Iqtidarliq mudir dilmurat abduréhimning bir yildin buyan ghulja sheherlik qamaqxanida sewebsiz tutup turuliwatqanliqi ashkarilandi

Muxbirimiz shöhret hoshur
2022-04-20
Share
Iqtidarliq mudir dilmurat abduréhimning bir yildin buyan ghulja sheherlik qamaqxanida sewebsiz tutup turuliwatqanliqi ashkarilandi 30 Yilliq ma'aripchiliq hayatida ghulja sheherlik 3-, 8- we 9-ottura mekteplerde mudir bolup wezipe ötigen iqtidarliq ma'aripchi dilmurat abduréhim ependi.
Oqurmen teminligen

Melum bolushiche, 30 yilliq ma'aripchiliq hayatida ghulja sheherlik 3-, 8- we 9-ottura mekteplerde mudir bolup wezipe ötigen iqtidarliq ma'aripchi dilmurat abduréhim, bultur roza héyttin étibaren iz-déreksiz ghayib bolghan. Muxbirimizning ghulja shehiridiki ma'arip tarmaqlirigha qarita élip barghan téléfon ziyaretliri dawamida, dilmurat abduréhimning nöwette ghulja sheherlik qamaqxanida tutup turuluwatqanliqi ashkarilandi.

Hörmetlik radiyo anglighuchilar, ghulja weziyitidin xewerdar kishilerdin biri yéqinda radiyomizgha uchur yollap, ghulja sheher 9-ottura mektepning mudiri dilmurat abduréhimning bultur yil otturidin bashlap iz-dériki ghayib bolghanliqini inkas qildi. Inkasta déyilishiche, dilmuratning ghulja sheher döngmehellide olturushluq a'ile tawabi'atliri uning aqiwiti heqqide dost we qolum-qoshnilirigha héchqandaq melumat bermigen. Buninggha asasen kishiler, dilmuratning saqchilar teripidin tutqun qilin'ghanliqi we a'ilisining ehwalni jem'iyetke ashkarilimasliq heqqide agahlandurulghanliqini texmin qilishqan.

Biz dilmuratning ehwalini éniqlash üchün aldi bilen ili oblastliq ma'arip idarisigha téléfon qilduq. Téléfo'inimizni qobul qilghan xadim, dilmurat abduréhimning aqiwiti heqqide özining éniq melumati yoqluqini éytti, emma uning tutqunda ikenlikini ret qilmidi.

Inkas qilinishiche, dilmurat abduréhim 1990-yili shinjang oniwérsitétining tarix fakultitini püttürgen bolup, u awwal ghulja sheherlik 7-ottura mektepte oqutquchi bolghan, uningdin kéyin sheherlik 3-, 8- we 9-ottura mekteplerde mudir bolup wezipe ötigen. Téléfonimizni qobul qilghan 3-ottura mektepning nöwetchi xadimi, dilmurat abduréhimning ilgiri bu mektepte ishligenliki, emma xéli yillar burun bashqa mektepke yötkilip ketkenlikini bayan qildi. Bu xadim dilmuratning nöwette tutqunda ikenlikidin xewiri barliqini éytti. Emma tutulush sewebi we tutup turuluwatqan orni heqqide melumat bermidi.

Melum bolushiche dilmurat ghulja sheherlik 8-ottura mektepte eng uzun xizmet qilghan we bu mektepte mudir chéghida qoshumche sheherlik ma'arip i'adrisidimu xizmet qilghan iken. Biz 8-ottura mektepke téléfon qilduq. 8-Ottura mektepning bir nöwetchi xadimi deslepte dilmuratning 9-ottura mektepke yütkilip ketkenlikini bayan qilip, uning aqiwitidin xewiri yoqluqini éytti. Arqidin alaqidar mes'ul xadimdin melumat sorighandin kéyin, dilmuratning ghulja sheherlik qamaqxanida tutup turuluwatqanliqini ashkarilidi.

Biz uningdin dilmuratning qachan tutulghanliqini sorighinimizda, u dilmurat tutulghan orunning 9-ottura mektep ikenlikini bildürüp, bu heqtiki melumatlarni mezkur mekteptin igilishimizni tewsiye qildi. Biz uningdin dilmuratning néme sewebtin tutulghanliqini sorighinimizdimu uning 9-ottura mektepte tutulghanliqini tekitlep, bu heqte özining melumati yoqluqini éytti.

9‏-Ottura mektepke urghan téléfonlirimiz baghlanmighandin kéyin, 8-ottura mektepke qayta téléfon qilip, dilmurat tutup turuliwatqan orunning qamaqxana yaki lagér ikenlikini sürüshte qilduq. Mes'ul xadim buning “Dölet mexpiyetliki” ikenlikini eskertip, jawap bérishni qet'iy halda ret qildi.

Inkas qilinishiche, dilmurat abduréhim 1968-yili ghulja sheher döngmehellide tughulup chong bolghan. 30 Yilliq ma'aripchiliq hayatida 4 ottura mektepte xizmet qilip, buning üchide mudir bolghan. U ötken yili roza héytning ikkinchi küni öyidin sirtqa chiqip ketken péti qaytip kelmigen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet