Ürümchidiki alaqidar xadim: qoy we kala göshi sétishni toxtitishning sewebini bilimen, emma dep bérelmeymen

Muxbirimiz shöhret hoshur
2020.07.29
qoy-kala-goshi-cheklesh-choshqa-setish.jpg Ürümchi shehirining tengritagh rayonluq soda idarisi chiqarghan jiddiy uqturushi. 2020-Yili iyul.
Photo: RFA

Ürümchi shehirining tengritagh rayonluq soda idarisi mushu ayning 25-küni chiqarghan bir jiddiy uqturushda bir türküm yémek-ichmek bazarlirining orni yötkelgenliki bayan qilinish bilen birlikte iskilattiki qoy-kala göshlirini sétishning waqitliq toxtitilghanliqi alahide uqturulghan. Bu uqturushta iskilattiki choshqa we toxu göshini dawamliq sétishqa bolidighanliqi eskertilgen. Muxbirimizning éniqlashliri dawamida, torlarda tarqalghan mezkur uqturushning hökümet uqturushi ikenliki delillendi؛ emma uqturushta ismi tilgha élin'ghan xadimlar, qoy we kala göshini sétishning néme üchün toxtitilghanliqi heqqide izahat bérelmidi.

Ötken hepte torlarda tarqalghan, ürümchi sheherlik tengritagh rayonluq soda idarisige a'it ikenliki qeyt qilin'ghan bir jiddiy uqturushta yémek-ichmek sahesidiki tijaret orunlirigha töt türlük buyruq chüshürülgen. Buyruqning ikkisi bir qisim yémek-ichmek bazarlirining orni yötkelgenliki heqqide, üchinchisi, mal bahasini östürüwalmasliq heqqide؛ 4 ‏-si bolsa iskilattiki qoy we kala-göshlirini sétishni waqtinche toxtitish heqqide chiqirilghan. Bu uqturush ürümchide tajsiman wirus seweblik ikkinchi qétimliq qamal yolgha qoyuluwatqan mezgilde chüshürülgenliki üchün, mezkur buyruq bezi közetküchiler teripidin, qamal mezgilidiki chare-tedbirlerning bir qismi bolushi mumkin dep qaralmaqta. Emma qoy we kala göshi sétishning cheklen'genliki heqqidiki bu buyruqta, toxu we choshqa göshini sétishni dawamlashturushqa bolidighanliqi eskertilgenliki üchün, bu uqturushning rayondiki milletler siyasiti yeni assimilyatsiye siyasiti we atalmish diniy esebiylikke qarshi heriketning bir parchisi ikenliki éhtimalliqimu perez qilinmaqta.

Mezkur uqturushta, 4 yémek-ichmek bazirigha mes'ul 4 xadimning isim we téléfon nomurliri bérilgen. Téléfonimizni qobul qilghan chén jyenmin isimlik xadim téléfonimizning türkiyedin urulghanliqini seweb körsitip so'allirimizgha jawa bérishni ret qildi. Emma u bu ashkara uqturush heqqide chet'eldin kelgen téléfon'gha jawab bérishke néme üchün bolmaydighanliqigha izahat bermidi.

Uqturushta bérilgen nomurlarning normal baghlinishi we ismi atalghan xadimlarning téléfonni qobul qilishi tengritagh rayonluq soda idarisi namidiki mezkur uqturushning resmiy uqturush ikenlikini delillidi. Biz téléfon ziyaritimiz dawamida, mezkur xadimlardin nuqtiliq halda iskilattiki qoy we kala göshini sétishning cheklen'gen yaki cheklenmigenlikini soriduq. Uqturushta ismi wang jingli dep atalghan kishi, deslepte qoy we kala göshi sétishning cheklenmigenliki, peqet import qilin'ghanliriningla sétishtin toxtitilghanliqini bayan qildi. Biz uningdin, “Undaqta, yerlikte yétishtürlgen yaki saqlan'ghan qoy-kala göshlirini sétishqa bolamdu ?” dep soriduq. Bu xadim bu heqtiki so'alimizgha éniq shekilde jawab bérelmidi. Biz uningdin tekrar halda qoy-kala göshi sétishning waqitliq toxtitilghanliqi we yaki biraqla cheklen'genlikini soriduq. U bu so'alghimu neq we udul jawab bérishtin özini qachurdi. Biz dawamliq sorighandin kéyin, u özining bu heqte melumat barliqi, emma jawab bérishke jasaret qilalmaydighanliqini ashkara bayan qildi. Jiddiy dep tarqitilghan bu uqturushtiki mezmunlar heqqide xadimlarning éniq we tepsiliy jawab bérelmesliki, bezi közetküchilerning gumanlirining asassiz emeslikini körsetmekte. Jewlan shirmemet, bu buyruqning “Uyghurlarni qurban héyt mezgilide örp adetliri boyiche yashashqa amalsiz qaldurush urunushi” ikenlikini tekitleydu.

Ilgiriki éniqlashlirimiz dawamida, qeshqer yéngisheherning ermudun yézisigha xizmetke chüshken bir xadim, özlirining bu yézidiki ahalilargha yémek-ichmek mesiliside halal-haramni ayrimasliqqa teshwiq qiliwatqanliqini bayan qilghan we bu xizmet guruppisi üchün shenshidin xitay ashpez teklip qilin'ghanliqini bayan qilish arqiliq özlirining halal-haramni ayrimasliqta ahalilerge ülge boluwatqanliqini isharetligenidi. Uningdin ilgiri téléfonimizni qobul qilghan xotendiki bir aktip kent sékritarimu, özining aldigha choshqa göshi kélip qalsa, uni yéyishni ret qilmaydighanliqini bayan qilghanidi.

Hörmetlik radi'o anglighuchilar, yuqirida ürümchi tengritagh rayonluq hökümet xadimlirining iskilattiki qoy we kala göshi sétishni toxtitishigha izahat bérelmigenliki heqqide anglitish berduq.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.