50 яшлиқ диний зат әхмәтҗан һәйдәр түрмидин чиқип 4 айдин кейин җан үзгән

Мухбиримиз шөһрәт һошур
2018-01-19
Елхәт
Пикир
Share
Принт
Уйғур елидики диний затларни «заманиви усул» ойнашқа мәҗбурлап, мусабиқигә салған көрүнүш. 2015-Йили, учтурпан.
Уйғур елидики диний затларни «заманиви усул» ойнашқа мәҗбурлап, мусабиқигә салған көрүнүш. 2015-Йили, учтурпан.
Socila Media

Қәшқәр йеңишәһәрниң һарап йезисидики диний зат әхмәтҗан һәйдәр 2012‏-йили йәр асти диний мәктәп ечиш билән әйиплинип тутқун қилинған вә кесилгән. У өткән йили түрмидин қоюп берилип аридин 4 ай өткәндә һаятидин айрилған. Бу һәқтә учур бәргән қәшқәр часа башқармисиниң аманлиқ мудири, әхмәтҗан һәйдәрниң тутулушиға өзи тәминлигән учурниң сәвәб болғанлиқи вә тутуш оператсийәсигә өзиниңму иштирак қилғанлиқини баян қилди. У, әхмәтҗан һәйдәрниң өзи тәминлигән йип учи билән тутулғанлиқи вә тутуш оператсийәсигә өзиниңму қетилғанлиқини алаһидә әскәртти. Қәшқәр часа башқармисиниң аманлиқ мудири йәнә әйни чағда әхмәтҗан тәрбийәлигән 16 өсмүрниң җазаланмиғанлиқини, буниңға шу йилидики вәзийәтниң бу йилқидәк дәриҗидә қаттиқ әмәсликиниң сәвәб болғанлиқини тилға алди.

Часа аманлиқ мудириниң баянлиридин әхмәтҗан һәйдәрниң әйни чағда қанчә йиллиқ кесилгәнлики, бултур җаза муддити тошуп яки саламәтлик әһвали сәвәбидин қоюп берилгәнлики мәлум әмәс. Әхмәтҗан һәйдәрниң түрмидин чиққанда еғир дәриҗидә аҗизлашқанлиқи ениқ болсиму, бу аҗизлишишиниң түрмидики начар озуқлиништин яки еғир әмгәк сәвәбидин икәнлики, кесәл юқтурувалғанлиқи вә яки қейин-қистаққа учриғанлиқи мәлум әмәс.

Биз әхмәтҗан һәйдәрниң өлүм сәвәбини ениқлаш үчүн һараптики сақчи хадимлириға телефон қилдуқ. Сақчилар һарапта әхмәтҗан һәйдәр исимлик бириниң болғанлиқини инкар қилмиди, әмма, униң өтмүши вә аилисиниң нөвәттики әһвали һәққидә мәлумат бериштин өзлирини қачурди.
Аһалиләрдин бири әхмәтҗан һәйдәрниң түрмигә ташлиништин аввал сағлам бир киши икәнликини, түрмидин чиққандин кейин қорусида назарәт астиға елинғанлиқи, вәзийәттики кәскинлик сәвәбидин юрт-җамаәтниң уни йоқлашқа амали болмиғанлиқи, униң түрмидин чиққандики һалитидин аилә әзалиридин башқа һечкимниң хәвәрсизликини ейтти. Мәзкур киши йәнә әхмәтҗан һәйдәрниң аилә-тавабиатлириниң бешиға кәлгән бу уштумтут мусибәткә көп йиғлиғанлиқи вә аилә әһвалидин зарланғанлиқи үчүнла «һөкүмәттин нарази болуш» гумани билән тәрбийәләшкә әкетилгәнликини мәлум қилди. Часа аманлиқ мудириму, әхмәтҗан һәйдәр аилисидин 5 кишиниң нөвәттә тәрбийиләштә икәнликини дәлиллиди. 

Сақчилар, әхмәтҗан һәйдәрниң өлүминиң сәвәби түгүл, униң нопус тәвәликини дәп бериштинму иккиләнди вә әндишә қилди. Нәтиҗидә бултур 50 яшқа киргән диний зат әхмәтҗан һәйдәрниң өлүмигә түрмә һаятидики конкрет қайси иш яки қайси шараитиниң сәвәб болғанлиқи вә яки тәсир көрсәткәнлики йәнила сир пети қалди. 

Түрмидин чиққандин кейин узун яшиялмаслиқ һадисиси уйғур районида йеқинқи йиллардин бери алаһидә көзгә челиқмақта. Хәвәр архипимиздин мәлум болушичә, алдинқи йили йопурға наһийисидики мәһбус давут савут қамақханидики мәзгилдә җан үзгән. Дөләт мәхпийәтликини ашкарилаш билән әйибләнгән онсу наһийилик сот мәһкимисиниң хадими гүлнур абләтму дело ахирлаштурмай туруп саламәтликидин мәсилә чиққан вә аилисигә қайтурулуп узун өтмәй һаятидин айрилған. Әң йеқинқи учурлиримиздин мәлум болушичә, ғулҗидики «мелодийә» чайханисиниң саһиби ясинҗан мойдин бултур йил бешида тутулуп, йил оттурида зәмбилгә селинип қайтурулған вә йил ахирида дунядин видалашқан.

Пикирләр (0)
Share
Толуқ бәт