Пәйғәмбәргә қарши һәҗвий филим ишлигән адәм мусулман болди

Голландийәлик парламент әзаси “андорофан” исимлик бир шәхс мундин бир йерим йил бурун ислам пәйғәмбири муһәммәд әләйһиссаламни һақарәтләп һәҗвий филим ишлигән, андин йәнә шундақ бир филим ишләш үчүн диний материялларни көрүш җәрянида 3 ай бурун мусулман болғанлиқини елан қилди.

Андорофан исимлик бу шәхсниң мусулман болғанлиқ қиссиси һәққидә көпрәк мәлумат елиш үчүн сәуди әрәбистан радиоси түрк бөлүминиң мудири устаз абдуләһәд һапиз һаҗимға мураҗиәт қилған идуқ. Төвәндә, абдуләһәд һаҗим билән елип барған сөһбитимизни диққитиңларға сунимиз.

Абдуләһәд һаҗим билән сөһбәт

Абдул әһәд һаҗим мундақ деди:“ислам өлималириниң тәкитлишичә, мусулманлар әгәр өзиниң диниға садиқ болуп, бу динниң әвзәллик тәрәплирини әмәлийитидә көрситәләйдиған болса, дуняда нурғун кишиләрниң силамға тоғра баһа беридиған һалға келишидә вә нурғунлириниң мусулман болушида шәк йоқ икән. Демәк, бу мәсилидики йетәрсизлик мусулманларда икән. Чүнки бу динниң әһли болған мусулманлар уни башқиларға яхши тонуштуралиғандила, андин башқилар уни тонуйдикән вә әвзәлликини билидикән. Илим - пән тәрәққий қилған вә саһәлири көпәйгәнсери илаһий һәқиқәтләр оттуриға чиқиши сәвәблик иман ейтқан билим адәмлириму дуняда көп икән.

Сәуди әрәбистанида чиқидиған гезитләрниң хәвиригә асасланғанда, голландийәлик парламент әзаси “андорофан” исимлик шәхс ислам диниға вә мусулманларға өчмәнлики билән тонулған вә муһәммәд әләйһиссаламни һақарәтләп һәҗвий филим ишлигән адәм болуп, йәнә шундақ бир һәҗвий филим ишләш үчүн материял издәш җәрянида ислам дини билән йеқиндин тонушуп, униң әвзәлликигә қайил болған вә өзиниң мусулман болғанлиқи елан қилған. Шундақла илгирики динға қарши қилмишлириға қаттиқ пушайман қилип, мундин кейинки өмрини аллаһниң диниға хизмәт қилиш билән өткүзидиғанлиқини җакарлиған.

Гезитләрдә хәвәр қилинишичә, андорофан мундин 3 ай илгири мусулман болған вә 2013 - йил 4 - ай 18 - күни мәдинә мунәввәр шәһиригә кәлгән, андин мәккигә берип өмрә ибадитини ада қилған. Андорофан сәуди әрәбистаниға келиш мунасивити билән сәуди әрәбистанидики катта өлималар билән учрашқан. Сәуди әрәбистан муфтисиниң алаһидә қобул қилишиға еришкән вә муфти билән сөһбәтләшкән шундақла униңдин ислам һәққидә тәлиматларни алған.”

Андорофанниң мусулман болуш сәвәби

Сәуди әрәбистанида чиқидиған гезитләрдә йезилишичә, андорофан өзиниң мусулман болуш сәвәбини баян қилип мундақ дегән: “мән исламға вә униң пәйғәмбиригә қарши йәнә бир һәҗвий филим ишләш үчүн издинип материял көрүш җәрянида нөвәттики тәшвиқат қораллириниң мениң идийәмни қанчилик бормилиғанлиқини билдим, мән 48 йил исламни билмәй өткән һаятимға бәк үкүнимән, мән нөвәттә хизмитимдин истипа бәрдим, қалған һаятимни исламни өгиниш вә униңға хизмәт қилиш үчүн атидим. Чүнки мән издәватқан асайишлиқ билән хатирҗәмликни исламдин таптим. Кашки мундин бурун мусулман болған болсам немә дегән яхши болар иди. Шундақтиму мән қалған өмрүмни исламға атидим.”

Андорофан йәнә мундақ дегән:“навада биз мусулманлар ислам динини пүтүн иш - һәрикәт вә иҗтимаий алақимизда әйнән әкс әттүрүп берәлисәк, алди билән дунядики бәзи тәшвиқат васитилириниң исламға қарши тәтүр тәшвиқатлириға әң күчлүк рәддийә бәргән болимиз. Андин башқиларниң диққитини исламға тарталисақ, шу сәвәблик ғәпләттики инсанлар ислам һәққидә аз тола издинип қалса, биз яшаватқан бу дуня башқичә бир дуняға айлинишиға ишәнчим камил. Қени қериндашлирим, биз һәммимиз өз нөвитидә әмәлийитимиз билән қуранчә мусулман болайли, биз һазирғичә исламдин пәхирлинип кәлдуқ, әмди исламниң биз билән пәхирлинидиған вақти йетип кәлди, биз әмди өзимизни испатлайли!”