Ezher uniwérsitétini püttürgen doktor hebibulla toxtining késilgenliki ilgiri sürülmekte

Muxbirimiz shöhret hoshur
2017.06.09

Doktor hebibulla toxti, 2016-yili, urumchi.

uyghur.chinaislam.net.cn

Bügün anglighuchilirimizdin biri radiyomizgha mektup yollap 2015‏-yili ezher uniwérsitétini püttürgen doktor hebibulla toxtining xitay sot mehkimisi teripidin dölet bixeterlikige xeter yetküzüsh bilen eyiblinip késiwétilgenlikini melum qildi. Mektupta hebibulla toxtining shinjang islam uniwérsitétidin oqutquchiliqqa teklip kelgenliki üchün 2016‏-yili yil otturisida ayali bilen birlikte misirdin ürümchige qaytqanliqi yézilghan. Biz bu yip uchigha asasen, ürümchidiki islam uniwérsitéti we u tewe bolghan ürümchi baxulyang saqchixanisigha téléfon qilduq. Igilen'gen uchurlar, hebibulla toxtining késilgenlikini éniq delillimigen bolsimu, shundaq bir éhtimalliqini chetke qaqmidi.

Islam uniwérsitéti nöwetchi xadimi bilen söhbet:

So'al: hebibulla toxti mushu mektepte oqutquchiliq qilamdu?

Jawab: yaq, burun mushu mektepte oqup, ezherge oqushqa ketken.

So'al: uning késilip ketkenliki rast gepmu?

Jawab: yéqinda qoyup bériliptu dep anglighan.

So'al: qanchilik boldi, siz bu gepni anglighini?

Jawab: birer ayche boldi.

So'al: uning mushu mektepke oqutquchiliqqa iltimas qilghanliqi toghrimu?

Jawab: shundaq. Biraq, siyasiy tekshürüshtin ötelmigechke qobul qilinmighan.

So'al: iltimas sun'ghan waqti qachan?

Jawab: bultur 12‏-aylar, gobawdikiler almay turunglar dégechke, bu yil 1‏-ayda, bashqa 3 oqutquchini qobul qilduq.

Ürümchi shehiri baxulyang saqchixana xadimi bilen söhbet:
So'al: burun mushu silerning teweliktiki islam uniwérsitétida oqughan hebibulla toxtini silerning saqchixana tuttimu?
Jawab: bu ehwalni téléfonda dések bolmaydu, bu mexpiyetlik, mushu yerge kéling andin dep bérimiz.
So'al: tutulghanliqi rastmu?
Jawab: u chaghda köp adem tutulghan, bu ehwalni saqchixana bashliqimizdin sorang.
So'al: hebibullani saqchixanining bashliqi tutqanmu?
Jawab: palanchini palanchi tutidu deydighan gep yoq, tizimlikte bolghachqa tutulghan gep.
So'al: qachan tutulghan?
Jawab: buni dep bersem bolmaydu.
So'al: tutulghanliqini bilisiz bolmisa?
Jawab: he'e.
So'al: özingiz u chaghda köp adem tutuldi dédingiz, shu chagh qachan?
Jawab: bu téléfon délo melum qilish téléfoni, maqul emise.

Hörmetlik radi'o anglighuchilar, radiyomizgha kelgen mektupta bayan qilinishiche, doktor hebibulla toxti ürümchide se'udi erebistanning eldik namliq téz tamaqxanisining bir shöbisini achqan. 3‏‏-Doxturxanining udulida orun alghan bu ashxanining mulazimiti heqqide Uyghur rayonidiki nur torida élan bérilgen. Biz mezkur élandiki tamaq zakaz qilish nomurigha téléfon qilduq. Awaz mashinisi mezkur téléfonning puli tölenmigenliki üchün taqiwétilgenlikini bayan qildi.

Hörmetlik radi'o anglighuchilar, mezkur mektupta doktor hebibulla toxtining 10 yil késilgenliki ilgiri sürülgen, yuqiriqi uchurlardin hebibullaning késilgenliki téxi delillenmigen bolsimu, shundaq bir éhtimalliq chetke qéqilmidi.

Munasiwetlik xewerler

Din

Köp körülgen xewerler

RFA