Myunxéndiki Uyghurlar qurban héyt namizini d u q zalida oqudi

Gérmaniyening myunxén shehiridiki Uyghur jama'iti qurban héyt namizini d u q bash shtabi zalida birge oqup, bir-birining bayrimini qutlidi.

Yillardin buyan myunxén shehiridiki Uyghur jama'iti héyt namazlirini d u q ning pa'aliyet zalida ötküzüp kelmekte. Bügünmu köpligen Uyghurlar qurultay zalida namazni birge oqup, wetendiki qérindashlirigha du'alar qildi we bir-birining mubarek bayrimini tebriklidi.

Namazdin ilgiri myunxéndiki Uyghur jama'itining imami, d u q diniy ishlar komitéti mudiri turghunjan alawudunhajim qur'ani kerimidin tepsir qilip, jama'etni yaxshiliq yollirigha dewet qildi, namaz nahayiti azadilik ichide oquldi.

Bu qétimqi namazgha daxil bolghan d u q mu'awin re'isi ümid agahi ependi ziyaritimizni qobul qilghanda, kéler yilliq namazni wetende oqushqa nésip qilishni janabi heqtin tilidi. D u q mu'awin re'isi esqerjan ependimu tesiratini bildürüp, xelqimizge hörlük, nijatliq tilidi. D u q diniy ishlar komitéti mudiri turghunhajimmu xelqige asayishlar tilidi we qurultay namidin pütün Uyghurlargha bolghan salamlirini yollidi.

Namazdin kéyin top-top bolushup, aldi bilen qaza qilghanlarning qebrisini yoqlap du'a - tilawet qilish, qebre ziyaritini axirlashturghandin kéyin héyt petisi qilish myunxén Uyghur jama'itining yaxshi adetliridin birige aylanmaqta.