Или педагогика университетиниң оқутқучиси дилмурат авутниң “дөләт тилини көзгә илмаслиқ” билән әйиблинип кесиветилгәнлики ашкариланди

Мухбиримиз шөһрәт һошур
2022-05-12
Share
Ili-Pidagogika-Inistitoti-Mektep-derwazisi.jpg Или педагогика институти мәктәп дәрвазисида көзәтчилик қиливатқанлар.
Ili pédagogika instituti amanliq bölümining tor bétidin élin’ghan bwc.ylsy.edu.cn

Или педагогика университетиниң тутқундики оқутқучилири һәққидә өткән айда радийомизға кәлгән инкаста, мәктәпниң пешқәдәм оқутқучиси, маркисизм иниститотиниң муавин секритари дилмуарат авутниңму исми тилға елинған. Инкаста дейилишичә, мәктәптә уйғур тилида дәрс өтүш әмәлдин қалдурулғандин кейинму, у бирқанчә қетим дәрсләрни уйғурчә сөзлигәнлики үчүн, 2017 ‏-йилиға кәлгәдә үстидин тәкшүрүш елип берилған вә арқидин кесиветилгән. Мухбиримизниң ениқлашлири давамида, бу учурниң тоғрилиқи дәлилләнди.

Ғулҗа вәзийитидин хәвәрдар кишиләрдин бириниң радийомизға йәткүзгән мәзкур инкасида, или педагогика университетидин 20 дин артуқ оқутқучиниң тутқунда икәнлики мәлум қилинип, булардин 8 нәпириниң исимлири тилға елинған иди. Инкаста дейилишичә, булардин бири пишқәдәм әдәбият оқутқучиси дилмурат авут болуп, у2018 ‏-йили тутқун қилинғанға қәдәр, мәктәпниң сиясий маарип вә филологийә инститотлирида рәһбәрлик вәзиписиниму өтигән икән.

Мәлум болушичә, бу йил 64‏-65 яшларда болған дилмурат авут өзиниң мустәқил иш беҗириш иқтидари билән хизмәттә көзгә көрүнүпла қалмастин, йәнә мәктәпниң хитай рәһбәрлири билән талаш-тартиш вә сүркүлүшләрдиму болған икән. Биз дилмурат авут һәққидики бу учурларниң тоғра-хаталиқини айдиңлаштуруш үчүн, ғулҗадики маарип тармақлириға телефон қилдуқ.

Инкаста йәнә әскәртилишичә, или педагогика университетидә уйғур тилида дәрс өтүш әмәлдин қалдурулғандин кейин, дилмурат авут оқуғучлириниң дәрс өзләшүрүштүрүштә қийниливатқини көрүп, зөрүр тепилғанда дәрсләрни уйғурчиму чүшәндүргән. 2017-Йили‏ мәктәптә “икки йүзлимичиликкә қарши һәркәт” қозғалғанда, униң бирқанчә йил аввалқи әнә шу уйғурчә дәрс сөзлигәнлики мәсилә қилип тартип чиқирилип, үстидин тәкшүрүш елип берилған икән. Тәкшүрүш нәтиҗисидә униң бу қилмиши “дөләт тилиға қарши туруш” дәп бекитилгән.

Биз инкаста қалдурулған телефон номуриға асасән, мәзкур мәктәпниң интизам тәкшүрүш хадими билән алақилаштуқ. Мәзкур хадим, өзи тәкшүригән кишиләр қатарида дилмурат авутниңму барлиқи вә шу тәкшүрүштин кейин тутқун қилинғанлиқини дәлиллиди. Әмма у дилмуратниң қачан вә қанчиә йиллиқ кесилгәнлики вә қәйәрдә җаза муддитини өтәватқанлиқини дәп берәлмиди. У өзиниң бу хил учурларни билишкә һоқуқлуқ әмәсликини ашкарилиди.

Нөвәттә голландийәдә яшаватқан бәхтияр насир әпәнди илгири или педагогика университетида оқуватқан мәзгилидә дилмурат авуттин дәрс алған. У дилмурат авутниң очуқ-йоруқ, хушчахчақ вә паалийәтчан бир киши икәнликини әсләп өтти.

Нөвәттә түркийәдә яшаватқан, илгири ғулҗада маарип саһәсидә хизмәт қилған ясинҗан әпәндиму, дилмурат авут һәққидә аңлиғанлирини әсләп өтти. Униң дейишичиму дилмурат авут “‏дөләт тилиға қарши туруш” гумани билән илгири бир қанчә қетим сорақ қилинған икән.

Дилмурат авутниң чәт әлдики оқуғучилиридин бири радийомизға учур берип, дилмуратниң икки пәрзәнти барлиқи, диляр исимлик оғлиниң нөвәттә америкада яшаватқанлиқ еһтималлиқини оттуриға қойди. Биз америкадики уйғур җамаитидин сүрүштә қилған болсақму, әмма америкида диляр дилмурат исимлик бириниң барлиқи техи айдиңлашмиди.

Радийомизға кәлгән инкаста әскәртилишичә, уйғур елида 2017‏-йилидин илгирики зәрбә бериш һәркәтлиридә, хитайға қарши позитсийәси байқалған кишиләр пүтүнләй дегүдәк тутқун қилинип болған. 2017 ‏-Йилдин кейинки тутқунда һечқандақ қаршилиқ позитсийәси байқалмиған болсиму, әмма миҗәз-характери вә җәмийәттики инавити сәвәбидин “қаршилишиш еһтимали бар” дәп қаралған кишиләр тутқун қилинған. Или педагокика университетидин тутқун қилинған 20 нәччә оқутқучи мана мушу түрдики кишиләрдин икән.

Биз или педагогика университети оқутуш башқармисидин дилмурат авут қатарлиқ оқутқучиларниң қандақ җинайәт билән кесилгәнликини сориғинимизда, алақидар хадим буниң “дөләт мәхпийәтлики” икәнликини тәкитләп, бу һәқтә шәһәрлик маарип идарисидин мәлумат соришимизни тәвсийә қилди.

Йоқурида или педагогика университетиниң оқутқучиси дилмурат ауутниң тутқунда икәнликиниң дәлилләнгәнлики тоғрилиқ мәлумат бәрдуқ.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт