85 Yashliq diniy ölima ablimit qari hajim türmide éghir késelge muptila bolghan

Muxbirimiz qutlan
2015-01-28
Share
Ablimit-Qari-Hajim-17-yil-qamaq.jpg Ablimit qari hajim(ongdin birinchi) tutqun qilinishtin ilgiri kelpindiki yurt mötiwerliri bilen.
RFA/Qutlan

Buningdin 6 yillar ilgiri kelpin nahiyiside tutqun qilin'ghan we 17 yilliq qamaq jazasigha höküm qilin'ghan ablimit qari hajimning nöwette ürümchidiki melum türmide jaza mudditi ötewatqanliqi melum.

Igiligen uchurlardin melum bolushiche, ablimit qari hajimning salametliki pewqul'adde nacharliship, adem tonumaydighan haletke yetken. Uning rohiy halitidimu binormalliq körülgenliki ilgiri sürülmekte.

Kelpindiki Uyghur jama'iti kelpin nahiyelik hökümetke shundaqla ürümchidiki türme da'irilirige iltimas sunup, yashinip qalghan bu kishini öyige képillikke qoyup bérishini köp qétim telep qilghan. Ular yazma iltimasida diniy ölima ablimit qari hajimning jaza mudditini öyide ötishini, buning üchün özlirining kapalet béridighanliqini bildürgen. Epsuski, hökümet we türme da'iriliri kelpin xelqining bu telipini keskin ret qilghan.

Bu yil 85 yashqa kirgen türmidiki diniy ölima ablimit qari hajimning oghli memet qarimningmu muddetsiz qamaqqa höküm qilin'ghanliqi melum.

Kelpin xelqi arisida yuqiri abruygha we chaqiriq küchige ige bu ata-bala diniy ölimalarning uzaqqa sozulghan musheqqetlik türme hayati nöwette jama'etchilikning diqqitini qozghimaqta.

Biz tutqundiki ablimit qari hajimning hazirqi ehwali we salametliki heqqide melumat élish üchün kelpindiki hökümet organliri bilen ürümchidiki lyudawan türmisige téléfon qilduq, emma ular bu heqte uchur bérishni ret qildi.

Tekitleshke tégishlik bolghini shuki, kelpin xelqining hélihem ablimit qari hajimning iz-dérikini qiliwatqanliqi melum. Kelpindiki yerlik ahalilerdin biri ziyaritimizni qobul qilip, ablimit qari hajimning hazirqi ehwali heqqide bilidighanlirini bayan qildi.

Ilgiri kelpinning yürchi yézisida ösüp-yétilgen, hazir kanadada yashawatqan Uyghur ziyaliyliridin tuyghun abduweli ziyaritimizni qobul qilip, özining türmidiki ablimit qari hajim heqqide anglighanlirini ashkara qildi.

Shuning bilen bir waqitta yene, ilgiri ablimit qari hajim bilen bir mehellide yashighan, hazir istanbulda turushluq "Erk téléwiziyisi" ning riyasetchisi abduraxman öztürkmu bu heqte bilidighanlirini radi'o anglighuchilargha teqdim qildi.

Axirida biz ablimit qari hajimning eyni chaghdiki oqughuchisi, hazir gollandiyede yashawatqan eysa qarimdin bu heqte melumat alduq.

U, ablimit qari hajimning kelpin xelqi arisidiki diniy we ijtima'iy tesiri heqqide toxtilip ötti shundaqla uning yoqilang bahaniler bilen türmige tashlinishi kelpin xelqi üchünla emes, belki pütkül Uyghur jama'etchiliki üchünmu zor yoqitish bolghanliqini ilgiri sürdi.

Tepsilatini awaz ulinishtin anglighaysiz.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet