Korlada 20 neper méyit yuyghuchi ayal tutup kétilgen

Muxbirimiz shöhret hoshur
2018.02.19
Turghunjan-alawudun-rfa.jpg Dunya Uyghur qurultiyi diniy ishlar komitéti mudiri turghunjan alawudun erkin asiya radiyosini ziyaret qildi we muxbirimizning ziyaritini qobul qildi. 2016-Yili 26-may, washin'gton.
RFA

Korla - Uyghur diyarida “Yépiq terbiyelesh” siyasiy herikiti keng kölemlik we shiddetlik dawam qiliwatqan jaylardin biri. Ashkarilinishiche, korlaning qara yulghun yézisidin 20 neper ayal méyit yuyghuchi “Terbiyelesh merkizi” ge élip kétilgen.

Ayal méyit yuyghuchilar Uyghur diyarida aldinqi yilidin bashlap nuqtiliq közitilidighan 6 xil kishiler qatarigha kirgüzülgen idi. Bügün dunya Uyghur qurultiyi diniy ishlar komitétining mudiri turghunjan alawudun ependi bu toghrida pikir bayan qilip, xitay da'irilirining bu nuqtida Uyghurlarning shermi-haya éngini we uninggha bolghan sezgürlükini ajizlashturush yaki yoqitishqa urunuwatqanliqini ilgiri sürdi.

Biz ötken yili atush ishtachidiki bir amanliq mudirini ziyaret qilghan waqtimizda, atushta 6 xil kishilerning nuqtiliq nazaret qiliniwatqanliqini, bulardin birining ayal méyit yughuchilar ikenlikini ashkarilighan idi.

Biz ayal méyit yuyghuchilarning yéqinqi yillardin béri néme üchün xitay dölet bixeterlik küchlirining közige qadalghanliqi, ularning jem'iyettiki esli roli heqqide dunya Uyghur qurultiyi diniy ishlar komitétining mudiri turghunjan alawudun ependidin melumat soriduq. U, ayal méyit yuyghuchi üchün alahide diniy melumat telep qilinmaydighanliqi, peqet ularning eqelliy diniy melumatining yéterlik bolushi, örp-adet qa'idilirige puxta bolushi, bolupmu taziliqqa pewqul'adde ehmiyet béridighan bir xaraktér we turmush aditige ige bolushi kéreklikini, shunga ayal méyit yuyghuchilargha “Diniy radikalliq” qa baghlap qarash we ensireshning pütünley mentiqsizliqini otturigha qoydi.

Turghunjan alawudun ependining qarishiche, shermi-haya Uyghurlarning milliy exlaq sistémisida eng muhim we eng gewdilik orun igileydiken. Buni bezide Uyghurlar özlirini xitaydin exlaqiy jehettin perqlendürüshtiki bir muhim ölchem dep bilidiken. Turghunjan alawudun ependi, Uyghurlar özliri üchün eng muhim dep qarighan herqandaq maddiy we meniwi bayliqning xitay da'iriliri teripidin xeterlik dep saniliwatqanliqini, uning suslashturulush yaki yoqitilish obyékti qiliniwatqanliqini ilgiri sürdi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.