Uyghur chémpiyon qizliri: bizning nishanimiz dunya olimpik musabiqiside chémpiyon bolush

Qazaqistan Uyghur ösmürlirining tenheriketning her xil türliri boyiche jumhuriyetlik, asiya we dunya musabiqilirige qatniship, zor netijilerge érishiwatqanliqi melum. Bolupmu boks we biraziliyeche jyu-jitsu, yeni erkin chélishish we mushtlishish boyiche chémpiyon bolghanlar ichide ösmür qizlarmu bar bolup, ularmu bashqilar bilen bir qatarda alahide tirishchanliq körsitip kelmekte.

Yéqinda almuta shehiride 2005-2006-yilliri tughulghan ösmürler arisida qazaqistan boyiche boks musabiqisi bolup ötkenidi. Uninggha memliket boyiche 400 din oshuq tenheriketchi qatnashti. Mezkur musabiqige Uyghur ösmürlermu qatnashqan bolup, shularning ichidin almuta wilayiti emgekchiqazaq nahiyesining qoram yézisidin kelgen elenur turghanowa öz reqibi tejribilik bokschini üchinchi meydan musabiqide yéngiwélip, qazaqistan chémpiyoni ataldi.

Biz qoram ottura mektipining 9-Uyghur sinipida ela bahalarda oquwatqan elenur turghanowa bilen alaqileshkinimizde u mundaq dédi: “Aldimizda kéliwatqan 8-noruz xanim-qizlar shanliq bayrimi bilen pütkül dunyadiki momilarni, anilarni, hedilerni hem qizlarni chin yürikimdin tebrikleymen. Men ikki yil mabeynide qoram mektipidiki tenheriket zalida meshiqliniwatimen. Méning bu yolni talliwélishimgha bowam turghan bilen momam tashgülning hessisi köp. Trénérim samat axmétof qisqa waqit ichide chong ghalibiyetlerge yétishke öz hessisini qoshmaqta. Shuning üchün men musabiqilerde peqet birinchi orunni igilep, utuqqa yétishimde ustazlirimning emgiki zor. 2021-Yili 1-féwraldin 7-féwral ariliqida ötken qizlar arisidiki 46 kilogram salmaqtiki qazaqistan musabiqiside yéngip chiqtim. Emdiki arminim dunya musabiqiliride, olimpik oyunlirida yéngishke yétip, xelqimni xushal qilishtur.”

Radiyomiz ziyaritini qobul qilghan elenur turghanowaning trénéri samat axmétof ependi özining shagirti heqqide mundaq dédi: “Ötkenki musabiqe toghriliq éytsaq, u intayin küchlük hüner körsetti. Anche tejribisi yoq bolsimu, her halda yaxshi oyun körsetti, orunluq mushtlashti. U özi talantliq qiz. Emdiki bizning aldimizdiki meqsitimiz ularni teyyarlap, mushu yili awghust éyida yashlar arisida asiya musabiqisige qatnishish idi. Hazirqi waba sewebidin uning orni we waqti téxi éniq emes. Bizde shundaq balilirimiz köp. Shularning yene biri qurbanjan daniyar. Biz uni kéler yilgha teyyarlawatimiz.”

Igilishimizche, tenheriketning biraziliyeche jyu-jitsu, yeni erkin chélishish we mushtlishish türi nursultan shehiride pa'aliyet élip bériwatqan “Alyans” biraziliyeche jyu-jitsu akadémiyesi teripidin teshkillen'geniken. Armanjan rozaxunof bashquruwatqan bu akadémiyening adilem hoshurowa, yasmina roziyéwa, aminem meshürowa, gülminem iminowa oxshash ezaliri 2019-yili ereb birleshme xelipiliki paytexti ebu-zebide ötken dunya musabiqiside chémpiyon bolghanidi.

Biz shularning biri, yeni 40 qa yéqin her xil derijilik musabiqilerge qatniship, shularning ichidin 37 qétim birinchilikni alghan gülminem iminowani ziyaret qilduq.

Hazir almuta wilayitining yarkent shehiride yashap, meshiqliniwatqan gülminem iminowa mundaq dédi: “Men tenheriket bilen kichikimdin tartip shughulliniwatimen. Emdi erkin chélishish we mushtlishish bilen shughullinishni 2016-yili bashlidim. Ata-anam bashta bu er kishilerning oqiti dep qarshi bolghan idi. Hazir men qazaqistanning 5 mertem chémpiyoni, asiyaning 3 mertem chémpiyoni we dunya chémpiyoni, tenheriket mahirining namzati. Shundaqla almuta shehirining we ‛arlan grip final‚ ning köp qétimliq chémpiyoni. Hazirmu men jyu-jitsu bilen shughulliniwatimen. Yéqindin buyan arilash chélishish türliridimu öz küchümni sinap körmekchimen. Méning bu qétimqi meqsitim aprél éyida qazaqistan we asiya musabiqilirige qatnishish. Méning arminim olimpik chémpiyoni bolush. Hazir men ‛alyans‚ tenheriket kulubida meshiqliniwatimen. Men özümning birinchi trénérim olég xarlayéwich, shundaqla ilshat osmanof we arman rozmétofqa rehmitimni éytmaqchimen.”

Igilishimizche, tenheriketning yene bashqa türliri, jümlidin ushu-sanda, yeni chambashchiliq bilen shughulliniwatqan Uyghur ösmür qizlirimu barken. Shularning biri faringiz ghopurowa 2018-yili birunéy paytexti darussalam shehiride ötken musabiqide kümüsh médalgha érishkenidi.