Mehbus ablimit damollamning a'ile qorusining saqchilar teripidin nazaret astida ikenliki ashkarilandi

Ötken aylarda muhajirettiki ijtima'iy taratqularda qeshqerde 1990-yillarda chet'el tili mektipi achqan diniy alim ablimit damollamning tutqun qilin'ghanliqi heqqide uchurlar tarqalghan idi. Bir heptidin buyan ablimit damollamning chet'eldiki oqughuchiliridin bir nechchisi radiyomizgha inkas yollap, uning ötken hepte türmide jan üzgenliki heqqide uchur yetküzdi. Bügün muxbirimizning qeshqerdiki saqchixanilardin ehwal igilishi dawamida, ablimit damollamning bir mezgil awwal tutqun qilin'ghanliqini delillinish bilen birlikte, nöwette uning a'ile qorusining bir guruppa saqchilar teripidin nazaret qiliniwatqanliqi ashkarilandi.

Qeshqerde diniy we ma'arip saheside körsetken xizmetliri seweblik Uyghur jem'iyitide belgilik derijide tonulghan ablimit damollamning türmige tashlan'ghanliq we türmide jan üzgenlik uchurining toghra-xataliqini aydinglashturush üchün, qeshqerdiki herqaysi saqchixanilargha téléfon qilduq.

Ziyaritimizni qobul qilghan saqchixana xadimlirining köpinchisi ablimit damollam heqqide éghiz échishtin özlirini qachurdi. Saqchilardin biri ablimit damollamning bir mezgil awwal tutqun qilin'ghanliqidin xewirini barliqini éytti. Nezerbagh saqchi xadimliri ablimit damollamning a'ile-qorusining nöwette ghopurjan zémin isimlik bir saqchi teripidin nazaret astida ikenlikini ashkarilidi. Muxbirimizning téléfonini qobul qilghan ghopurjan zémin özining nöwette bir guruppa saqchilar bilen ablimit damollamning a'ile qorusini nazaret qiliwatqanliqini delillidi؛ emma qandaq bir seweb we zörüriyet bilen nazaret qiliwatqanliqi uchur bérishni ret qildi.

Qandaq ehwal astida bir mehbus a'ilisining nazaret astigha élinidighanliqini bilip béqish üchün, nöwette türkiyede yashawatqan, ilgiri ürümchide wezipe ötigen sabiq saqchi yolwas ependini ziyaret qilduq. Uning bayan qilishiche, adette xitay qanun sistémisida bir mehbus a'ilisini nazaret astigha élish, peqet shu mehbus bilen alaqidar chong bir weqe yüz bergende, saqchilar a'ile-ezaliri yaki qoshnilirining qarshiliq herikitining aldini élish üchün qollinilidighan bir bixeterlik tedbiridur.

Yuqiriqi éniqlashlirimiz dawamida ablimit damollamning türmide jan üzgenliki uchuri saqchilar teripidin mu'eyyenleshtürülmigen bolsimu, emma igilen'gen melumatlar mezkur uchurning toghriliq éhtimalliqidin bésharet bermekte.