Gollandiyediki türk teshkilati mes'uli xitayni eyiblidi

Ixtiyariy muxbirimiz pida'iy
2016-06-28
Élxet
Pikir
Share
Print
Gollandiyediki milliy görüsh teshkilatining gherbiy rayon mes'uli oktay dolmaz ependi yawropa sherqiy türkistan ma'arip jem'iyitining mes'ulliri bilen xatire sürette. 2016-Yili iyun, gollandiye.
Gollandiyediki milliy görüsh teshkilatining gherbiy rayon mes'uli oktay dolmaz ependi yawropa sherqiy türkistan ma'arip jem'iyitining mes'ulliri bilen xatire sürette. 2016-Yili iyun, gollandiye.
RFA/Pida’iy

Gollandiyediki milliy görüsh teshkilatining gherbiy rayon mes'uli oktay dolmaz ependi yawropa sherqiy türkistan ma'arip jem'iyitining teklipi bilen qatnashqan iptar pa'aliyitide Uyghurlar we bashqa dunya musulmanlirigha muhim söz qildi.

U sözide Uyghurlarning duch kéliwatqan qismetliri heqqide toxtilip, Uyghur élining xitay zulumida qalghan we bu zulum bügün'ge qeder dawam qiliwatqan bir yer ikenlikini, u yerde uzun yillardin béri zulum astida éziliwatqan Uyghurlar qérindashlirining barliqini, ular bilen bille bolush, ularning derdlirige derman bolush, nidalirigha qulaq sélish we uni dunyagha anglitishning bügünki dunya musulmanlirining üstidiki qerzge, insaniyliqning mes'uliyitige aylan'ghanliqini ilgiri sürdi.

U yene, insan heqliri bayannamisining rohigha asasen, insanlarning eng eqelliy heqliri bolghan "Yashash heqqi, étiqad heqqi, ibadet heqqi we sayahet heqqi qatarliqlar allahning insanlargha bergen tughma heqliridin bolup, uning herqandaq dölet, shexs, shirket, küchtünggürlerning öz-ara kélishim qilip tartiwalalaydighan heqlerdin emesliki" ni eskertip ötti we xitay hökümitining Uyghurlargha qiliwatqan zulumni eyibleydighanliqini bildürdi.

U sözide, bügünki xarliqtin qutulushi üchün, musulmanlar dunyasini birlishish we ittipaqlishishqa chaqirip: "Biz ittipaqliship bir küch bolghan chaghda, xitayghimu, toxta! déyeleymiz. Küchlüklerning qarshisigha küchlük bolup chiqsanglar, düshmenning qorali bilen qorallansanglar andin ghelibe qilisiler. Bügün dunya miqyasigha nezer salghinimizda, yer asti-üsti bayliqlarning eng köp yéride musulmanlar yashimaqta. Emma, buning qedrini bilmestin, bir-biri bilen urushup qan tökmekte. Bundaq halette birlik we qérindashliq bolmas. Uning üchün biz ramizan éyining peziletlik chaghliridin paydilinip, ümmetning ittipaqliqi, hörlüki we sa'aditini tilep du'a qilayli!" dep eskertti we iptar sahibi Uyghurlargha rehmitini bildürdi.

Ziyaritimizni qobul qilghan yawropa sherqiy türkistan ma'arip jem'iyitining mes'ulliridin obulqasim abdu'éziz ependi, oktay dolmaz ependi bilen bolghan dostluq bardi-keldi munasiwiti toghriliq tepsiliy melumat berdi.

Obulqasim ependining bildürüshiche, oktay dolmaz ependi gollandiyediki milliy görüsh teshkilatining gherbiy rayon mes'uli bolup, milliy görüsh teshkilatining idare ishliri mes'ullirigha teshkilatchiliq toghriliq léksiye bérip kéliwatqan tejribe sahibi iken. Uning éytishiche, oktay dalmaz ependi Uyghurlarghimu teshkilatchiliq toghriliq mexsus léksiye bérishke teklip qilin'ghan we séntebir aylirigha pütüshken.

Milliy görüsh teshkilati 1969-yili nejmiddin erbaqanning rehberlikide bashlan'ghan erkinlik herikiti bolup 1974-yilidin 1978- we 1997-yilighiche chong-kichik bolup besh qétim hakimiyette orun alghan. Emma, hakimiyetni tézla qoldin bérip qoyghan. Mezkur teshkilat tarixida milliy nizam partiyisi, milliy salamet partiyisi, réfah partiyisi we pezilet partiyisi qatarliq namlarni qollan'ghan. Hazirqi siyasiy partiye nami sa'adet partiyisi bolup, qollighuchilirining köplüki bilen türkiyediki gholluq partiyeler qatarida sanalmaqta.

Toluq bet