Uyghur diniy alimliri gheyret salyéfning maqalisige reddiye berdi

Uyghur aptonom rayonluq partkom teshwiqat bölümi tashqi teshwiqat ishlar mu'awin mudiri gheyret salyéf Uyghurlarning ochuq yoruq, epuchan we ilghar medeniyetni qobul qilidighan ésil exlaqi pezilitige warisliq qilayli dégen témida bir maqale élan qilghan bolup, bu maqalide Uyghurlardin saqal-burut qoyghanlarni we yüzini yapqan yaki islamiy kiyim kiygen ayallarni tenqid qilghan. Saqal-burut qoyush we yüzini yépish toghrisida qur'an kerimide ayet yoqluqini otturigha qoyghan.

Gheyret salyéf maqaliside yene ayallarning yüzini yépish, islamiy kiyim kiyishini we erlerning saqal-burut qoyushini qalaqliq dep ipadiligen. Bu maqale chet'ellerde yashawatqan qattiq tenqidige uchridi. U, milliy munapiq we dindin chiqqan murted dep höküm qilindi.

Istanbulda yashawatqan dini alim abdulhekimxan mexsum we péshqedem wetenperwer zatlardin abdul'eziz ependi gheyret salyéfning bu maqalisige reddiye berdi.

Abdulhekimxan mexsum bu maqalini yazghuchi gheyret salyéf islam dinining asasiy prinsiplirini inkar qilish bilenla cheklinip qalmay, qattiq haqaret qilghanliqi üchün dindin chiqqan murted dep höküm chiqirilidighanliqini ipadilidi we islamning asasiy prinspliridin her qandaq bir prinsipni inkar qilghan kishi dindin chiqqan murted bolidighanliqini ipadilidi.

Gheyret salyéf maqaliside yene, yéqindin buyan Uyghur diyarida yüz bériwatqan qanliq weqelerning kélip chiqishini, weziyet muqimliqigha tesir yetküzdi, xelqning turmushigha qalaymiqanchiliq élip keldi dep yazghan we bu weqelerning hemmisini diniy esebiy küchlerning qutratquluq qilishi we teshkillishi bilen yüz bergenlikini dawa qilghan.

Péshqedem wetenperwer zatlardin abdul'eziz ependi bu heqte toxtilip gheyret salyéfqa reddiye berdi we uni milliy munapiq dep baha berdi we xitayni xosh qilish üchün mushundaq qiliwatqanliqini, emma xitay héchqachan xosh bolmaydighanliqini ipadilidi we uning bu maqale arqiliq Uyghurlarni xitaygha qul bolushqa teshebbus qiliwatqanliqini bildürdi.

Abdul'eziz ependi, Uyghurlarning güzel-exlaq ölchimini xitay Uyghurlarning ajizliqi dep qarap kelgenlikini ipadilidi.

Igilinishiche Uyghur aptonom rayonluq partkom teshwiqat bölümi tashqi teshwiqat ishlar mu'awin mudiri gheyret saliyéf chet'ellerge köp qétim bérip kélidighan shexs bolup, 2003-yili xizmet bilen se'udi erebistanning mekke shehirige barghan we u yerdiki Uyghurlarni mexpiy resimge tartiwatqanda se'udi erebistanning saqchiliri kélip uning resim apparatini musadire qilghan.

Gheyret saliyéf téléwiziye programmisida, 2010-yili yene se'udi erebistanning mekke shehirige xizmet munasiwiti bilen barghanliqini sözlep ötken, emma qaysi xil xizmet bilen barghanliqini éytmighan.