Qirghizistandiki Uyghur jama'iti merhum isma'il hajimni yad etti

Ixtiyariy muxbirimiz azad qasim
2015-11-05
Élxet
Pikir
Share
Print
Qarabalta Uyghurlirining hörmitige sazawer bolghan saxawetchi merhum isma'il hajim turdiyiw. (Waqti we orni éniq emes)
Qarabalta Uyghurlirining hörmitige sazawer bolghan saxawetchi merhum isma'il hajim turdiyiw. (Waqti we orni éniq emes)
Merhumning perzentliri teminligen

3-Noyabir qirghizistanning qarabalta shehiridiki Uyghur jama'itining wekilliridin 300ge yéqin kishi jem bolup, qirghizistandiki Uyghurlar arisida alahide hörmetke sazawer bolghan, özining kemterliki, xelqperwerliki, yétim-yésir kembeghellerge bolghan méhribanliqi bilen jama'etke tonulghan mötiwer aqsaqal isma'il hajim turdiyifning rohigha atap xetme qur'an pa'aliyiti ötküzdi. Isma'il hajim 1-noyabir küni 85 yéshida qarabaltida wapat bolghan idi.

Melum bolushiche, isma'il hajim turdiyif 1930-yili Uyghur ilining süydüng nahiyiside dunyagha kelgen bolup, 1962-yili yüz bergen küch-küchte minglighan-onminglighan Uyghurlargha oxshash ottura asiyagha köchüp chiqqan.

Qarabalta Uyghur jama'itining yigit béshi bextiyar hashimning bildürüshiche, isma'il hajim 1965-yili qarabalta shehirige kélip orunlashqinigha uzun bolmighan isma'il hajim öz turmushining qiyinchiliqta ikenlikige qarimastin, Uyghur jama'itini uyushturup, yétim-yésirlargha, méyip balilargha we a'iliside qiyinchiliqi barlargha yardem bérish yüzisidin köp qétimlap xeyri-saxawet pa'aliyetlirini ötküzgen.

Uning bildürüshiche yene, isma'il hajim "Ittipaq jem'iyiti" ning pa'aliyetlirige aktip qatnishish bilen birlikte, Uyghur yashlirining penni bilimlerni öginish bilen bille diniy jehette teng yétilishini nezerde tutup, qarabaltagha öz xirajiti bilen "Hezriti ömer" namida meschit qurghan.

U mundaq dédi: "Men oylaymen shuning bilen Uyghur milliti özining bir yaramliq oghlanidin ayrildi."

"Ittipaq jem'iyiti" qarabalta shöbisining sabiq re'isi, péshqedem ziyaliy tel'et baqi merhum isma'il hajimning hayat waqtidiki ish-pa'aliyetliri heqqide toxtilip munularni bildürdi: "Merhum isma'il hajikam milletperwer, tereqqiyperwer, yéngiliqqa intilidighan, qoli ochuq, namrat, kembeghellerge yardemni ayimaydighan séxiy-merd adem idi. Ittipaq jem'iyiti qurulghandin tartip bizning pa'aliyetlirimizge toluq qatniship, qolidin kelgen yardimini bérip turatti. 'ittipaq géziti' ge özi yézilipla qalmastin, uruq-tughqanliri we qolum-qoshnilarni gézitke yézilishqa dewet qilatti. Isma'il hajikam gerche arimizdin ketken bolsimu, uning weten, millet heqqidiki arzu-armanliri kéyinkilerge ülge bolup qalidu, dep oylaymen."

Igilishimizche, öz waqtida isma'il hajimning teshebbusi we uyushturushi bilen "Hezriti ömer" meschitining medrisiside islam dinigha a'it bilimlerni puxta ögen'gen yashlardin bir qanchisi hazir qarabaltadiki meschitlerde imametchilik we mezinlik wezipilirini ötimekte iken.

Toluq bet