Istanbulda 1000 gha yéqin Uyghur jem bolup roza héytni tebriklidi

Istanbulda ötküzülgen roza héyt pa'aliyitidin körünüsh. 2016-Yili 6-iyul, türkiye.

Istanbulda ötküzülgen roza héytni tebriklesh pa'aliyitide ösmürler shé'ir oqumaqta. 2016-Yili 6-iyul, türkiye.

Istanbuldiki “Sherqiy türkistan ma'arip we hemkarliq jem'iyiti” ning uyushturushi bilen 6-iyul (roza héytning 2-küni) istanbulda yashawatqan Uyghurlardin er-ayal we ösmürler bolup 1000 gha yéqin kishi déngiz boyidiki baghchigha jem bolup, roza héytni birlikte tebriklesh pa'aliyiti ötküzdi.

Bu héytlishish pa'aliyitide istanbulning sefaköy, zeytunburnu qatarliq oxshimighan jaylarda yashawatqan Uyghurlar mexsus aptobus we kichik mashinilar bilen awjilar déngiz boyidiki baghchigha jem boldi we bir -birining roza héytni tebrikleshti.

Pa'aliyetke ibrahim damollam riyasetchilik qildi. Kéyin “Sherqiy türkistan ma'arip we hemkarliq jem'iyiti” ning re'isi hidayetullah oghuzxan échilish nutqini sözlidi we pa'aliyetke qedem teshrip qilghan méhmanlargha teshekkür éytidighanliqini bildürdi.

U sözide roza héytning musulmanlar üchün zor ehmiyetke ige ikenlikini bildürdi we pa'aliyetke qatnashqan barliq Uyghurlarning roza héytini tebriklidi.

Kéyin pa'aliyet riyasetchisi ibrahim damollam söz qilip, roza héytning Uyghurlarning birlishishige wasite bolushigha tilekdashliq bildürdi.

Pa'aliyette yene péshqedem wetenperwer zatlardin abdu'éziz ependi söz qilip weten ichi-sirtidiki Uyghurlarning roza héytni tebriklidi we Uyghurlarning pikir-ixtilaplarni hörmet qilghan asasta, birlik-barawerlik hasil qilishi kérekliki toghrisida toxtaldi.

Pa'aliyette yene Uyghur sha'ir abduréhim parach özining roza héytqa atap yazghan shé'irini jarangliq déklamatsiye qildi.

Sherqiy türkistan ma'arip we hemkarliq jem'iyitining bash katipi abdul'ehed abduraxman, chet'ellerdin istanbulgha kélip héytlishish pa'aliyitige qatnashqan bir qisim Uyghurlar we Uyghurlarning dostlirini tonushturup ötti.

Biz bu pa'aliyet toghrisida pikir qarashlirini élish üchün pa'aliyetni uyushturghan sherqiy türkistan ma'arip we hemkarliq jem'iyitining ijtima'iy ishlar bölümi mes'uli abdulkerim kuchar bilen söhbet élip barduq.