Gollandiyediki Uyghurlar dindash we qérindash milletlerge iptar ziyapiti berdi

Ixtiyariy muxbirimiz pida'iy
2013.07.23
gollandiye-ramazan-1.jpg “Yawropa sherqiy türkistan ma'arip jem'iyiti” gollandiyediki Uyghurlar namidin dindash we qérindash milletlerge iptar ziyapiti berdi. 2013-Yili 19-iyul, gollandiye.
RFA/Pidaiy

Gollandiyediki Uyghurlar teshkilligen bir qétimliq iptar ziyapitide jama'et topi hasil qilish, milliy we diniy kimlikini kücheytish üchün jama'et bolup yashashning muhimliqi tekitlendi.

Ziyapet sorunigha bashqa ellerdin kelgen musulmanlarmu teklip qilindi. Ziyapet ehli bundin kéyin Uyghurlar bilen dostluq alaqisini kücheytidighanliqi heqqide toxtilishti.

2013‏-Yili 19‏-iyul “Yawropa sherqiy türkistan ma'arip jem'iyiti” gollandiyediki Uyghurlar namidin, gollandiyede pa'aliyet qélip kéliwatqan türk we ereb sistémisigha tewe milletlerning jem'iyet wekillirige xalis iptar ziyapiti berdi.

Iptar ziyapitige türkiye, türkistan, iraq we afghanistan qatarliq ellerdin kélip olturaqlashqan Uyghur, türk, noghay, tatar, türkmen we afghan qatarliq milletlerning jem'iyet wekilliri we shexsiy aktipliridin bashqa, qara tenlik musulmanlarmu qatnashti.

Ziyapet “Qur'an kerim” tilawiti bilen bashlandi. 70 Tin artuq iptarchi éghiz échip bolupla, birlikte namaz oqudi. Namazdin kéyin türlük nazunémetler tizilghan dastixanlarda ghizalandi. Iptar jiddiychiliki bir az peseygendin kéyin, jem'iyet we teshkilatlarning wekilliri rehmet-teshekkür éytip, köngül izhar qildi.

Yene beziliri bolsa öz tejribiliride yekünligenlirige asasen, bir jama'et yaki topluqning diqqet qilishqa we purset bilishke tégishlik terepliri heqqide semimiy tewsiyilerdimu boldi.

Sahibxana terepmu söz qilip, bundin kéyinki dostluq-alaqe ishlirining téximu chongqurlishishi we kéngiyishi üchün hemkarlishishni ümid qilidighanliqini bildürdi.

Axirida bu qétimliq iptar ziyapitige sahibxaniliq qilghan “Yawropa sherqiy türkistan ma'arip jem'iyiti” ning mes'uli obulqasim ependi pa'aliyettiki meqset-ghayiliri heqqide toxtaldi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.