Gollandiyediki Uyghurlar islamdiki kishilik hoquq heqqide söhbet ötküzdi

Ixtiyariy muxbirimiz pida'iy
2014-12-10
Élxet
Pikir
Share
Print
Uyghurlar islamdiki kishilik hoquq heqqide ötküzgen söhbettin körünüsh. 2014-Yili 7-dékabir, gollandiyediki.
Uyghurlar islamdiki kishilik hoquq heqqide ötküzgen söhbettin körünüsh. 2014-Yili 7-dékabir, gollandiyediki.
RFA/Pidaiy

7-Dékabir küni yawropa sherqiy türkistan ma'arip jem'iyitide jem bolghan Uyghurlar dunya kishilik hoquq küni munasiwiti bilen insanning kishilik hoquqliri heqqide islamdiki belgilimiler bilen tonushup chiqti.

Qur'an kérim télawiti bilen bashlan'ghan bu pa'aliyetke gollandiyede yashawatqan bir türküm sherqiy türkistanliqlar bilen, gérmaniyedin kelgen "Uyghuristan azadliq teshkilati" ning mes'ullirimu ishtirak qildi.

Pa'aliyetke riyasetchilik qilghan obulqasim abdul'eziz ependi aldi bilen yéraq-yéqindin kelgen barliq wetendashlarning qedemlirige beriketler tilep, tebrik sözi qildi. Andin bügünki pa'aliyetning kün tertipini élan qildi.

Jem'iyet re'isi iysa qarajim islamdiki kishilik hoquqqa alaqidar körsetmilerning 1400 nechche yil ilgiri mukemmel bir shekilde otturigha qoyulghanliqi؛ bügünki dunya elliri teqezza boluwatqan kishilik hoquqqa alaqidar nurghun qanun- nizamlarni herqaysi rayonlardiki we tebiqilerdiki insanlar arisida adalet bilen yürgüzüshte tosalghularning köp boluwatqanliqi؛ uningdiki seweblerning, insanlarning öz-özini tonushining toghra we chungqur bolmighanliqidin kélip chiqqanliqi qatarliqlarni bir qatar misallar bilen chüshendürüp ötti.

Uning éytishiche: islamda insan'gha bérilgen kishilik hoquqlar-isanning terbiye élish hoquqi, mal-mülük serp qilish hoquqi, sayahet qilish hoquqi, shan-sheripi, jéni, méli we nepsidin tartip, insanning ijtima'iy, siyasiy, iqtisadiy qatarliq barliq sahelirige qeder baghlinishliq bolghan köp tereplimilik hoquq bolup, bu jehette cheklimige uchrighuchining öz heqqini qoghdishi tamamen yolluq iken.

Uningdin kéyin köpchilikning teqezzasi bilen sözge teklip qilin'ghan "Uyghuristan azadliq teshkilati"ning re'isi osmanjan tursun ependi mezkur teshkilatning qurulush tarixi we meqset-ghayisi heqqide chüshenche bérip ötti we özliri teyyarlap kelgen bayraq, éznak we kitab qatarliqlarni gollandiyediki wetendashlirigha dostluq sowghisi süpitide tarqitip berdi.

Ariliqtiki dem élishlarda ghizalinish, namaz oqush we resimge chüshüp xatire qaldurushlar boldi. Weten, millitining istiqbali, muhajirette yashawatqan Uyghurlarning nöwette duch kéliwatqan mesililiri, kelgüsi heqqide tesewwur-ghayiliri talash-tartish qilindi. Bolupmu gérmaniyedin kelgen pa'aliyetchi abduréhimjanning barin inqilabi heqqidiki bayanliridin hayajanlan'ghan köpchilik, bes-munazire bilen qizip kétip, taki yérim kéchige qeder mungdashti.

Ariliqtiki pursette ziyaritimizge inkas bergüchiler yürek sözlirini anglatti.

Biz pa'aliyet axirlashqandin kiyin, aldimizda kéliwatqan "Dunya kishilik hoquq küni" munasiwiti bilen, islamdiki kishilik hoquqqa alaqidar belgilimilerdin radi'o anglighuchilirimizni waqiplandurush meqsitide iysa qarajimni ziyaret qilduq. U bu heqtiki chüshenchilirini, radi'o anglighuchilirimiz bilen qisqiche ortaqlashti.

Toluq bet