Yéngi bixeterlik tedbiri: “Terbiyelesh” heqqide éghiz achmasliq we téléfonini chet'eldin urulmaydighan qiliwétish

Muxbirimiz shöhret hoshur
2022-05-09
Share
tekshurush-saqchi-herbiy-mashina.jpg Xitay qoralliq eskerlirining bir Uyghur yashning mashinisini aqturuwatqan körünüshi. 2009-Yili 14-iyul, ürümchi.
AP

Muxbirimizning téléfon ziyaretliri we ijtima'iy taratqulardin melum bolushiche, b d t tekshürüsh guruppisi Uyghur diyarigha yétip bérishning aldida tüzülgen yéngi bixeterlik tedbirliri arisida, “Terbiyelesh”, yeni lagérlar heqqide héchqandaq éghiz achmasliq we téléfonlirini chet'eldin téléfon urulmaydighan qilip tengshep qoyush tüzümi yolgha qoyulghan. Töwende muxbirimiz shöhret hoshurning bu heqte teyyarlighan programmisi diqqitinglarda bolidu.

Ötken heptidiki téléfon ziyaretlirimiz dawamida qeshqer héytgah aldidiki sama heqqide melumat bergen saqchi xadimidin, b d t tekshürüshidin xewiri bar-yoqluqini soriduq. Mezkur xadim, bu heqte melumat barliqini bayan qilipla qalmastin, yene özlirige bu heqte némilerning uqturulghanliqi heqqidimu melumat berdi. Uning déyishiche, da'iriler asasiy qatlamlardiki xadim we ahalilerge, b d t tekshürüsh élip bériwatqan mezgilde qalaymiqan gep qilip qélishtin saqlinish heqqide alahide uqturush qilghan. Uqturush siyasiy öginish yighinliri we höjjet-matériyallar arqiliq yetküzülgen. Uqturushtiki mezmunlarning biride, “Terbiyelesh” yeni lagérlar heqqide éghiz achmasliq telep qilin'ghan؛ gep qilishqa toghra kelgende, turmushining yaxshiliqi, hayatining normalliqi qatarliq ijabiy ehwallarnila tilgha élish eskertilgen.

Xitay qoralliq saqchilirining Uyghurlar zich olturaqlashqan mehellini aqturuwatqan körünüshi. 2009-Yili 8-iyul, ürümchi.
Xitay qoralliq saqchilirining Uyghurlar zich olturaqlashqan mehellini aqturuwatqan körünüshi. 2009-Yili 8-iyul, ürümchi.
AP

Ilgirimu Uyghur rayonida dölet mexpiyetlikini ching saqlash heqqide köp qétimlap uqturushlar tarqitilghan؛ uqturushlardin biride, lagérlarni dunyadin sir tutush heqqidimu mexsus agahlandurulghan. Melum bolushiche, bu qétimqisi peqet, b d t tekshürüshi bilen alaqidar bolup, da'iriler, b d t kishilik hoquq aliy komissari mishél bachélét xanimning Uyghur élini ziyaret qilishi dawamida, heqiqiy ehwalning bilinip qélishining aldini élishqa heriket qilghan. Mezkur xadim, özining bir saqchi xadimi bolushtin tashqiri, partiye ezasi ikenlikinimu tilgha élip, mundaq bir uqturushni tarqitish, emel qilish we ijra qilishta özining bashlamchiliq roli oynawatqanliqini tekitlidi.

B d t tekshürüshige alaqidar, bixeterlik tedbirliri toghriliq éniqlashlirimiz dawam qiliwatqan bu künlerde yene ijtima'iy taratqularda, qol téléfonlirini chet'eldin kirgen téléfonni qobul qilmaydighan qilip tengshep qoyush toghriliq chiqirilghan bir uqturushmu közimizge chéliqti. Bu heqte doyin yeni tik-tokta tarqitilghan bir uchurda, téléfonni bu xil shekilde tengsheshning usuli, yeni qedem basquchlirining mexsus bir isxémisi sizip körsitilgen.

Lagér shahiti zumret dawut, da'irilerning bu arqiliq, b d t ning tekshürüshi mezgilide muhajirettiki Uyghurlar bilen Uyghur élidiki xelq arisida öz'ara bir hemkarliqning shekillinip qélishidin edishe qilghanliqini bildürdi. Uning qarishiche, da'iriler bir tereptin chet'eldiki Uyghurlarning Uyghur élidiki ahalilerni b d t tekshürgüchilirige heqiqiy ehwalni pash qilishqa jasaret bérip qoyushining aldini aldini bolmaqchi bolghan, yene bir tereptin chet'eldiki muxbirlarning b d t tekshürüsh élip bériwatqan bu nazuk weziyette, Uyghur élige téléfon qilip, muhim uchurlarni ashkarilap qoyush we bu seweblik bir axbarat daghdughisi peyda qilip qoyushning aldini almaqchi bolghan.

Aldinqi hepte ziyaritimizni qobul qilghan siyasiy közetküchi ilshat hesen ependi, xitay terep tekitlewatqan dölet bixeterlikining mahiyette xitayning barliq Uyghur siyasiti, yeni nöwette Uyghur jem'iyitining hemme saheside ipadisi körülidighan Uyghur qirghinchiliqi ikenlikini eskertkenidi.

Hörmetlik radiyo anglighuchilar, yuqirida, b d t tekshürüshi mezgilidiki yéngi bixeterlik tedbiri-lagérlar heqqide éghiz achmasliq we téléfoni chet'eldin urulmaydighan qilip tengshesh-heqqide anglitish berduq.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet