Meschiti herem imami : mes'uliyet tuyghusi bolmighan, bedel töleshni bilmigen millet izini yoqitip qoyidu

Meschit heremning imami ellame salih ali talib yéqinda meschit heremde jüme namizigha oqughan xutbisida, süriyidiki weziyetni tehlil qilip, her kim özini tekshürüp béqishqa tégishlik tolimu ehmiyetlik nutuq sözlidi.

U “Mes'uliyet tuyghusi bolmighan, éghir bedellerni töliyelmigen millet tarix bétide iz qalduralmaydu” dégen mezmunda töwendikilerni sözlidi:

Süriye zéminida pütün dunyaning köz aldida musulmanlar künige yüzlep boghuzlanmaqta. Qanlar östeng bolup aqmaqta. Süriye rijimi on minglarche puqrani öltürüp, milyonlarche puqrani yurtliridin palap, süriyining tarixiy eserlirini, hazaret - medeniyetlirini pütünley weyran qilmaqta. Tarixiy kutupxanilarni qesten ot qoyup köydürüp külge aylandurmaqta. U zalim hakimiyetning din bilenmu ishi yoq. Kichik balilarning yigha - zarlirimu ölgen qelbini éritelmeydu. Süriye rijimi süriye zéminigha yat bir rijim bolup, süriye döliti we xelqining menpe'eti üchün jan köydürmeydighanliqi pütün dunyagha ayan bolmaqta. Zalim, qanxor hakimiyet qirghinchiliqlarni sadir qiliwatidu, uninggha eqide qérindashliri(iran bilen hizbullahni démekchi) bolghanlar yardem bermekte. Süriye xelqini birlikte boghuzlimaqqa. Ereb we musulmanlarning düshmenliri u zalimlarni maddiy we meniwi jehettin ozuqlandurmaqta. Azsanliq qanxorlar köp sanliq puqralarni rehimsizlerche qetli'am qilmaqta. Qaysi küni birla waqitta 500din köp insan boghuzlap tashlandi, ularning köpliri kichik bala we ayallar iken. Bundaq wehshiylikni tarix körgenmu ejiba!?

Bu ehwalni dunya xelqi körüp turup süküt qilmaqta. Mezlumlargha yardem bérip mudaxile qilish, yardem bérishtin özini qachurmaqta. Epsus! ming epsus! süriye xelqi ichki düshmenning qoli, tashqi düshmenning méli arqiliq boghuzlanmaqta. Süriye xelqining inqilabining deslepki mezgilidila :“Bizning sendin bashqa medetkarimiz yoq ey allah!” dep sho'ar tolishi tolimu toghra éytilghan sho'ar idi. Emeliyet ispatlidiki, musulmanlarning allahtin bashqa medetkari, tayanchisi yoq!..

Milletlerning tarixigha nezer salidighan bolsaq, dunyadiki herqandaq bir millet yuqiri sewiyige, aliy mertiwige we bashqilargha tesir da'irisi küchlük sewiyige yetken bolsa, elwette uning arqisida chong hadisiler, büyük bedellerning tölen'genlikini, jan pida qilip tirishchanliq körsitilgenlikini körmey turalmaymiz. Herqandaq millet dunyadiki munasip orun'gha ige bolushni xalaydiken, shu milletning ewladi öz mes'uliyitini adaqilish, yashlirida qurban bérish éngining yuqiri bolushi telep qilinidu. Ewladlarni yaxshi terbiyelimeslik, insanlarda mes'uliyet éngi töwenlep ketken milletning aqiwitining xeterlik, dehshetlik bolidighanliqini, tarix bétidin pütünley yoqap kétidighanliqini tarix ispatlighan. Bügünki künde islam ümmiti kélip qalghan xar - zebunluqning asasliq amili dunyani heddidin ziyade yaxshi körüp, uninggha qul bolush. Bayliqining qoldin kétip qélishidin ensirep, shu bayliqini saqlap qélish yolida dinini, imanini sétiwétishtek ehwalgha kélip qalghanliqidur. Nepsi - xahish, hewesning keynige kirip, dunyaning lezzitige bérilip, bihude ishlar bilen meshghul bolush xuddi zeherlik chékimlikke oxshash mes qilghuch amil bolup, ümmetning tereqqiyat basquchini astilitipla qalmastin xar - zebunliqqa élip baridu. Emeliyette, ümmetning azghun haliti, xaniweyranliqi tolimu uzun'gha sozuldi. Eslide ehwal bundaq bolmasliqi kérek idi. Biz her yüz yilda ümmet bir qétim oyghinip qanliq urushlar, weyran qilghuchi pitnilerni béshidin kechürgendin kéyin heqiqiy kimlikini eslige keltürgenlikini körimiz.

Heyran qalarliqi shuki, künimizde pitniler yil boyi dawam qilip, musibetler yéngilinip barmaqta. Lékin musulmanlar ibret almay kétip barmaqta. Derheqiqet, islam ümmitining bayliq toplap, dunyada eng bay, sermayisi eng köp bolushi ereblerning sheripini kötürüp, xarliqtin qutulushning amili bolalmaydu.”

Ellame ali talib yene mundaq dédi: “Eger erebler dini telimattin yüz örüp, dunyadiki eng zamaniwi qorallarning hemmini sétiwalsimu, atom qorallirigha ige bolsimu yenila xarliqtin qutulushi mumkin emes. Musulmanlarning aldida izzet - sheripini eslige keltürüsh üchün birla yol islamgha qaytishtur. Izzet - sherepni eslige keltürüshni xalighan musulmanlar tarixini qayta közdin kechürüp yenila shu tarixqa qaytishi kérek. Biz musulmanlar qilishqa tigishlik muhim mesile öz - özimizdin hésab élish, tariximiz üstide qayta oylinip özimizge muraji'et qilishtur. Ümmet öz ichidin buzulmay turup tashqi küchler, din düshmenlirining xirisigha uchrishi mumkin emes.

Ey allah, dunyadiki mezlum bendiliringge öz qudriting bilen yardem we nusret ata qil! zalimlarni öz qudriting bilen halak qil! amin yarebbel alemiyn!!!”