Amérika prézidénti jow baydén aqsaraydiki héytliq ziyapette Uyghurlarni alahide tilgha alghan

Muxbirimiz irade
2022.05.03
Amérika prézidénti jow baydén aqsaraydiki héytliq ziyapette Uyghurlarni alahide tilgha alghan Prézidént jow baydén, nuri türkel ependi we ziba murat xanim rozi héytliq tebriklesh ziyapitide. Süret prézdént jow baydénning özi teripidin tartilghan. 2022-Yili 2-may, washin'gton aqsaray.
Nury Turkel teminligen

Amérika prézidénti jow baydén bilen xanimi jil baydin 2- may, yeni rozi héytining birinchi küni chüshtin kéyin aqsarayda musulmanlarning rozi héyti munasiwiti bilen mexsus tebriklesh ziyapiti bergen. Ziyapetke amérikadiki hökümet organliri, herqaysiy saheler we jama'etlerning wekilliri, shundaqla musulman döletlirining déplomatliri qatnashqan. Mezkur zipayetke amérika xelq'ara diniy erkinlik komitétining mu'awin re'isi nuri türkel ependimu qatnashqan. Uningdin bashqa yene bu ziyapetke Uyghur jama'itige wakaliten ziba murat teklip qilin'ghan.

Ziyapette prézidént jow baydén intayin ehmiyetlik nutuq sözligen. U amérikadiki we dunyaning herqaysi jayliridiki musulmanlarning rozi héytini tebriklep sözligen nutuqida dinlar ara chüshinish, keng qorsaqliq we hemkarliqni alahide tekitligen. U yene amérikadiki musulmanlar jama'itining her sahelerde tirishchanliq körsitip, amérikaning tereqqiyati we güllinishi üchün zor töhpilerni qoshuwatqanliqini alahide tekitligen. U musulmanlar jama'itining amérikadiki köp xilliqqa, rengdarliqqa tolghan medeniyetler ichidiki alahide hayatiy küchke ige bir topluq ikenlikini eskertip ötken.

Prézidént baydin rozi héyt munasiwiti bilen sözligen nutuqida Uyghurlarnimu alahide tilgha alghan. U mundaq dégen: “Bügünki künde biz dunyaning herqaysi jaylirida nurghunlighan musulmanlarning zorawanliqqa uchrawatqanliqini körüwatimiz. Héchkim ézilgenlerni kemsitmesliki, héchkim diniy étiqadi sewebidin bésimgha uchrimasliqi kérek. Shunga biz bügün bu muqeddes bayramni tebrikliyelmigen Uyghurlar, rohin'galar qatarliq musulmanlarni eslimektimiz, shundaqla acharchiliq, zorawanliq we toqunushlarda azab tartiwatqanlarni esleymiz!”

Nuri türkel ependi bügün radiyomiz ziyaritini qobul qilip, aqsarayning en'enisi bolghan bu héytliq ziyapetke ziba murat teklip qilin'ghanliqini tilgha aldi. U bu ziyapet arqiliq prézidént jow baydénning xitayning Uyghurlargha qaratqan irqiy qirghinchiliqi we yighiwélish lagérlirigha qamalghanlarning a'ile-tawabi'atliri bilen biwaste uchrishishigha shara'it yaritilghanliqini bildürdi.

Nury-Ziba.jpg
Nuri türkel ependi we ziba murat xanim aqsaraydiki rozi héytliq tebriklesh ziyapitide.

Nuri türkel ependimu jow baydén bilen bolghan söhbetning semimiy bolghanliqini, prézidéntning Uyghurlar mesilisini doklatlardin anglighandin köre, Uyghurlar bilen biwasite uchriship anglighanliqining tesiri zor bolidighanliqini éytti.

Nuri türkel ependi yene Uyghurlar mesilisining hem prézidént jow baydénning nutuqida hem shundaqla ziba murat bilen bolghan sözlishish jeryanida anglitilishining muhim bir signal ikenlikini bildürdi.

Prézidént jow baydén mezkur ziyapette nutuq sözligende, amérikaning qimmet qarishi heqqide uzun toxtalghan. U bu dölette tirishsila herqandaq orun'gha érishkili bolidighanliqi, kelgüside musulman jama'iti arisidinmu amérika prézidénti, tashqiy ishlar ministirliri yétiship chiqidighanliqini, köp xilliqning, keng qorsaqliq we öz - ara hemkarliqning amérikani amérika qiliwatqan eng muhchim qimmet qarashlar ikenlikini tekitligen.

Ziba murat prézidént baydén yoqiriqi sözlerni qiliwatqan minutlarda, özining bir ömürini késellerning derdige derman bolup ötküzgen apisi gülshen abbas we shuninggha oxshash tutqundiki barliq Uyghurlarni azab ilöide eske alghanliqini, ularning peqet Uyghur bolghanliqi üchünla xitay teripidin tutqun qilin'ghanliqini we béshigha türlük külpetlerning kelgenlikini, özining bu dewani hergizmu toxtitip qoymaydighanliqini tekitlep ötti.

“Aksiyos xewerliri” ning 3- may küni élan qilishiche, amérika hökümiti nöwette gülshen abbas xanim we shuningdek bashqa Uyghur tutqunlarni xitaydin sürüshtürüshni kücheytken bolup, amérikaning b d t da turushluq bash elchisi linda tomas girinfiyild xanim yéqinda xitayning b d t  da turushluq bash elchisi bilen körüshkende, gülshen abbas xanimning mesilisini otturigha qoyidiken.

Mezkur xewer bash elchi linda tomas girinfiyld xanimning ishxanisi teripidin delillen'gen bolup, ular “Aksiyos xewerliri” ge bergen bayanatida, “Amérika hökümitining xitayning amérikadiki Uyghur jama'itige qiliwatqan chigra halqighan bésimini sürüshtürüsh herikitini kücheytidighanliqi” ni tekitligen.

“Aksiyos xewerliri” ning bahalishiche, bash elchi linda tomas xanimning xitay terep bilen bolghan uchrishishta gülshen abbas xanimni biwaste sürüshtürüshi we uning aqiwitini bilishke tirishchanliq körsitishi, amérikaning xitaygha Uyghurlarning ehwaligha yéqindin diqqet qilip turuwatqanliqidek bir ségnalni bérishـte muhim ehmiyetke ige iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.