كۈچلىرى تەرىپىدىن باستۇرۇلغانلىقىنىڭ 28-يىللىقىنى خاتىرىلەش ۋە ھازىر داۋاملىشىۋاتقان ئۇيغۇر ئىرقىي قىرغىنچىلىقىنى تونۇشتۇرۇش مەقسەت قىلىنغان نامايىش 8-فېۋرال، بېلگىيە پايتەختى بىريۇسسېلنىڭ شەھەر مەركىزىدە ئېلىپ بېرىلغان.
نامايىش جەريانىدا بېلگىيە ئۇيغۇر جەمئىيىتى يەنە خىتاي قوراللىق كۈچلىرى ۋە ساقچىلىرىنىڭ 5-فېۋرال كۈنىدىكى باستۇرۇشى، تۇتقۇن قىلىشىنى ئىپادىلەيدىغان تۈرلۈك سۈرەتلەرنى ۋە پىلاكاتلارنى تىزغان بولۇپ، نامايىش مەيدانىغا تىزىلغان بۇ سۈرەتلەرنى كۆرگەن ساياھەتچىلەر ۋە بېلگىيەلىكلەر نامايىشچىلاردىن سوئاللارنى سوراشقان. دۇنيا ئۇيغۇر قۇرۇلتىيى ئىچكى ئىشلار كومىتېتى مۇدىرى ۋە بېلگىيە ئۇيغۇر جەمئىيىتى رەئىسى ئەكبەر تۇرسۇن بۇ نامايىش ھەققىدىكى تەپسىلاتلارنى ئورتاقلاشتى.
نامايىشچىلار يەنە تەشۋىقات ماتېرىياللىرى تارقىتىشقان. بۇ قېتىمقى نامايىشقا بېلگىيە پايتەختى بىريۇسسېل ۋە ئۇنىڭ ئەتراپىدا ياشايدىغان ئۇيغۇرلار قاتناشقان بولۇپ، بېلگىيە ئۇيغۇر جەمئىيىتىدىن غەيرەت ئەپەندىمۇ بۇ نامايىش ھەققىدە قىسقىچە ئۆزىنىڭ ھېسسىياتىنى ئورتاقلاشتى.
نامايىشچىلار: «ئۇيغۇرلارغا ئەركىنلىك»، «ياشىسۇن مۇستەقىللىق»، «خىتاي شەرقىي تۈركىستاندىن يوقال»، «شەرقىي تۈركىستانغا ھۆرىيەت» دېگەندەك شوئارلارنى توۋلاشقان. بەزى ساياھەتچىلەر ۋە يەرلىكلەر ئۇيغۇر ئىرقىي قىرغىنچىلىقىنىڭ يېقىنقى زاماندىكى ئەڭ پاجىئەلىك بىر نامايەندىسى بولغان غۇلجا قىرغىنچىلىقى ھەققىدە ۋە ئۇيغۇرلارنىڭ نۆۋەتتىكى ئەھۋالى ھەققىدە خەۋەرلەردىن كۆرگەن-بىلگەنلىرىنى بىر-بىرىگە چۈشەندۈرۈپ نامايىشچىلارنىڭ يېنىدا نامايىش تۈگىگىچە بىرگە تۇرۇپ مەدەت بېرىشكەن.
