Gollandiyediki Uyghurlar héytta bir yerge jem boldi

Ixtiyariy muxbirimiz pida'iy
2016-09-12
Élxet
Pikir
Share
Print
Qurban héyt namizigha yighilghan jama'et abduraxman qarihajining teqdim qilishida wez-nesihet anglimaqta. 2016-Yili 12-séntebir, gollandiye.
Qurban héyt namizigha yighilghan jama'et abduraxman qarihajining teqdim qilishida wez-nesihet anglimaqta. 2016-Yili 12-séntebir, gollandiye.
RFA/Pida’iy


2016 - Yili 12 - séntebir düshenbe küni pütün dunya musulmanliri qatarida Uyghurlarmu qurban héyt xushalliqigha chömdi. Ana wetinide we chet'ellerde yashawatqan Uyghurlarning du'a we tilekliri héytliq salamliri qoshulup, pütün dunya musulmanlirining héytliq tentenilirige öz xasliqi bilen jor boldi. Bu kün seherdin bashlap taratqular we uchur - alaqe wasitiliride qurban héytliq salam - sa'et we tebriklesh sözliri xetlik, resimlik, awazliq shekillerde qanatlinip, yéngi dewrdiki héytning ewzellikinimu namayan qildi.

Heqiqeten bügünki héyt xushalliqi yilda bir qétim kélidighan, qedirleshke we maxtashqa erziydighan bir bayramdurki - bu bayram munasiwiti bilen perwerdigarning rehmitide qelblerning ariliri yéqinlishidu؛ azayi - külpetler toxtitilidu؛ kishiler öz - ara epu qilishidu؛ petiliship, yoqlishidu؛ hemmidin muhimi pütün dunya musulmanlirining ittipaqliqi we birdekliki hej pa'aliyitide namayen bolidu. Ene shu ittipaqliqning alametliridin yene biri héyt namizi bolup, gollandiyede yashawatqan Uyghurlarmu bu peziletlerni her yili qoldin bermey, ijra qilip kelmekte.

2016 - Yili 12 - séntebir düshenbe küni shu yer waqti etigen sa'et 8 de gollandiyening zeyst shehirige jaylashqan yawropa sherqiy türkistan ma'arip jem'iyiti zalida jem bolghan gollandiyediki Uyghurlar héyt namizini birge oqudi we héytliq hemdastixan bolushti.

Jama'et mezkur jem'iyetning naziri abduraxman qarihajining teqdim qilishida sözlen'gen héytliq wez - nesihetliride héyt bayrimi munasiwiti bilen purset bilishke tégishlik emeller we éhtiyat qilishqa tégishlik ishlar toghrisida telim aldi.

Namazdin kéyin öz - ara qol éliship körüshüp, bir - birlirining héytini mubarekleshken jama'et xushal keypiyatta hal - mung bolushti we héytliq dastixanda ghizalandi.

Ziyaritimizni qobul qilghanlar özlirining hés - tuyghulirini radi'o anglighuchilirimiz bilen ortaqlashti. Qazaqistandin tijaret ishliri bilen gollandiyege kelgen nuridin ependi gollandiyediki Uyghurlarning héyt namizigha ehmiyet bérishliridin we jama'etlishishtek ittipaqliq rohidin tesirlen'genlikini bayan qildi.

Yawropa sherqiy türkistan ma'arip jem'iyiti yillardin biri gollandiyediki Uyghurlarning diniy we milliy en'enilirini jari qildurushqa yétekchilik qilip kéliwatqan bolup, ikki héyt namizini teshkillesh we ijra qilishta gollandiyediki Uyghurlarning maxtishigha sazawer bolup kelmekte.

Gollandiye Uyghurlar héyt namizidin bashqa öz - ara petilishishkimu ehmiyet bérip, ösüp yétiliwatqan ewladlarning Uyghur milliy örp - adetlirige warisliq qilish éngining tiklinishigimu türtke bolmaqta. Yene bir qisim Uyghurlar bu xil bayramlarda ayrim yighilish pa'aliyetliri teshkillep, muhajirettiki erkin hayatning peyzini sürmekte.

Toluq bet