Lop nahiyisidiki “Meschitke kirish kinishkisi” ning bash axiri

Muxbirimiz eziz
2015.10.20
Share on WhatsApp
Share on WhatsApp
meschitke-kirish-kenishkisi-1.jpg Lop nahiyisining hanggiya yézisining ayagh xaniqa ériq kenti tarqatqan meschitke kirish kinishkisi.
Social Media

2014-Yilining axirida xoten wilayitige qarashliq lop nahiyisining hanggiya yézisining ayagh xaniqa ériq kenti pütkül Uyghur aptonom rayoni boyiche tunji bolup yerlik Uyghur musulman ammigha qarita “Meschitke kirish kinishkisi” tarqitishni bashlighan idi. Alaqidar menbelerdin xewer tépishimizche, bu kinishka yerlik Uyghur ammidin meschitlerge we bashqa alaqidar diniy pa'aliyet sorunlirigha kirmekchi bolghanlar üchün tarqitilghan bolup, bügünki téléfon ziyaritimiz arqiliq bu kinishkining hazir hanggiya yézisidin kéngiyip, lop nahiyisige qarashliq birnechche chong yézida omumlashqanliqi melum boldi. Lékin, lop nahiyilik xelq hökümiti ishxanisida nöwetchilikte turuwatqan xitay xadim mezkur kinishkining tarqitilishi heqqide sorighan so'alimizgha jawab bérip, “Lop nahiyisidiki musulman ammigha ‛meschitke kirish kinishkisi‚ tarqatqan bundaq ehwal mewjut emes” dédi. Lékin, téléfon ziyariti arqiliq yerlik Uyghurlardin igiligen ehwallar kinishka tarqitishning rastliqini, shundaqla bu xildiki “Meschitke kirish kinishkisi” ning nöwette hanggiya yézisidin halqip uninggha qoshna bashqa yézilargha kéngeygenlikini delillidi. Bö heqte soralghan so'algha jawab bergen shu yerlik bireylen bu ehwalning rastliqini tilgha aldi.

Lop nahiyisige qilghan téléfon ziyariti arqiliq shu nerse melum boldiki, bu kinishka peqet ashu teweliktiki diniy pa'aliyet bilen shughullinishqa ijazet bérilgen kishilerning öz tewelikidiki meschitke kirishi üchünla ishlen'gen iken. Emma, hökümet xizmetchiliri, oqughuchilar we namaz oqushi men'i qilin'ghan bashqa kishilerge bu kinishka bérilmeydiken. Mezkur kinishkisi bar kishi özi tewe bolghan yéza yaki kenttin halqip bashqa mehellidiki meschitlerge kirmekchi bolsa ashu meschit aldidiki tekshürgüchiler öz teweside bolmighan bu xildiki kishilerning meschitke kirishini tosidiken. Xilapliq qilghuchilar körülse qanun boyiche jazagha tartilidiken. Hanggiya yéziliq bazarda olturushluq bir Uyghur xanim téléfon arqiliq soralghan so'allargha jawab bergende bu ehwalni tilgha aldi.

Biz bu heqte chet'ellerdiki Uyghur ziyaliylirining bu mesilige qandaq qaraydighanliqini bilip béqish üchün se'udi erebistandiki Uyghur ölima sirajidin hajini ziyaret qilduq. Namaz oqushning islam dinidiki besh perhizning biri ikenlikini, namazni jama'et bolup oqushning öz aldigha oqushtin ewzel bolidighanliqini tekitligen sirajidin haji bu xildiki “Meschitke kirish kinishkisi” ning meqsiti yerlik Uyghurlarning meschitke toplinishning aldini élish we uni cheklesh ikenlikini körsetti, shundaqla buning eng eqelliy insan heqlirining depsende bolushi hésablinidighanliqini eskertti. Uning qarishiche, yerlik da'irilerning bu xildiki yolsiz tedbirliri emeliyette islam dinigha jeng élan qilghanliqqa barawer iken.

Tepsilatini yuqiridiki awaz ulinishidin anglighaysiler.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.