Saghlamliq yétekchisi bextiyar sadirning tutqun qilin'ghanda éghir késel ikenliki ashkarilandi

Saghlamliq yétekchisi bextiyar sadirning tutqunda ikenliki heqqidiki xewirimiz bérilgendin kéyin, uning shiwétsiyediki ikki qérindishi, uni qamaqtin qutuldurush üchün qolidin  kélidighan barliq tirishchanliqini körsitishke atlan'ghan. Ular aldi bilen bu ehwalni shiwétsiyediki alaqidar organlargha yetküzüp, bexitiyar  sadirni qutuldurush üchün yardem telep qilghan. Birqanche kündin buyanqi éniqlashlardin melum bolushiche, bextiyar sadir 13 ‏-öktebir küni  éghir késel halette öyidin tutup kétilgen. 

Töwende muxbirimiz shöhret hoshurning bu heqte teyyarlighan programmisi diqqitinglarda bolidu.

Kichik waqtida bir qoli köyüp kétip méyip bolup qalghan bextiyar sadirning kélechiki tebi'iy halda  mezkur a'ilining chong bir ghem-endishisige aylan'ghan. Oylimighan yerdin, bextiyar sadir zérekliki, tirishchanliqi, bolupmu natiqliqi bilen saghlamliq saheside  jem'iyette utuq qazan'ghan kishiler qatarigha ötüp belgilik igilik tikligen. A'ile we jem'iyetke éghiri chüshüsh emes, eksiche, jem'iyette yüzligen yashlarni ish bilen teminlep jem'iyetning yükini yenggilletken.

Shunga seydijan sadir bilen minewer sadir2012 -yili chet'elge chiqip ketkende, bu méyip qérindishini yalghuz qaldurushtin endishe qilmighan. Peqet2017-yili chong tutqun bashlan'ghanda, rayondiki siyasiy boran-chapqun chong-kichik,  yash-qéri, ajiz-küchlük perqlendürmestin zerbe bérip mangghachqa, ajiz qérindishining bixeterlikini közde tutup, ular  shiwétsiyede élip bériliwatqan xitaygha qarshi pa'aliyetlerdin özlirini tartqan.

Ular bu özini tartishning we qérindishi bextiyarning éhtiyatchanliqining qilche  kargha kelmigenlikini, yeni uning tutqun qilin'ghanliqini radiyomiz arqiliq uqqandin kéyin  qérindishini qutquzushning qolidin kélidighan charliri üstide izden'gen.

Bular bir tereptin, alaqidar xelq'ara axbarat organlirigha ehwalni melum qilsa, yene bir tereptin, shiwétsiyening béyjingdiki elchixanisi, shiwétsiye tashqi ishlar ministiri, shiwétsiye parlaménti qatarliq orunlargha mektup yollighan.

Ular yene bir tereptin, Uyghur edliye arxipi qatarliq kishilik hoquq organlirigha, qérindishining ehwali heqqide guwahliq bayanati bergen.  Seydijan sadir ürümchidiki alaqidar saqchi organlirigha téléfon qilip akisining ehwali heqqide uchur élishqa tirishqan.

Seydijan axiri alaqidar qanalliri  arqiliq akisining tutup ekétilgen orni, waqti we haliti heqqide melumat igiligen. Uning igilishiche, bextiyar sadir,13‏-öktebir küni ürümchi xoten yoli tewelikidiki öyidin éghir késel halette tutup ekétilgen we deslepte, ürümchining gawféngchü) yuqiri késel rayoni( dep atilidighan bir karantin ornigha ekétilgen. Bu yerde 15 künche karantin qilin'ghandin kéyin qamaqxanigha yötkep kétilgen. Seydijan sadir yene bextiyar sadirning salahiyet kinishka nomurini  ürümchidiki sehiye tarmaqlirining tor bétige kirgüzüsh arqiliq, 6 ‏-noyabir küni  akisi üstidin yuqum  tekshürüshi élip bérilghanliqi we bu tekshürüshte uning saq chiqqanliqidin xewer tapqan.

Téléfonimizni tekrar  qobul qilghan qarlighach rayon  saqchi xadimi, bextiyar sadirning karantin chiqqanliqi heqqide éghiz achmighan  bolsimu,  uning tutqun qilin'ghanda éghir késel halette ikenlikini inkar qilmidi we uning dölet mexpiyetlikini ashkarilash gumani bilen tutqun qilin'ghanliqini tekrarlidi.

Yuqum tekshürüsh netijisi  seydijanni qismen xatirjemlikke ige qilghan bolsimu, emma uning bixeterliki heqqidiki endishisini yoqitalmighan. Bolupmu uning dölet mexpiyetlikini ashkarilash gumani bilen tutulghanliq uchuri, seydijan bilen hedisi minewerning endishisini hessilep ashurghan.

Akisi qamaqtin chiqimighiche, chet'el hayatining özliri üchün zeherge aylinidighanliqini eskertken seydijan sadir, akisining qutulushi üchün herqandaq bir müshkülatqa  hazir ikenlikini bildürdi.