85 яшлиқ диний өлима аблимит қари һаҗим түрмидә еғир кесәлгә муптила болған

Мухбиримиз қутлан
2015-01-28
Share
Ablimit-Qari-Hajim-17-yil-qamaq.jpg Аблимит қари һаҗим(оңдин биринчи) тутқун қилиништин илгири кәлпиндики юрт мөтивәрлири билән.
RFA/Qutlan

Буниңдин 6 йиллар илгири кәлпин наһийисидә тутқун қилинған вә 17 йиллиқ қамақ җазасиға һөкүм қилинған аблимит қари һаҗимниң нөвәттә үрүмчидики мәлум түрмидә җаза муддити өтәватқанлиқи мәлум.

Игилигән учурлардин мәлум болушичә, аблимит қари һаҗимниң саламәтлики пәвқуладдә начарлишип, адәм тонумайдиған һаләткә йәткән. Униң роһий һалитидиму бинормаллиқ көрүлгәнлики илгири сүрүлмәктә.

Кәлпиндики уйғур җамаити кәлпин наһийәлик һөкүмәткә шундақла үрүмчидики түрмә даирилиригә илтимас сунуп, яшинип қалған бу кишини өйигә кепилликкә қоюп беришини көп қетим тәләп қилған. Улар язма илтимасида диний өлима аблимит қари һаҗимниң җаза муддитини өйидә өтишини, буниң үчүн өзлириниң капаләт беридиғанлиқини билдүргән. Әпсуски, һөкүмәт вә түрмә даирилири кәлпин хәлқиниң бу тәлипини кәскин рәт қилған.

Бу йил 85 яшқа киргән түрмидики диний өлима аблимит қари һаҗимниң оғли мәмәт қаримниңму муддәтсиз қамаққа һөкүм қилинғанлиқи мәлум.

Кәлпин хәлқи арисида юқири абруйға вә чақириқ күчигә игә бу ата-бала диний өлималарниң узаққа созулған мушәққәтлик түрмә һаяти нөвәттә җамаәтчиликниң диққитини қозғимақта.

Биз тутқундики аблимит қари һаҗимниң һазирқи әһвали вә саламәтлики һәққидә мәлумат елиш үчүн кәлпиндики һөкүмәт органлири билән үрүмчидики людаван түрмисигә телефон қилдуқ, әмма улар бу һәқтә учур беришни рәт қилди.

Тәкитләшкә тегишлик болғини шуки, кәлпин хәлқиниң һелиһәм аблимит қари һаҗимниң из-дерикини қиливатқанлиқи мәлум. Кәлпиндики йәрлик аһалиләрдин бири зияритимизни қобул қилип, аблимит қари һаҗимниң һазирқи әһвали һәққидә билидиғанлирини баян қилди.

Илгири кәлпинниң йүрчи йезисида өсүп-йетилгән, һазир канадада яшаватқан уйғур зиялийлиридин туйғун абдувәли зияритимизни қобул қилип, өзиниң түрмидики аблимит қари һаҗим һәққидә аңлиғанлирини ашкара қилди.

Шуниң билән бир вақитта йәнә, илгири аблимит қари һаҗим билән бир мәһәллидә яшиған, һазир истанбулда турушлуқ “әрк телевизийиси” ниң риясәтчиси абдурахман өзтүркму бу һәқтә билидиғанлирини радио аңлиғучиларға тәқдим қилди.

Ахирида биз аблимит қари һаҗимниң әйни чағдики оқуғучиси, һазир голландийәдә яшаватқан әйса қаримдин бу һәқтә мәлумат алдуқ.

У, аблимит қари һаҗимниң кәлпин хәлқи арисидики диний вә иҗтимаий тәсири һәққидә тохтилип өтти шундақла униң йоқилаң баһаниләр билән түрмигә ташлиниши кәлпин хәлқи үчүнла әмәс, бәлки пүткүл уйғур җамаәтчилики үчүнму зор йоқитиш болғанлиқини илгири сүрди.

Тәпсилатини аваз улиништин аңлиғайсиз.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт