Уйғур рәһбәрләр карл гершманниң уйғур дәвасиға қошқан төһписи үчүн тон кийдурди

Мухбиримиз алим сейитоф
2021-12-01
Share
Уйғур рәһбәрләр карл гершманниң уйғур дәвасиға қошқан төһписи үчүн тон кийдурди Америка дөләтлик демократийини илгири сүрүш фондиниң сабиқ рәиси карл гершман(Carl Gershman) әпәндиниң уйғур дәвасиға қошқан төһписигә миннәтдарлиқ билдүрүш үчүн тон кийдүрди. 2021-Йили 30-ноябир, вашингтон.
Photo: RFA

30-Ноябир күни уйғурларниң кишилик һоқуқи вә уйғур дәвасини узун йиллардин бери қоллап кәлгән америка дөләтлик демократийәни илгири сүрүш фондиниң сабиқ рәиси карл гершман әпәндиниң уйғур дәвасиға қошқан төһписигә миннәтдарлиқ билдүрүш паалийити өткүзүлди.

Дуня уйғур қурултийи, уйғур кишилик һоқуқ қурулуши вә уйғур һәрикити тәшкилатиниң һәмкарлиқида орунлаштурулған бу паалийәттә карл гершман әпәндиниң қилған хизмәтлиригә вә униң уйғур дәвасиға қошқан төһписигә юқири баһа берилди.

Карл гершман әпәнди 1984-йили америка дөләтлик демократийәни илгири сүрүш фондиниң рәислик вәзиписини башлиған болуп, у йеқинда пенсийәгә чиққучә болған пүткүл хизмәт һаятини кишилик һоқуқ вә демократийә ишлириға беғишлиған. Карл гершман әпәнди уйғур дәвасиниң хәлқаралишиши, системилишишидиму һәл қилғуч рол ойниған. У америка уйғур бирләшмиси, дуня уйғур қурултийи, уйғур кишилик һоқуқ қурулуши вә уйғур һәрикити тәшкилатиға тунҗи болуп мәбләғ аҗритип, уйғур давасиниң күчлинип хәлқара мунбәрләрдә хитай һөкүмитини чөчүткидәк һаләттә баш көтүрүшигә асас яратқан.

Паалийәттә кишилик һоқуқни илгири сүрүш фонди җәмийитиниң һазирқи рәиси дәймин вилсон, муавин рәиси барбара хейг, американиң аяллар һоқуқи мәсилилири бойичә б д т да турушлуқ сабиқ әлчиси кәллий куррий ханим, коммунизм қурбанлири хатирә фонди җәмийити башлиқи андру бирмберг, америка диний әркинлик комитети муавин рәиси нурий түркәл, тәйвән парламенти кишилик һоқуқ комитети рәиси өркәш дөләт, дуня уйғур қурултийи рәиси долқун әйса, уйғур кишилик һоқуқ қурулуши башлиқи өмәр қанат, уйғур һәрикити башлиқи рошән аббас қатарлиқлар сөз қилди вә униң хизмитигә юқири баһа бәрди шуниңдәк униңға тәшәккүрини билдүрди.

Карл гершман әпәндиниң шәрипигә өткүзүлгән бу паалийәткә йәнә уйғурларға йеқиндин тонушлуқ болған әнглийә парламент әзаси нусрәт ғәни ханимму қәдәм тәшрип қилди.

Паалийәттә карл гершман әпәндигә тон кийдүрүлүп уйғурларниң миннәтдарлиқи йәткүзүлди. Карл гершман әпәндиму миннәтдарлиқини ипадиләп сөз қилип, уйғур дәвасиниң һәқлиқ бир дәва икәнликини, хитай һөкүмитиниң бүгүн уйғурларға ирқий қирғинчилиқ йүргүзүватқанлиқини вә буниң тохтитилиши үчүн өзиниң уйғурлар билән бир сәптә туруп, уйғур дәвасини давамлиқ қоллайдиғанлиқини билдүрди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт