2-Nöwetlik “Xelq'araliq hijab pasonliri bayrimi” torontoda muweppeqiyetlik ötküzüldi

Kanadaning torontoda shehiride ötken hepte axiri ikki kün dunyaning her qaysi jayliridin kelgen hijab pason layihilesh sahesidiki dangliq layihiligüchiler,tonulghan hijab modélliri, islami yüsündiki kiyim-kécheklerni körgezme qildi.

Buni “Xelq'araliq hijab bayrimi” déyish téximu muwapiq. Chünki bu bayramgha dunyaning her qaysi jayliridin 2000gha yéqin qiz ayallar qatniship, islamche diniy xasliqqa ige kiyim-kéchek markilirini tereqqiy qildurush, musulman ayallargha salmaq, saghlam, medeniy turmush sheklini teshebbus qilishni meqset qilghan mexsus témiliq söhbetlerge qatnashti, dewrge mas we étiqadigha xas kiyinish, moda éqimigha mas perdazlinishtin bashqa yene musulman ayallirining heq hoquqliri, insan heqliri témiliridiki mol mezmunluq terbiyileshlerge qatniship, musulman ayallirining hayaliq emma körkem latapitini, étiqadi bilen teng pikir erkinlikini teng namayan qildi.

Erkin asiya radi'osi muxbiri bolush süpitim bilen ötken shenbe we yekshenbe künliri torontoda ötküzülgen xelq'ara islam kiyim-kéchek sahesining yilliq eng chong layihilesh moda körsitish kespiy yighinigha, yeni, 2015- yili, 2-nöwetlik dunya tesettur kiyim-kéchek layihilesh bayrimigha qatnishishqa muyesser boldum.

Bayramning birinchi böliki yeni hijab pasonliri moda körsitish közgezmisi, xewer berginimizdek toronto yapon medeniyet merkizide 22- awghust intayin muweppeqiyetlik ötküzüldi. Nöwette bu alahide bayramning 23- awghust qismidiki pa'aliyet xatirilirimizni siler bilen ortaqlashmaqchi.

Xelq'ara sewiyediki zamaniwi uslubta layiheliyen'gen hijab pasonliri modél körsitishi, bayramning ikkinchi küni, yeni 23- awghust yekshenbe küni toronto déngiz sahilida mexsus orunlashturulghan sayahet kémiside dawam qildi.

Dangliq modéllar kémige teklip qilin'ghan alahide méhmanlargha moda hijab pasonlirini körsetti, teklip qilin'ghan dangliq hijab obraz layihiligüchilerdin en'gliyedin teklip qilin'ghan ségal, amine kin qatarliq dangliq shexsler, kiyim sen'iti, hijab pasonliri, moda éqimliri toghrisida mexsus söhbet uyushturuldi. Obraz layihiligüchiliri we pason layihiligüchiler bilen ijtima'iy turmush alaqiliride muslimelerge xas kiyinish, perdazlinishta zörür bolghan téxnika heqqide pikir almashturdi.

Biz xelq'ara tesettur kiyim layihilesh bayrimining bashqurghuchiliridin fatime beg xanimni ziyaret qilduq:
- Essalamu'eleykum eleykün, bayrimimizgha qedem teshrip qilghininglardin bekmu xushal boldum, men bayramning bashqurghuchiliridin biri, emma, bu bayram torontodiki dangliq modéllardin nétika pédirning islam dinini qobul qilghandin kéyin, hijab pasonlirini dunyagha yüzlendürüsh idiyisi we pilani bilen otturigha chiqqan. Bultur tunji nöwetlik bayrimimizgha 1200din artuq adem qatnashqan, bu qétim u sandinmu ashqanliqigha ishinimen. Bu bayram arqiliq biz dunyadiki muslimeler üchün kiyim pason layihiligüchilerge we bu sahediki izden'gghüchilerge meydan we purset hazirlimaqchi we islamning güzellikini özimizning uslubi bilen taratmaqchi, bayrimimiz islam dunyasining, jemiyitimizningla emes hökümetningmu küchlük qollishigha érishti. Buningdin kéyin hijabimizni yenimu zor bayramlar bilen qutluqlashqa, téximu köp hede singillirimiz qatnishishqa nésip bolghay.

Hijab pasonliridin, yeni tessettür kiyimliridin modél körsitishke qatnashqan kanadadiki dangliq modéllardin fatima ziyaritimizni qobul qilip, hijab pasonlirining dunyagha yüzlinishi üchün xizmet qiliwatqanliqidin pexirlinidighanliqini bildürdi we özining Uyghurlarni bilidighanliqini gézitlerdin Uyghur qizlirining hijab artalmaydighanliqi, roza tutalmaydighanliqini körüp xitay hökümitining Uyghurlargha qaratqan diniy cheklimilidin tolimu bimenilik hés qilghanliqini bayan qildi we Uyghur qiz ayallirigha semimiy tileklirini yetküzüshimizni soridi:
- Her qandaq kishining özining étiqadi bilen yashash hoquqi bar, Uyghur hede-singiller, téximu qeyser bolunglar, özünglargha ishininglar, bu silerning étiqadinglar, axirida hemmimiz qilghanlirimiz üchün jawab bérimiz, shunga qorqmanglar....

Sayahet kémisidiki modél körsitishtin kéyin u yene kiyim-kéchektin ibaret tilsiz, emma intayin ünümlük medeniyet wasitisi arqiliq hijabliq ayallarning ichki güzellikini layiq pasonlar arqiliq ipadileshning yolliri üstide munaziriler uyushturuldi. Bu heqte tejribilirini méhmanlargha ortaqlashqan milyonlighan egeshküchiliri bar dangliq hijab obraz layihiligüchiliridin sagal we amine kin qatarlilqlarmu bizning erkin asiya radi'osidin Uyghurlargha xewer bériwatqanliqimizni anglap Uyghur qizlirigha alahide salam we medetlirini yollidi.